【交稅2021】稅季又到想借平錢? 一綫財務機構稅貸有咩優勢?

博客 19:10 2021/12/15

分享:

分享:

稅季又到,唔少人都會想趁平申請Tax loan攞番少少Liquidity,純粹交稅又好,或者攞嚟做啲低風險投資,又係可行嘅選擇。不過就算你信貸記錄良好,還款能力完全能夠應付,Tax loan有時都唔係咁易申請。

Tax loan作為全年最平私人貸款,銀行除咗睇信貸記錄(主要係睇TU啦)同Debt Servicing Ratio(簡稱DSR,即係每月還款額除每月收入)之外,對客人嘅背景都會相當揀擇,即係話就算你以前還得起、將來亦還得起都好,我都唔一定借畀你㗎。

【信用卡交稅優惠回贈一覽 邊張卡可享高達700元獎賞?:按此

Tax Loan喺TU同DSR外考慮嘅三大因素

雖然間間銀行嘅Credit policy都唔同(亦唔會對外披露啦),不過一般嚟講Tax loan都會要求良好嘅「職業」同「發薪記錄」,係咪即係唔做賭場找換店桑拿就叫做「良好」呢?

呢個要比你想像中難得多喇!呢度可以分「職業」、「發薪方法」、「工資穩定性」3方面嚟講。

  • 職業嚟講,最好醫生、護士、律師、精算師、工程師、公務員,次一層就係大公司白領,再低一層就係大公司藍領或者細公司白領,如果大家係一間小小工程公司嘅裝修師傅,咁就唔好意思嘞。
     
  • 發薪方法嚟講,最好係自動轉帳,月結單出糧嗰行要見到公司名+SALARY,其次就係支票出糧,最差就係現金出糧同手寫糧單喇。
     
  • 最後就係工資穩定性,每月定時定額最好,依靠佣金為主要收入嘅次之,自僱或者兼職又會再差啲喇。

係吖,篩吓篩吓都真係好多人申請唔到,例如你係一個名店Sales(哪怕你係Top sales)或者保險經紀(哪怕你係MDRT)就好可能申請唔到,我自己就好彩仲有份正職,如果Claim自己係全職Blogger就肯定唔睬我喇。

AEON CREDIT等一綫財務機構正填補銀行留下稅貸市場的空隙,而亦有一定競爭力喎

既然有利可圖,但係銀行又做唔到,自然就有財務公司出嚟填補市場空隙。

好多人講起財務公司,都會覺得佢哋只做一啲貸款能力好低嘅客人,產品嘅息口又一定會遠超銀行,不過呢啲都係刻板印象喇!

香港好多一綫嘅財務公司正逐步向銀行靠近,努力尋找一啲具備「還款能力」但又因各種原因無辦法喺銀行得到貸款嘅客人。

以AEON CREDIT為例,我諗大家去親AEON買嘢都會畀啲職員問有無AEON信用卡,其實AEON Group唔單止有百貨公司業務,仲有金融服務好似信用卡同貸款咁。我最近留意到佢哋嘅Tax loan,做到最多18倍月薪、6至24個月還款期、無手續費,月平息最低0.14%(即係APR 3.24%),額外現金回贈最多10,000元,單論Offer嚟講都無咩輸蝕畀銀行。

以佢哋借80萬分24個月攞盡1萬回贈嚟計Excel得出嚟嘅APR大概係2.02%(記住唔好信我,最好你自己都計吓),咁都好有競爭力喎!

喺呢度要戴多個頭盔先,理論歸理論,由於我睇唔到AEON CREDIT份Credit policy,亦已經無喺銀行Credit做好耐,AEON CREDIT嘅貸款要求比銀行多幾多彈性真係要實測一吓先知。

不過有一樣肯定嘅呢,就係呢類大型財務公司喺Distribution channel上比虛擬銀行同某啲傳統銀行上都係有優勢的,都係大家申請Tax loan時候要考慮嘅點。

【多間銀行加入稅貸戰搶商機 即睇邊間最多優惠:按此

講起O2O體驗,好多銀行都真係要努力追趕喇

「全程毋須露面」我諗已經成為咗大家對財務機構嘅要求,咁佢哋提供嘅Tax loan亦都當然要做到啦。

咁銀行又需唔需要大家露面呢?

咁無實體分行嘅虛擬銀行當然無問題,因為從頭到尾都無機會畀大家「露面」嘛!不過正正因為連露面嘅機會都無,大家有事想即刻攞到答案,或者啲文件有問題想攞去分行做Certified true copy都唔得,所以虛擬銀行喺理論上對貸款嘅審慎程度會比傳統銀行仲要高,因為我連想見吓你/你啲文件嘅機會都無嘛!

而傳統銀行就唔係間間喺E-channel上面都做得咁足,就算全程可以網上申請,最後都可能要大家落分行Show個身份證、或者畀番份文件正本畀分行職員核對一下先攞到錢,少少煩咁啦。

咁一綫財務公司喺呢方面當然做得好,我亦試玩咗一下AEON CREDIT tax loan個手機申請流程,核對身份證嗰部分感覺上同一眾虛擬銀行用嘅Solution非常相似,應該係用同一間技術供應商(唔開名喇),所以如果大家開到虛擬銀行戶口,要用AEON CREDIT呢個核對身份證嘅技術都應該無問題喇。

又到稅季,如果你之前喺銀行撞過壁,可以留意一吓財務機構嘅Tax loan喇

講咗咁多,最後都係借錢啫,邊個平啲、回贈多啲、網點多啲、申請方便啲嘅咪用邊個咯,最後都係錢啫係咪?所以如果你之前喺銀行碰過壁,可以留意一吓財務機構嘅Tax loan喇,記住要搵一綫嘅,同埋睇清所有條款細則喇。

講起方便,𠵱家仲有唔少銀行要求借款人一定要用佢間銀行嘅戶口嚟還錢,如果你無戶口仲要特登開一個,雖然大部分銀行已經無咗最低存款,唔使借1萬蚊畀佢罰番要放5,000蚊最低結餘入去,不過都有少少煩啦。

其實𠵱家既然都有FPS,無論跨行放款定收款嘅手續費都極低,銀行實在毋須要咁苛刻啦;反觀一綫財務公司就正因為佢哋從來都無存款戶口,就無得咁多要求,還款安排上合理好多咯。

最後無論係借貸定投資,記住量力而為,先預祝大家聖誕快樂啦!

 

【文章來源:華田銀行;已獲授權轉載。原題:銀行閑談 (151) — 又到稅季,點解AEON CREDIT 等一線財務機構值得大家考慮一下呢?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

開啟hket App,閱讀全文

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款