滙豐系內信用卡大比拼 EveryMile卡值得申請嗎?

博客 11:30 2021/11/10

分享:

分享:

繼續講呢張滙豐新上市嘅EveryMile卡。上期專欄回應咗無得飛嘅情況下,呢張主攻換Miles嘅信用卡到仲有無存在價值。咁我寫完上篇再寫中篇,就梗係認為呢張卡嘅基本回贈玩法仍然可以一戰,所以未睇嘅快啲睇番喇。

【無得飛換里數做乜? 滙豐EveryMile「申請的意義」:按此

雖然我認為呢張獨立嚟睇係用得過的,不過如果我已經有HSBC Visa Signature(+5X賞滋味)同Red Card的話,我仲有無需要再開埋呢張EveryMile卡呢?又或者可以問,既然我都已經有Visa Signature覆蓋餐飲,再有Red Card覆蓋網購,我仲無需要再開埋呢張EveryMile卡呢?

今篇會將呢張EveryMile卡放喺滙豐嘅信用卡大盤上面,分析一吓EveryMile卡喺旅遊優惠、基本回贈、特選商戶回贈3方面同Visa Signature同Red Card比較下表現又點喇!

TLDR:如果你會儲Miles,加你想免費用Lounge/會幫襯Starbucks/入油/用嚟代替八達通搭車,你就考慮入手啦

EveryMile卡3大Offer

成張EveryMile卡嘅Offer可以大致分做3類,分別係
1. 特選商戶$2 = 1 Mile;
2. 其他簽帳$5 = 1 Mile;
3. 好多人都忽略咗嘅旅遊優惠,包括Agoda 85折同埋(呢個幾好)免費機場Lounge一年6次!

仲有啲濕濕碎碎嘅Cathay App $3,000減$300、免費旅遊保險同Visa禮賓服務我就唔花篇幅講喇。

    點擊圖片放大

呢3大Offer到底Visa Signature同Red Card有無覆蓋到呢?回贈率嘅比較又如何呢?等我由第3點旅遊優惠開始講起啦。

旅遊優惠:其實Visa Signature都唔係免費用機場Lounge,不過EveryMile反而有喎

謎之音一句,今篇內容大致唔會離開滙豐個信用卡大盤,所以唔好話我係打手,點解呢?因為我比極都係呢3張卡比來比去,如果EveryMile完敗,代表呢張嘢係多餘的;如果EveryMile完勝,代表本身個卡盤有不足之處,所以我唔單止唔係打手,仲要係嚟踩台的,所以請各位高抬貴手好喇。

返嚟正題,喺個旅遊優惠入面,最吸引應該係可以最多一年免費使用6次「香港及海外指定」環亞機場貴賓室,呢個遠遠勁過Visa Signature嘅消費滿$1,500可以免費使用「香港」環亞機場貴賓室一次嘅優惠咯!

    點擊圖片放大

咁「指定」又有幾指定呢?都有唔少地方,包括台北、倫敦、多倫多、伊斯坦堡、雅加達、吉隆坡、墨爾本等等,不過就無香港人最鍾意去嘅泰國同日本,點解呢?

    點擊圖片放大

無咩點解,環亞本身就無覆蓋呢2個國家,不過呢個當然唔係藉口啦!滙豐大可以搵間喺泰國同日本有Lounge嘅公司合作加嘛!不過個事實就係環亞無日本同泰國咯。

所以單睇機場Lounge呢個位,EveryMile係比Visa Signature出色嘅。

至於Agoda 85折,Visa Signature就呢一刻都做緊呢個優惠,加上Agoda無時無刻都做緊折的,差在同邊間銀行做咁解,所以呢樣就真係無咩好提咯。

所以小結係:

Visa Signature真係做得比EveryMile差呀!(踩台Mode,OK?)

其他簽帳$5=1 Mile,呢個真係唔好睇少,滙豐今次係好大手筆的

當大家注意力去晒特選商戶$2=1 Mile,我就覺得呢個$5=1 Mile仲震撼,因為呢個係超重量級嘅回贈計劃,仲要係完勝Visa Signature同Red Card的。

我明$5=1 Mile對大家無咩吸引力,但係如果大家比較一下Visa Signature同Red Card對於「其他消費類別」嘅回贈處理,就會見到今次滙豐係好大手筆的。

  • Visa Signature:如果消費跌唔中5大最紅自主獎賞(賞世界、賞滋味、賞生活、賞家居、賞品味)之中任何一個,只會有基本回贈1倍,即係0.4%; 如果跌得中5大最紅自主獎賞,就多3倍,即係合共1.6%;再跌得中最紅自主獎賞,就最高額外5倍,即係合共3.6%
     
  • Red Card:如果唔係網購(4%)或超市消費(2%),只會有基本回贈1%

而EveryMile卡嘅$5=1 Mile係咩意思呢?

  • EveryMile卡每$100消費會有20 Mile,以一般銀行價$1可以換到12-15 Miles計算,滙豐成本係$1.33–$1.67,即係話滙豐其實做緊所有消費1.33%-1.67%回贈;除非滙豐可以同AsiaMiles傾到佢肯用$1=20 Miles賣畀佢(而我覺得唔大可能),否則滙豐喺EveryMile上面嘅基本回贈一定會比Visa Signature(0.4%)同Red Card(1%)高。

呢件看似大家唔關心嘅事其實係一件大事,牽涉到滙豐對成個卡盤嘅諗法,亦為「信用卡換Miles」寫下咗香港銀行史嘅新一頁,詳情我會另寫新文分享。

所以小結係:

Red Card同Visa Signature啲基本回贈做得真係差咯~

EveryMile回贈優惠又係點?請按【下一頁

 

【文章來源:華田銀行;已獲授權轉載。原題:銀行閑談 (145) — 匯豐 EveryMile卡 (中篇) — 有 Visa Signature 同 Red Card 仲有無需要申請呢張卡呢?】

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款