60年前的Mobile banking? 「流動銀行 1.0」係點嘅呢?

博客 16:10 2021/11/24

分享:

要數上任金管局總裁陳德霖嘅重要政績,就不得不提2015年底開始推出嘅流動分行服務,陳總當年仲用「流動分行.以客為本.普及金融」為題大讚「以商業原則經營的大原則下取得為客戶和社會認可的平衡」嘅銀行,仲親自出席咗唔少剪綵活動架。

【曾規定職員做滿10年方可結婚 令呢間銀行有「毀婚銀行」綽號:按此

當年渣打第一個率先響應,當然亦好醒咁出晒新聞稿同FB Post話自己係「全港首間流動分行」喇!不過,大家又知唔知原來香港第一間流動分行其實並唔係渣打嘅出品,並且至今已經有60年歷史咁耐呢?

    點擊圖片放大

「流動銀行1.0」來喺1961年已經有喇!

睇番HSBC嘅官方記錄,原來早喺1961年滙豐已經推出咗「流動銀行1.0」,專門去一啲新界嘅偏遠地區提供基礎銀行服務,例如下圖嘅錦田就係選點之一,情況同𠵱家都好類似喎!

    點擊圖片放大

講緊幾十年前,當開個戶口都唔係咁容易嘅時候,銀行服務都真係幾窩心架,例如我就聽過分行老前輩話,以前老客戶生日分行會派人出席壽宴,老客戶病危或者有咩緊急事情又會提供上門服務,係真係好Friend的,咁當然𠵱家就只能公事公辦,一切都俱往矣喇。

講番呢架流動銀行車,根據鄭寶鴻先生嘅著作《錢路漫漫—香港近代財經市場見聞錄》所描述,流動銀行總共有4名員工:身兼駕駛工作嘅主管1名、副手1名、持短槍護衛1名、持長槍護衛1名,都幾嚴陣以待架!

咁1961年就當然無5G畀大家即時傳送交易資料番總部啦,所以一律以無綫電同總行通訊,又因為冷氣不足,主管同副手喺60年前已經特准可以Casual wear恤衫、短褲、拖鞋開工,係咪好前衛先!

咁流動銀行會去邊呢?答案係星期一至六,輪流服務慈雲山、西貢、沙田、錦田等地,呼,𠵱家都好難再幻想60年前仲係「偏遠地帶」嘅沙田火車站咯!

    點擊圖片放大

之後喺1960年代,滙豐一改其「崖岸自高」嘅經營策略,開始喺全港各地大量開設分行,流動銀行就喺1970年左右被取消喇。

流動銀行,何去何從?

繼渣打喺2015年推出流動銀行之後,滙豐同恒生分別喺2016同2018年跟隨,而另一發鈔行中銀就一直都無推出流動車,服務缺口大多以Virtual Teller Machine應付,至於其他銀行就當然無動靜啦!

我諗流動銀行2.0再次進入歷史都只係時間嘅問題喇,隨着Mobile banking同流動網絡嘅發展(10年前朋友Send段片畀你,你又點會喺條街度Download?),實體分行都買少見少下,流動分行都唔會再有存在嘅必要啦。

我成日都話,香港1978年開始實行9年免費強制教育,現時55歲以下香港出世嘅香港人已經極少低於中三學歷,雖然未必英文好流利,玩手機亦未必好叻,不過最少具備流暢中文閱讀能力,只要APP介面足夠清晰易明,已經具備用Mobile banking自助理財嘅能力。

再過多10年,就即係連攞長者卡嘅一群都已經最少有中三學歷,到時就已經唔需要再問「流動分行何去何從」,而應該要問「分行何去何從」喇。

 

【文章來源:華田銀行;已獲授權轉載。原題:銀行閑談 (148) — 香港第一架流動銀行車原來已經有 60 年歷史!?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款