【虛擬銀行】Mox「迎新禮品體驗」憑甚麼贏晒全行? 申請即批即出即用即賺點做到?

博客 15:50 2022/02/22

分享:

分享:

當大家以為虛銀已經上夠客,會將工作重點由「吸客」轉為「搵錢」之時,2022年又有返幾間虛銀派錢吸客,仲要食住疫情嘅主題,大推同外賣、網購、宅經濟有關嘅迎新優惠。

例如Mox最近就玩全新客戶用優惠碼「HUNGRYMOX」 開戶並申請Mox Credit,成功開戶當日起計30日內再用Mox Credit喺指定外賣平台同超市消費500元就有500元回贈,都幾闊綽喎!優惠玩到今年3月尾,仲有玩之前自己研究返啲條款及細則喇。

    點擊圖片放大

今日唔係想講派錢嘅,而係Mox「玩迎新」真係各銀行暫時都望塵莫及。

其實信用卡「玩迎新」真係唔係咩新鮮事,不過搞咗咁多年,傳統上信用卡「玩迎新」仍然存在住4大痛點,分別係:1)申請唔係即刻批核、2)過程仲要麻麻煩煩、3)批核完又要等張卡到,隨時仲要我去分行攞、4)張卡到又要我手動入落Google Pay/Apply Pay,結論係我咁貪小便宜都廢事煩,專心啲睇吓手頭上嘅卡有咩特選優惠好過啦。

Mox「玩迎新」有咩咁勁呢?一切都同STP呢3隻英文字母有關,今日就同大家分析吓呢個案例喇。

STP — Straight Through Processing,即係全自動不經人手咯!

當大家以為銀行啲系統個個都好先進嘅時候,呢個只係大家嘅錯覺。就算每個系統獨立嚟睇都好先進,但係各系統之間都可能係無溝通,每次由一個系統去另一個系統都可能要人手干預,所以我最近去某間綠色銀行開戶開咗個半鐘咯!

咁點樣可以令客戶體驗好啲呢?答案就係令各系統可以互相溝通,無論係Happy flow定Unhappy flow都可以好好交接,可以全自動不經人手咁完成整件事,咁客人就最開心喇!

呢個「令各系統可以互相溝通」嘅工作行內就叫做Straight Through Processing簡稱STP喇。

而我頭先話Mox「玩迎新」係冠絕群雄,因為佢個STP未免做得太徹底,令大家可以即申請、即批、即用、即賺喇!

STP — Straight Through Processing,即係即申請、即批、即出、即用、即賺咯!

Mox喺整個STP上面係做得非常徹底的,所以先可以做到10分鐘前睇到迎新優惠、10分鐘後已經完成迎新任務、再過一陣foodpanda就送到屋企門口。

一步步同大家講呢個申請、批核、出卡、消費、用餐五步曲啦。首先開戶Mox當然同一眾VB一樣係快至5分鐘搞掂,大部分傳統銀行其實都未做到架。

Mox Credit嘅批核同出卡當然都係STP搞掂,少過5分鐘就可以出到電子卡,再可以順手加埋落Apple Pay同Google Pay,咁就可以即時消費,呢個喺早前專欄已經詳細寫過,用返當時嘅文字,Mox Credit的確係「香港信用卡市場喺『申請之快速』同埋『使用之流暢』訂立咗一個新嘅標準」。

咁既然咁流暢,賺迎新當然就無難度啦。

其實呢個「批核、出卡、消費」嘅STP一樣非常唔簡單㗎,要先喺Front end同CIF(Customer Information File)攞大家嘅個人資料,問TU(信貸資料庫)攞報告,中間做一堆認證同數據傳輸,攞完報告要識得不經人手閱讀,擷取有用嘅資料,再倒入Credit model,連埋其他資料一併做批核,如果批核成功,再要定信貸額,再通知發卡系統先出電子卡,即時畀大家加入Apple Pay或Google Pay,仲要通知計帳系統畀大家即時消費,再通知打卡系統做打卡,等大家之後可以用實體卡消費!

係咪睇到頭都暈呢?中間真係好多好多個系統要做嘢,中間一步都不能錯先可以做到Straight through㗎!背後Bank worker做咗好多嘢,先可以令大家10分鐘前睇到迎新優惠、10分鐘後已經完成迎新任務、再過一陣foodpanda就送到屋企門口喇。

現有客戶又有咩着數呢?

而現有客戶就唔使太失望嘅,銀行始終唔係善堂,着數不能攞到盡。最近現有客戶玩緊星期五、六、日用Mox Credit喺foodpanda指定餐廳,運費前消費滿300元就有65元回贈,小小心意一樣玩到3月尾,仲可以串燒埋5%現金回贈一齊玩,大家記住留意啲每月使用上限、回贈上限、同埋要用專屬優惠碼「MOX65」喇。

點解Mox會係全港「迎新禮品體驗」做得最好嘅銀行呢?一齊講講STP嘅重要性喇!

今篇同大家講咗STP點樣有效促進整個客戶體驗,以Mox嚟講,喺開戶、申請、批核、出卡、消費都可以做到咁流暢之下,要賺嗰500元外賣平台或超市回贈,都應該係香港最易了吧?最新消息係除咗foodpanda,連戶戶送Deliveroo都有Mox Credit 5% CashBack回贈,優惠期就去到今年4月尾。

講起STP,都可以話係虛銀優勢,一來既然係全新銀行、全新系統,無理由唔做好佢、仲要請一班同事返嚟手動接駁系統咁傻吧;二來做STP對已經用人手處理緊個流程嘅銀行嚟講,係一件吃力不討好嘅事,造價昂貴之餘,就算可以慳咗人手,已經做緊呢隻Job嘅同事又要點處理呢?

大家唔好笑,我自己就做過一隻Project,前端又AI又Blockchain,後台竟然係出一個e-mail,然後由後勤同事手動入返啲資料去另一個系統,我哋自己都笑係HSTP — Human Straight Through Process咯。

最近疫情又反覆咗,大家Stay safe之餘,盡可能都Stay at home啦。

 

【文章來源:華田銀行;已獲授權轉載。原題:銀行閑談 (161) — 點解 Mox 會係全港「迎新禮品體驗」做得最好既銀行呢?一齊講講 STP 既重要性喇!】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

=====

想盡早財務自由,提早退休,立即免費下載《香港經濟日報》App取經

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款