華田一人票選! 2021年十大零售銀行大事回顧(下)

博客 14:25 2022/01/04

分享:

分享:

上一篇專欄同大家數咗華田一人票選嘅2021年十大零售銀行大事回顧第10至6位大事,今次就嚟講吓最後5強啦!

5. 一雞兩味,WeLab Bank創P-Loan新玩法!

借錢送高息戶口一直都係按揭先有嘅玩法,但係WeLab Bank就將整個Mortgage-link model套咗落P-Loan上面,仲改埋名叫GoFlexi Link,橋就係舊嘅,但都算係為香港銀行私人貸款寫下咗歷史新一頁喇!

    點擊圖片放大

雖然我一直都覺得呢個GoFlexi Link唔係咁容易「用得好」同「用得到」,不過WeLab Bank作為少數有喺放貸過程中為客戶提供「現金流管理神器」嘅銀行,單係呢個位就已經要一讚喇。

唔知喺未來會唔會有其他銀行跟隨呢種玩法呢?

4. livi PayLater──都可以話係年度最差產品咯!

今年都寫過幾篇文章講「消費分期」點樣成為信用卡部門嘅救贖,始終人就係咁奇怪,借錢買嘢就十惡不赦,但係先買後付就人之常情,仲係「好好管理現金流」嘅表現𠻹。

livi見到呢個趨勢,喺各間同業都先出分期貸款嘅時候,就率先推出消費分期貸款,仲改咗名叫livi PayLater,等你以為佢同Atome一類BNPL產品一樣喇。

一來我係覺得呢隻livi PayLater係真心生不逢時,要論信用卡免息消費分期,早幾個月就已經有SC Smart同DBS Livi Fresh,打正旗號係做免息分期的,而呢隻livi PayLater就只係優惠期內全免,好難競爭啦。

二來佢根本唔係一張信用卡!大家可以睇吓livi官網描述:

livi PayLater是一種全新的消費模式,以循環式分期貸款,並通過livi PayLater Mastercard消費滿最低金額,即可享受高達36個月分期還款。

    點擊圖片放大

我只係想做個消費分期啫,因乜事要搞到玩Revolving loan喺自己TU留一筆呢?而我自己亦身受其害,搞到我要寫封Declaration letter畀做緊Mortgage嘅銀行,大家用落就小心小心喇。

3. ZA派利市+出糧Fast Pass,呢啲就係高規格+有意思嘅新產品喇!

又差唔多到農曆新年,上年受疫情影響,大家有無一改傳統,派過/收過電子利市咁呢?

不過上年有一個好怪嘅情況,就係幾乎間間銀行都無特別標榜自己有電子利市服務,唔係佢哋無做啲Tiny enhancement例如喺FPS度加吓賀年Emoji、喺Landing page加吓恭喜發財咁,而係因為有間銀行實在做得太出色,令到其他銀行完全唔好意思話自己有電子利市。

而呢間喺電子利市上面做得超出色嘅就係ZA Bank喇!

    點擊圖片放大

我諗有用過嘅人都會明白ZA Bank喺派利市上面點樣完勝所有對手,無論係入利市動作、拆利市體驗、整體配色、動畫、吉祥物、利市封、祝賀語、有ZA戶口定無ZA戶口,整個過程都係令派利市同收利市嘅雙方開心愉快。

其實都係P2P畀錢啫,中間又無錢賺嘅,咁就更證明ZA Bank係畀心機做好件事咯。

除咗派利市,ZA Bank另一香港銀行史上嘅新產品就係出糧Fast Pass,一隻主打早7日出糧嘅循環貸款產品(係吖,都係Revolving loan)。

    點擊圖片放大

話佢「聰明」並唔係指隻產品有幾創新,又係Revolving loan之嘛,但係個Selling angle就好中喇。

首先喺消費者角度睇,Cash flow mismatch嘅問題一路都有,佢哋需要嘅係一個短期、小額嘅融資工具,一個星期就好,如果撞正唔好彩畀人拖糧,就算要畀貴少少利息頂多一個星期都可以,所以一般嘅分期貸款其實完全唔啱用。

其實Revolving loan有咗好耐,亦可以用嚟解決Cash flow mismatch嘅問題,只係銀行唔識Sell,消費者自然唔識Buy,所以話呢個「出糧FastPass」嘅糖衣就製造咗一個名正言順嘅理由畀消費者去申請,Selling angle就非常中喇。

2. Mox Credit應該係信用卡UX嘅新標準吧!?

Mox食住2020年推出純黑金屬卡嘅勢頭,喺2021喺呢將原本只有Debit功能嘅金屬卡上面加多一層Credit limit,就華麗轉身進軍Credit card業務,仲順手大做消費分期喇。

咁咪又係Credit card,有咩咁特別呢?就係整個UX都係市場嘅新標準喇!其中包括由Debit提升至Credit嘅版面簡潔俐落、接近即時嘅審批速度、可即時加落Google Pay/Apply Pay再即時消費,即係話真係可以做到「即時申請、即時消費」喇。

    點擊圖片放大

咁都係無比較無傷害啦,Mox呢張仲同時支援實體卡同JETCO提款,亦唔係Revolving loan,同頭先第4位嗰張真係爭得好遠喇。

而後續出嘅分期貸款,喺「申請時間點」上誠意十足、申請過程流暢、收費清晰易明、申請後要翻查記錄亦十分容易,繼續合乎我對Mox一貫嘅高期望,亦係市場上「消費分期」嘅另一高水準指標喇!

1. 滙豐EveryMile卡,倚天不出、誰與爭鋒!

滙豐好耐無大型新卡,對上一張旗艦卡Red Card已經係2019 Q3嘅事,都真係好耐咯,仲有上次個宣傳明顯無今次咁浩大,所以話滙豐今次真係隆重其事架!

滙豐今次呢張EveryMile Card有兩大歷史意義,亦係我一人票選佢為2021年零售銀行界第一大事。

    點擊圖片放大

首先今年真係無咩明星代言產品,我剩係諗到Ali BB代言唔知邊間銀行、Stephy代言livi、Mirror代言滙豐投資世一,不過統統都唔夠「子華神」代言信用卡咁爆喇掛!?(嗱,郭富城代表滙豐尚玉係2020年尾架喇!而黎明代言Citigold就更早喇!)

【無得飛換里數做乜? 滙豐EveryMile「申請的意義」:按此

如果大家覺得明星代言係膚淺,呢張EveryMile仲有個好重大嘅意義,就係一直唾棄AsiaMiles市場嘅滙豐,終於向Miles黨伸手,直接同剛Re-brand嘅Cathay卡競爭,亦將其他主打「旅遊」嘅信用卡一次過掃低晒!

EveryMile亦嘗試補足Visa Signature同Red留低嘅綫下低額消費板塊,基本上出街碌Card要賺回贈,3張滙豐卡已經填滿日常消費,除非對手玩遊擊式商戶優惠,否則都唔會有咩窿窿罅罅畀其他銀行卡進入喇。

【華田一人票選】2021年十大零售銀行大事回顧,或者「桃花依舊」先係第一大事?

以下呢10件大事,唔係係咪大家心中嘅2021年十大零售銀行大事呢?

  • 第十位:虛銀瘋狂優惠不再,你還有在用虛銀嗎?
  • 第九位:跨境理財通,到目前為止仍然是個理想吧
  • 第八位:個個都話做ESG,終於有少少ESG產品喺零售層面面世喇
  • 第七位:消費券2021,Bank Worker真係嬲嬲豬咯
  • 第六位:鄭經理卡不再,渣打同國泰關係更進一步
  • 第五位:一雞兩味,WeLab Bank創P-Loan新玩法!
  • 第四位:livi PayLater—都可以話係年度最差產品咯!
  • 第三位:ZA派利市+出糧Fast Pass,呢啲就係高規格+有意思嘅新產品喇!
  • 第二位:Mox Credit應該係信用卡UX嘅新標準吧!?
  • 第一位:滙豐EveryMile卡,倚天不出、誰與爭鋒!

2021年當然仲有好多香港銀行界大事,例如中銀Rap片流出、恒生Louisa離世、Diana過檔恒生、滙豐投資世一、WeLab疑似造馬案、VB十萬客大賽、睇電視逗嬲嬲、天星FX業務、VB高層大洗牌、花旗退市、連環釣魚事件、恒生匿名信等等,都發生咗唔少事,不過因為上述有啲唔夠Retail我就無放上榜喇。

咁論精采程度,但當然無2020年VB輪流搶閘出台咁精采喇!

2021年仲值得一提嘅,就係各Bank worker都食咗唔少散水飯,人來人往、緣起緣滅,我諗2021年銀行界最大嘅大事,應該係「桃花依舊」四字。

另外5件銀行界大事,請按【上一頁

 

【文章來源:華田銀行;已獲授權轉載。原題:銀行閑談 (154) — [華田一人票選] 2021 年十大零售銀行大事回顧 (下)】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

開啟hket App,閱讀全文

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款