【虛擬銀行】虛銀保安拍得住傳統銀行! 登入交易2方面睇吓你嘅銀行有無做足

個人增值 17:15 2021/11/16

分享:

當交易出現,你嘅銀行有無立刻提示你呢?

講完「登入」就到「交易」喇,呢度就要分3方面講,分別係「交易前風險控制」、「交易中授權監控」、「交易後客戶提示」,無諗過咁複雜呢?

銀行衡量戶口被盜用嘅風險時候,唔單會睇發生事件嘅次數,仲會睇番事件引致嘅損失有幾大。以Mox為例,佢哋就有唔同措施去幫客戶喺盜用/疑似盜用事件發生時立刻將損失減到最低,呢啲「交易前風險控制」包括:

  • App鎖卡功能,等大家喺懷疑唔見咗支付卡嘅時候即刻停止損失
  • App交易限額設定,仲細分做付款、本地提款、海外提款3個部分,等大家就算支付卡被盜用都將損失減到最低
  • App可以即時更改Mox Card密碼,令大家可以喺懷疑密碼外洩下可以即刻更改密碼
  • 無號碼卡,令大家就算Mox Card被偷,都唔會知道大家嘅支付卡號碼,咁就無辦法做到網上消費喇

講完「交易前風險控制」,跟住就到「交易中授權監控」,呢個就間間銀行都會做,銀行會監察好多嘢㗎!

    點擊圖片放大

雖然只係草草一句「全天候偵測」,但一班銀行員工就喺背後做咗好多嘢,幫大家睇實唔同嘅風險,例如交易係咪可疑、戶口會唔會畀人盜用,保障大家同時亦保障銀行自己啦!

最後就係「交易後客戶提示」,呢個好多人都會講句「有咩用?都偷咗咯,搞掂先話我知?」。

此言差矣,正如頭先所講「銀行衡量戶口盜用嘅風險時候,唔單會睇發生事件嘅次數,仲會睇番事件引致嘅損失有幾大」,仲會睇吓可唔可以防止「損失擴大」。

銀行有咩好方法呢?就係不斷話畀客戶知道啱啱戶口有郁動咯!其中最重要嘅就包括「交易後嘅訊息提示」同埋「保安相關嘅異動訊息提示」喇。

以Mox為例,每次用Mox Card作綫下或綫上消費我都會收到手機推送提示,確保真係我用過張卡:

    點擊圖片放大

亦會透過多過一個渠道話我知個交易成功,例如萬一我手機被偷,仲要被成功登入,我都會透過電郵發現有異動啦。

    點擊圖片放大

當然唔少得保安相關嘅異動,例如將戶口綁定至新裝置嘅時候,SMS同電郵都會收到相關提示,話你知你正準備綁定至新一個新裝置,如果呢個唔係你的話,你就可以馬上通知銀行喇。

    點擊圖片放大

你嘅銀行喺「交易前風險控制」(包括App鎖卡功能、App交易限額設定、App更改支付卡密碼、無號碼卡)、「交易中授權監控」(呢個就好多行家都做得好足嘅)同「交易後客戶提示」(包括多渠道交易提示、轉帳提示、保安異動提示)有無做足工夫呢?

如果有齊的話,加上大家善用銀行提供嘅保安功能,喺「交易」方面大家都唔使太擔心,就算有不幸嘅事件,損失都可以大大減低喇。

【9招反制偽冒銀行釣魚短訊:按此

虛擬銀行「登入」同「交易」安唔安全呢?點樣揀會比較精明呢?

今篇介紹咗銀行一啲Good performer喺「登入」同「交易」為客戶做嘅保障措施,其實以上所有措施真係無分虛擬銀行定實體銀行,所以唔好有咩迷思話虛擬銀行保安一定做得比較差喇!

小小個人分享,我自己雖然只有3個月做Security嘅經驗,就已經經手過兩單極度無必要嘅偷錢Case,分別係阿爸寫咗個密碼喺雪櫃,跟住畀偷入屋嘅賊偷埋張卡再轉走晒啲錢,同埋阿媽Share咗個密碼畀「阿仔」,跟住阿仔好生性咁入咗e-banking再轉走晒啲錢,你話係咪好無謂呢?

所以無論銀行做咩都好,第一步大家都要先好好保護自己嘅帳戶名、密碼、仲有你部電話呀!有咩可疑事件發生,唔好等,即刻通知銀行喇!

銀行在「登入」方面保安做得夠唔夠?請按【上一頁

 

【文章來源:華田銀行;已獲授權轉載。原題:銀行閑談 (147) — 虛擬銀行「登入」同「交易」安唔安全呢?點樣揀會比較精明呢?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款