【虛擬銀行】虛銀真係燒錢?一文睇清8間虛銀2021年共蝕幾多錢、邊間股東無注資

博客 17:51 2022/05/31

分享:

分享:

一眾虛擬銀行在4月尾公布2021業績,在亳無意外下全數虧損加劇,而坊間最關心的淨利息收入方面,只有做得最大的眾安ZA、專心做貸款的PAOB和天星錄得正數,分別淨收8,700萬元、3,400萬元和4,200萬元,但單比起一年超過1億元的員工支出 (ZA甚至去到3億元員工支出),未計算其他燈油火蠟,大家都知未夠數啦。

今日我整了幾個表,想和大家一齊了解幾個有關虛擬銀行存亡的問題:

1.香港虛擬銀行去到2021年尾,總共蝕了多少錢呢?邊間蝕得最甘呢?

2.以2021年蝕錢情況簡單估算,如果股東不再注資,虛擬銀行燒多幾耐就會玩完呢?邊一間2022年不注資就會率先say bye bye呢?

3.股東們在2021年注資有幾落力呢?邊間竟然2021年1蚊都無攞過出嚟呢?

一齊睇表啦!

    點擊圖片放大

其實都係70.6億元啫,大家知唔知香港銀行業一年賺幾多錢?

當大家一路話虛擬銀行燒錢的時候,其實截至2021年底都只是合共蝕70.6億元,真係好細數,大家知唔知一年香港銀行業賺幾多錢?

提供兩個參考給大家,在疫情衝擊下,大新銀行在撇除聯營公司(主要係重慶銀行吧)的業績後在2021年都搵咗接近10億元;恒生2021年業績就創了近年新低,對比2019年賺少了40%,但稅後一年都賺高達140億元。

不用打開全香港所有銀行的報表,大家都可以估算一下香港銀行業一年賺多少錢,玩咗咁耐合共蝕了66億元對於整個香港銀行業是一個甚麼數字,又對一眾大孖沙嚟講會有幾肉痛喇。

那當然錢無人嫌多,可以免費的話你又點會肯畀錢,咁邊間加埋又蝕得最多呢?一齊睇吓啦。

蝕錢排行榜頭3位分別是Mox、Livi和ZA,分別蝕了15億元至11億元,3間共蝕了近40億元,佔了8間銀行總和的60%。

佔據中游的是買餸實會見到的Fusion和花臣多多的WeLab,實蝕大約8.6億元。其後是相對低調的Air Star、PAOB和Ant,蝕3.7億元至5.4億元,比起頭3位小兒科啦。

蝕錢當然不是一件好事,咁下個問題就係如果以2021年速率蝕落去,各家虛擬銀行可以蝕多幾耐呢?一齊睇吓。

蝕得多有咩緊要,我錢多就唔怕啦!不過有一間一年內唔注資就要 Game Over 咯喎!

要估算仲可以燒幾耐,除了要睇每年蝕幾多錢之外,仲要睇吓股東畀咗幾多錢,同蝕剩幾多在銀包喇!

下圖係截至2021年底各虛擬銀行的「總股東注資」(藍色棒)、總股東注資減總虧損後嘅「淨資本」(黃色棒)、「2021 年虧損」(紅色棒)和用簡單數學將「淨資本」除以「2021 年虧損」 (灰線)的綜合圖。

假設各虛擬銀行在未來會用一樣速度虧損,而如果股東又不注資,灰線就預示住這一間虛擬銀行還可以頂多幾多年喇!

    點擊圖片放大

呢度可以看到ZA在注資上明顯最積極,截至2021年底經已注資36億元,就算是總虧損為頭三甲,淨資本都仲有接近25億元,遠超其他同業,在2021年蝕超過5億元下,仍然估算可以生存超過4年時間,即係無咩資金壓力咯。

而財政上最穩健的是相對低調(亦唔多動作)的Ant Bank和Air Star,在2021年虧損輕微下,估算可以生存多6年和4年時間,不過唔知當佢哋發力嗰陣會唔會令成本直綫上升,導致有資金壓力喇。

8家虛擬銀行之中截至2021年底最有資金壓力的是WeLab,報表顯示淨資本只跌至5億元左右,而在1年都蝕緊5億元下,今年股東係不得不注資喇。

蝕錢頭2位的Mox和Livi都唔好得幾多,淨資本蝕剩10至12億元,而在1年蝕7億元,雙雙都必須在2年內注資,而這兩間銀行股東都相當多,唐人西人都有,管 Finance的一眾Bank Worker在接下來的董事會都有排忙喇。

股東們在 2021年注資又有幾落力呢?邊間竟然 2021 年 1 蚊都無攞過出嚟呢?

最後同大家睇吓 2021 年虛擬銀行股東們的注資情況。

ZA最大手筆,2021年總共注資了15億元,緊隨其後的是內地兩大科技巨頭支持的Fusion和Ant,分別注資8.5億元和7.8億元,然後到WeLab(5億元)、Mox(4.7億元)和PAOB(3億元)。

𠵱…? 點解數得6間咁少嘅?

    點擊圖片放大


無錯,livi和Air Star的股東們在2021年是沒有注過資的,總資本分別維持在25億元和15億元。

如果大家仲記得我上段寫過,Air Star暫時就未有資金壓力的,不過livi就唔係咁講喇,江湖盛傳livi某啲股東都唔係咁易搞的,所以都係嗰句,管Finance的一眾Bank Worker在接下來的董事會都有排忙喇。

香港虛擬銀行總共蝕咗幾多錢呢?仲可以挨幾耐呢?股東注資又有幾落力呢?

首先頭盔一個,以上一切謹供參考,不構成任何投資建議,我亦不是會計師 / 律師 / 工程師 / 財務分析師,可能會計錯數 / 睇錯數 / 解錯數,我誠心建議大家自己去金管局下載他們的年報自己對清楚喇。

至於虛擬銀行可以挨幾耐,以上計算都係純屬兒戲之談,話唔定所有虛擬銀行已經在2022年1月1號扭虧為盈呢?咁甚麼股東注資統統就唔valid喇。

又就算我以上的假設都錯唔晒,股東們都放咗咁多錢落去喇,唔通真係睇住佢死咩,去到緊要關頭自動就會「科水」架喇,斷估2022年未會見到有虛擬銀行執笠住,都係集中精力,繼續留意他們2022年有咩搵到錢嘅新搞作吧啦。

(後記一個:有讀者提醒WeLab Bank喺報表section 27已表示喺1至3月注資1.35億元,不過同一年蝕緊5億元仲好似有啲距離,錢,都係要繼續燒架喇)

 

【文章來源:華田銀行;已獲授權轉載。原題:銀行閑談 (174) — 香港 VB 總共蝕咗幾多錢呢?仲可以挨幾耐呢?股東注資又有幾落力呢?】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

=====

理財真實個案分析,立即免費下載《香港經濟日報》App

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款