【虛擬銀行】台港VB大作戰 上客百萬目標實唔實際? 幾時收支平衡先合理?

博客 14:25 2022/03/22

分享:

分享:

上期專欄講咗台灣第三家(亦係暫時最後一家)「純網銀」將來銀行喺延期超過一年之後,宣布將會喺今年3月尾正式公眾營業,仲揚言要:「2年內衝出百萬用戶,4年內達成損益兩平」㖭!

大家都知台灣人口遠遠多過香港,大概有2,350萬人,即係香港3倍多少少,咁簡單數學嚟睇「衝出百萬用戶」的確比香港容易少少嘅,不過最好方法當然係睇睇已經營業差唔多一年嘅2家台灣VB同業「樂天銀行」同「Line Bank」嘅經營情況,只有3家VB嘅台灣,會唔會比有8家VB競爭嘅香港好撈啲呢?

9個月創出73萬客戶,Line Bank完勝樂天銀行

根據台灣金管局2021年底嘅數據,雖然樂天銀行要比Line Bank早3個月開張,但係經營咗接近12個月嘅樂天銀行無論存款、貸款、存戶數目都要遠遜於只經營咗9個月嘅Line Bank,其中最誇張嘅係Line Bank喺9月之內已狂掃73萬戶,完勝樂天銀行嘅6.7萬,亦勁過晒香港所有VB同業喇!

    點擊圖片放大

Line Bank狂掃73萬客,除咗因為台灣人人都有嘅Line之外,亦因為有超好康嘅消費優惠,例如Line金融卡可以攞到國內消費3%回贈,特定場景有高達18%回贈哦!

呢個回贈額喺台灣應該屬於核彈級喇,台灣渣打Simply Cash卡加埋Priority banking先得2%,𠵱家你肯交低張身份證開Line Bank就有3%,啲公仔仲要咁可愛,梗係搶到爆啦。

    點擊圖片放大

樂天銀行客戶質素之高,香港同業都莫塵莫及

咁樂天都唔係一無事處嘅,除咗蝕得比較少,平均存戶結餘有足足9.4萬新台幣,即係25,800港元。

25,800港元呢個數都幾勁,大家首先可以比較吓自己放咗幾多錢喺VB就知呢個數一啲都唔少嘢,如果用香港VB開戶數一哥ZA Bank做比較,喺2021年8月開業大概1年半之際,ZA Bank宣布客戶數突破40萬、存款規模約60億,即係平均存款「只有」15,000港元㗎咋!

    點擊圖片放大

仲有仲有,台灣生活指數遠低過香港(信義區嗰個啲市中心例外啦吓), 喺台灣94,000新台幣要好使過喺香港使25,800港元吧,而香港人又的確比台灣人有錢,所以都幾犀利的。

不過暫時只得唔夠70,000戶,咁嘅數目絕對唔足以支撐銀行營運,一定要想辦法做大啲個Customer base先得喇。

【3家台灣虛銀 樂天銀行、Line Bank、將來銀行的特色:按此

Line Bank貸款9個月做10億港元,成績都唔錯㗎!

睇番Line Bank貸款數字,2021年底錄到近36億新台幣貸款額,折合近10億港元,香港嘅情況又如何呢?

    點擊圖片放大

如果攞ZA Bank同天星銀行2021年6月底嘅年報做比較,呢兩間銀行喺經營一年之後,貸款額分別係13.6億同8億左右,所以話Line Bank 9個月時間做到10億貸款都真係幾勁。

要睇銀行營利能力,除咗個貸款要大,個存款額都不能拋離太多,如果存款遠遠高於貸款,就會出現資金過剩、白花利息嘅問題喇。睇返各家銀行嘅貸存比率,ZA Bank同大概係17%,稍稍高於Line Bank嘅15.3%,而天星就因為存款較少,貸存比率有成36%,明顯比兩家同業都優秀好多。

不過咁講,36%好似叻過對手好多咁,但仍然同理想水平差得好遠,一般商業銀行客戶貸存比率超過70%係好正常的,所以諸位仍要繼續努力喇。

燒錢之路一樣遙遙無期吧?

最後同大家睇埋蝕錢嘅情況,樂天銀行全年蝕5.6億新台幣,折合1.54億港元;Line Bank全年蝕咗超過17億新台幣,折合4.77億港元。哇,都唔少錢喎!

睇返香港情況,ZA Bank 2021年6月底頭半年蝕咗2.78億港元,天星就叻啲,半年「只係」蝕咗1.32億港元,賺錢真係唔係咁易架。

咁全年又點呢?2021年全年數字就未睇到,不過繼續蝕錢都好正常吧。早前Mox就話目標係3至4年內收支平衡,咁即係唔好話今年,係出年都唔打算可以Breakeven,都係繼續努力拼業績,之後先再講賺錢啦。

    點擊圖片放大

【德國虛銀N26 Bank有咩特別? 香港呢間虛銀都有佢嘅影子:按此

「2年內衝出百萬用戶,4年內達成損益兩平」可行嗎?

最後返嚟將來銀行,到底「2年內衝出百萬用戶,4年內達成損益兩平」係咪實際呢?

將來銀行個Potential customer base其實都唔細,中華電信、兆豐金、新光、全聯都有最少9.9%股份,股東背景集電訊、金融、零售嘅於一身(有少少Mox + livi咁樣嘅影子呢),大家可以幻想到呢個股東配搭嘅影響力啦。

至於係咪真係可以「衝出百萬用戶」,Line Bank可能多幾個月就可以達標,而樂天銀行就未來3年都唔太可能,所以係咪可以「衝出百萬用戶」就要睇將來銀行有咩好爆嘅Product攞出嚟吸引大家開戶喇,暫時就只係知道有自定號碼,咁係未夠個噃。

    點擊圖片放大

至於4年內收支平衡,呢個就好可能同開戶數係有啲衝突的,睇返香港嘅例子,各間VB因為未能夠好好將存戶嘅錢拆出去,都紛紛減息,但求留戶不留錢,都幾搞笑的。

收支平衡嘛,就係收入大過支出,即係最基本要利息收入要大過利息支出,先有可能畀得起燈油火蠟人工租金,當貸款都未做得起,吸咁多存款番嚟谷大自己個利息支出為咩呢?

所以我經常都話,香港8間VB入面短期最可能達到收支平衡嘅,我嘅愚見認係PAOB都幾有機會跑出,專心做好中小企,低調行事,唔吸多餘嘅存款,未嘗唔係一條聰明嘅出路哦。

至於將來銀行可唔可以又上客、又返數呢?又睇吓半年後有咩驚喜畀我哋啦。

 

【文章來源:華田銀行;已獲授權轉載。原題:銀行閑談 (164) — 台灣 VB 一年談 — 樂天銀行同 Line Bank 經營情況如何呢?同香港比較係快定慢呢?】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

=====

理財真實個案分析,立即免費下載《香港經濟日報》App

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款