【2022壬寅虎年】Mox電子利市實測 收發利市過程係點?

博客 14:10 2022/01/18

分享:

分享:

每逢年尾年頭都係消費旺季,又係銀行各出奇謀力谷人氣同業務嘅時間,啱啱呢個周末我就試咗Mox(我Fans嚟㗎嘛)嘅「刮刮卡」同「虎年e-利市」,感覺都唔錯,今篇一齊同大家實測一吓喇。

【ZA嘉年華有咩咁特別? 如何將一眾銀行比下去?:按此

最少中$8「刮刮卡」,辦年貨嗰陣可以一用喇

呢張「刮刮卡」係首次Mox加入Gamification元素嘅產品,用Mox Credit單一簽帳夠800蚊,就可以刮到8至800蚊回贈,不過留意只限「非5%CashBack商戶」,着數不能攞晒啦。

用Mox Credit消費800蚊或以上就最少有1%無上限CashBack再加額外回贈,如果大家辦年貨嗰陣,舖頭又無咩特定信用卡優惠,呢張就會成為2022農曆年嘅皇牌信用卡喇!

咁我呢個周末就實測咗兩次,成績都OK嘅,大家不妨又試吓運氣啦,推廣期去到月底咋!

    點擊圖片放大

個個都話做e-利市,唔通個個都真係畀心機做咩

講「虎年e-利市」之前,我想表達吓有啲銀行所謂嘅e-利市都真係Hea的,只係喺FPS個「備註欄」嗰度加幾個新年emoji就算數,完全無考慮「派利市」同「收利市」嘅體驗,咁當然唔OK啦!感覺上虛擬銀行比較有心機喺呢一方面做得更出色!

Mox呢一版虎年e-利市「抵得諗」之餘質素都唔錯?下面分(1)基本設計、(2)派利市流程、(3)收利市流程同大家一齊實測一吓喇。

一式五款可愛路綫,又啱唔啱大家口味呢?

打邊爐除咗啲食物,個爐都一樣好緊要。派利市當然都係啦!入面啲錢緊要,個利市封都一樣緊要喎!

自開業以嚟,Mox一直畀人嘅感覺都係偏向型格路綫,而今年嘅e-利市設計就畀屬於可愛路綫多啲,有3款老虎、1款年花、1款年桔造型畀大家選擇,唔知有無擊中大家的心喇!

【Mox推虎年主題電子利市 推薦5位好友即賺$1,000現金:按此

    點擊圖片放大
    +3
    +2

我就覺得「如虎添翼」同「虎虎生金」都幾可愛,個樣傻豬豬得嚟又不失老虎嘅神態,亦唔係只有紅色咁悶蛋,希望今年收到我e-利市嘅朋友仔都鍾意喇。

派利市流程一貫流暢,有得將祝福語寫喺利市封上面當然加分啦

有留意華田專欄嘅朋友都知道,我對Mox嘅期望一直都幾高的,咁呢次個流程都一如以往流暢啦。

首先可以見到Mox有將派利市呢件事放喺心上,有將「派利市」粒掣放喺首頁當眼位置,呢個Function係無錢賺個喎,有啲誠意吖。

後續嘅流程都相當直觀,揀收款人、揀利市封、輸入祝福語句、確認咁就OK喇。

    點擊圖片放大
    +2

呢度個祝福語特別想提一提,如上面所講,有啲銀行只係將FPS嘅「備註欄」當咗畀大家入「祝福語」嘅位置就算,即係話就算你有100個利市封可以揀,呢個偷懶做法只會令個祝福語同張Jpeg割裂,所謂「派利市」只係普通FPS+一張圖,差咁啲咯。

個流程做好啲其實唔難,將句祝福語直接放上個利市封上面,嘅可以將兩者融合,又可以增添一啲Customization元素,成件事好好多喇。

收利市過程簡單易用,亦有顧及非Mox客戶嘅流程,呢個要一讚喇

咁收利市嘅流程又點呢?

今年Mox嘅設計相當簡單易明,如果收款方用Mox收利市,就會收到一個Push notification,登入就會開到封利市,再撳中間個利市封就可以放大個利市封,睇到祝福語之餘,仲可以即時回禮,派番畀朋友喇。

    點擊圖片放大

咁如果收款方無Mox戶口,當然無得打開Mox App收利市,咁又會點處理呢?

因為收款銀行唔支援呢封利市,所以會將交易還原番做一般FPS P2P咁樣處理,但係唔緊要嘅,喺派利市嗰刻,Mox會幫大家整個jpeg版嘅利市封,等大家透過Instant messenger送畀朋友。

喺呢個位Mox都幾有機心的,送利市之餘不忘黐埋個Referral Code落去叫埋朋友開戶。咁都唔太off-topic嘅,今期MGM referrer如果成功介紹朋友申請Mox,佢哋有機會可就每位成功介紹嘅朋友攞到100蚊至300蚊開戶獎金,而合資格Referee都有機會攞到50蚊或200蚊獎金!你話有咩好過新年一齊發財呢?

    點擊圖片放大

Mox刮刮卡+2022版虎年e-利市開箱,今個農曆年我好可能會用喇!

呢個Mox 2022版虎年e-利市,用法簡單,設計都幾得體可愛,收利市同畀利市過程流暢,亦有兼顧非Mox客戶嘅體驗,係一個合格以上、今年我會用嘅產品。睇返成個2021年,當大部分虛銀對手都積極發展「搵到錢」嘅產品,仍然有虛銀調撥資源做一啲「只為增進客戶體驗」嘅產品都真係幾「抵得諗」。

新一年大家逗咗利市,不妨試吓佢哋全港最好嘅儲錢Goal Account功能(我話嘅,有機會出篇文介紹吓),呢個「無錢賺」嘅功能都一樣「抵得諗」啦。

至於「刮刮卡」,喺無特定商戶信用卡優惠之下,1%無上限CashBack再加額外回贈都相當具競爭力,而我實測出嚟回贈率就更遠超呢個數喇。

今日同大家實測咗Mox嘅「刮刮卡」同「虎年e-利市」,預祝大家虎年心想事成,快啲有得去旅行就最好喇!

 

【文章來源:華田銀行;已獲授權轉載。原題:銀行閑談 (156) — Mox 刮刮卡 + 2022 版虎年 e-利是開箱,今個農曆年我好可能會用喇!】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款