匯豐定滙豐? 從鈔票和支票說一下「滙豐」二字歷史

博客 17:29 2021/12/01

分享:

唔知大家有無留意滙豐銀行嘅正寫到底係「匯豐」定係「滙豐」呢?

    點擊圖片放大

如果我哋上HSBC嘅官網,就會發現無論係「外匯」定「匯率」,三點水都係寫喺入面,但係偏偏只有「滙豐」係將三點水寫喺出面的,幾有趣架。

今篇文會同大家講吓「滙豐」二字嘅歷史,搵番啲舊鈔票同舊支票,睇吓「滙豐」係幾時出現的,下次攞張銀紙出嚟畀錢嘅時候,不妨同朋友都分享吓呢段小歷史哦!

【曾規定職員做滿10年方可結婚 令呢間銀行有「毀婚銀行」綽號:按此

從「滙理」到「滙豐」,談「滙豐」二字的由來

香港1841年開埠,第一間開立嘅銀行就係「東藩匯理銀行」The Oriental Bank Corporation,早喺之前專欄就已經同大家介紹過呢間銀行嘅歷史喇。

繼東藩匯理之後,都有幾間外地銀行嚟到香港落腳,包括有利銀行、印度新金山中國匯理銀行 (即係之後嘅渣打)、法蘭西銀行、印度東方商業銀行等等,但一直要到1864年先有第一間喺香港註冊成立嘅銀行,最初名為「香港上海滙理銀行」 Hong Kong and Shanghai Banking Co. Ltd,即係之後我哋所認識嘅「滙豐銀行」喇。

從一啲滙豐嘅「前輩」可以得知,當時好多銀行都採用「匯理」二字,所以唔似而家你講「滙豐銀行」等於HSBC,150年前如果你講「匯理銀行」係無人知你講邊間「匯理銀行」的。

咁當時多數銀行係寫「匯理」定係「滙理」嘅呢?我搵咗一張1866年「東藩匯理銀行」嘅5蚊 銀紙畀大家望望。

    點擊圖片放大

喺銀紙左右兩端我哋都可以清楚見到1866年「東藩匯理銀行」嘅5蚊銀紙係寫「匯理」而非「滙理」,證明「匯」字係廣為接納的。

咁滙豐又點呢?我搵咗一張1870年代滙豐喺上海發行嘅紋銀壹兩鈔票,可以見到鈔票同時有舊名「香港上海滙理銀行」同新名「英商滙豐銀行」,幾有趣架!

    點擊圖片放大

包括馮邦彥先生嘅巨著《香港金融史1841–2017》在內嘅好多書籍都表示滙豐係喺1881年正式易名至「香港上海滙豐銀行」,但係根據上面呢張鈔票,就可以睇到「滙豐銀行」四字喺1870年代可能已經出現。

而「滙豐」二字嘅意思,一般都被認為由華人買辦古應春喺測算過筆劃吉凶之後建議嘅,有「滙款豐裕」嘅意思。

咁點解當「東藩匯理銀行」用緊「匯」字嘅時候,「香港上海滙理銀行」要用「滙」字呢?坊間講法係因為中國人相信水為財,而「滙」字水在外,比喻流動性較強,銀行做嘅係過河濕腳嘅生意(尤其是滙豐早期主要係做滙兌生意),「滙」就當然比「匯」要好。

不過以上都係坊間說法,點都好,透過上面呢張鈔票,大抵可以肯定當滙豐仲係叫做「滙理」嘅時候,嗰三點水就已經寫咗喺出面,咁再轉名做「滙豐」嗰陣,嗰三點水自然又會留番喺出面啦。

「滙豐」定「匯豐」有時候都唔係咁死的

雖然20世紀可以搵到由滙豐發行嘅鈔票,所有嘅「滙」字都係水在外嘅,有啲印刷品都係會有例外的。

參考鄭寶鴻先生著作《錢路漫漫:香港近代財經市場見聞錄》,就搵到一張1952年嘅支票,大家細心睇左邊嘅銀行名,可以見到係「匯豐」,三點水喺入面的哦!

    點擊圖片放大

我就翻查過由1900年開始可以搵到嘅滙豐銀行鈔票,都清一色將三點水寫喺外面,所以應該唔存在「1950年代滙豐決定將三點水寫番入去」嘅假設。

至於呢張支票到底點解會寫咗「匯豐銀行」,除咗其實「我唔太Care之外」我就諗唔到太多其他原因,即係話其實都唔係咁死嘅。

小小歷史冷知識,以前支票係要打稅的哦!

呢度都外插一個小小歷史冷知識,大家可以留意喺右上角日期嘅下面寫住「STAMP DUTY PAID」,以前嘅支票係要打印花稅的,1960年代所有支票都要打15仙印花稅,去到1970年代就大幅提升到5毫。

如果支票寫錯的話,印花稅係無得退的,連金管局陳總當年都話怕怕架!

    點擊圖片放大

咁我都搵咗一陣到底支票係幾時取消徵收印花嘅, 具體日子就搵唔到,不過我就搵咗幾張80年代嘅支票望吓,發現已經唔再搵到印花稅嘅蹤跡喇。

 

【文章來源:華田銀行;已獲授權轉載。原題:銀行閑談 (149) — 匯豐定滙豐?從鈔票和支票說一下「滙豐」二字歷史】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款