【虛擬銀行】台灣虛銀將來銀行月底營業 有啲玩法同香港一間虛銀好相似!

博客 12:20 2022/03/15

分享:

分享:

踏入2022年3月,台灣第3間、亦係最後一間「純網銀」「將來銀行」(Next Bank)宣布將會喺今年3月尾正式台眾營業,比喺2021年1月率先衝綫嘅「樂天銀行」遲咗足足1年2個月,亦比喺2021年4月衝綫嘅二哥 「Line Bank」遲咗11個月。

【3家台灣虛銀 樂天銀行、Line Bank、將來銀行的特色:按此

「將來銀行」發生咩事搞到遲遲未來呢?佢出場有咩殺手鐗呢?今篇一齊同大家研究吓喇。

    點擊圖片放大

「將來銀行,究竟還有沒有將來」呢?

「將來銀行」大漏閘事件,華田早喺上年專欄寫過,當時嘅消息係爆出喺Cyber security、procurement同人事任命都出現咗極大問題。

尤其是喺Cyber security上面,台灣傳媒報道公司也並未否認,並說會深刻「反省」、「改善」,咁睇嚟就真係幾多漏洞喎。

喺未能如期喺2021年初攞到台灣金管局開綠燈營業之後,自2018年11月出任籌備處執行長、喺2020年1月正式擔任總經理嘅劉奕成喺3月18日閃辭,保險主管莊瑞德亦極速跳槽,令到當時台灣嘅報紙要用「將來銀行,究竟還有沒有將來呢」嚟形容呢間銀行。

將來銀行有咩新玩法?

No matter what,遲到好過無到,將來銀行宣布「試營運」成功,將會喺今年3月尾正式營業,仲話「有信心2年內衝出百萬用戶,4年內達成損益兩平」。

雖然未正式開舖,撰文當日(3月7日)就已經有活動同台灣市民玩,就係可以預約自己鍾意嘅戶口號碼,足足可以自訂10個數字咁多喎!

    點擊圖片放大

睇返上面張圖,戶口號碼除咗頭4位係由官方產生之外呢,尾嗰10位都可以自選,係咪覺得熟口熟面呢?

    點擊圖片放大

香港都有類似玩法喇,不過就唔係戶口號碼,而係ZA Card自訂最後6位數字喇,咁樣一比較,將來銀行都有啲誠意,14位戶口號碼竟然有多達10位可以自訂,比起ZA Card 16位號碼只有6位可以自訂,咁當然係將來銀行好玩啲啦!

至於點解銀行可以畀大家自訂號碼呢?又有咩限制呢?呢個喺之前專欄有詳細解釋,簡單講就係呢串號碼係暗藏住一啲訊息的,例如信用卡4字頭就係Visa、5字頭就係MasterCard,頭6位就係Card Bank Identification Number(Card BIN),例如544729就係Mox Card,呢啲無得自訂喇。

    點擊圖片放大

卡最後一位數係Check digit,需要符合Luhn Algorithm先得,至於咩叫Luhn Algorithm呢?就要睇番我之前寫嘅專欄喇!(嗱,真係環環相扣架!)

咁我當然覺得呢啲玩法好聰明啦,抄返上次段字:

華田一見到眾安玩自訂號碼,首先就覺得真係好聰明,喂喂,冧巴之嘛,又唔使成本,又有Market noise,你開心時我又開心,有咩鎖櫃。

「樂天銀行」同「Line Bank」嘅經營情況又點樣呢?

咁大哥「樂天銀行」同二哥「Line Bank」喺一年之後嘅經營情況又點呢?

喺前車可鑑之下,「有信心2年內衝出百萬用戶,4年內達成損益兩平」又係咪實際呢?之後再同大家繼續分析。

Btws,花生一則,寫文當日將來銀行個官網好似死咗機,台灣朋友話可能係因為太有Market noise所以太多人上去搶戶口號碼引致大擠塞,唔知真定假,不過2022年3月7號夜晚11點我係上唔到佢官網的,呢間嘢啲IT嘢睇嚟真係好可靠喎。

 

【文章來源:華田銀行;已獲授權轉載。原題:銀行閑談 (163) — 台灣最後一間虛銀「將來銀行」準備營業,點解話佢個新玩法其實熟口熟面呢?】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

=====

理財真實個案分析,立即免費下載《香港經濟日報》App

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款