無得飛換里數做乜? 滙豐EveryMile「申請的意義」

個人增值 19:15 2021/11/02

分享:

分享:

回應3:其實唔換Miles,Keep番RC都得個喎!大家有無留意呢?

其實呢,呢張EveryMile卡係可以唔換Miles的;或者精準啲講,大家係可以睇住個環球飛行情況嚟決定要唔要換Miles,因為呢張卡其實係先賺Reward Cash(RC),再自行將RC轉做Miles的!

呢度就要講吓滙豐近年嘅「信用卡獎賞消費機制」(行內Jargon叫Burning system,相對於賺分機制Earning system)啦。

    點擊圖片放大

滙豐嘅玩法一直唔似渣打咁直接外判整個Reward system畀Asia Miles。

渣打Cathay卡嘅玩法係客戶嘅消費獎賞直接以Miles呈現,而無經過過甚麼SC Dollar一類獎賞貨幣。因為一開始Earning已經係AsiaMiles,又因為AsiaMiles係一個渣打以外嘅獨立平台,所有Burning嘅動作不論係換機票、換禮品定慈善捐款,都已經同渣打無關係了。

其實唔單止係Cathay卡,渣打連開戶口、做定期等等嘅基礎銀行服務都會用AsiaMiles作為獎勵貨幣,始終維護Burning system都要成本,Outsource個工作畀AsiaMiles一類嘅獎勵平台,可能係一個渣打、AsiaMiles同客戶都開心嘅做法。

相反滙豐就一直有維繫住自己嘅Burning system,無論大家用咩信用卡嚟消費,所有嘅獎勵都會先以滙豐嘅自家獎賞貨幣Reward Cash(RC)呈現,然後以Reward+作為Burning platform開放唔同渠道畀客戶去Burn啲RC,除咗AsiaMiles,仲有百佳易賞錢、直接對冲卡數、換禮品、快閃兌換指定商戶等等多個選項畀客戶選擇。

    點擊圖片放大

呢張EveryMile雖然係主打換Miles,但係佢並無離開過RC同Reward+所構建嘅系統。

以宣傳得最勁嘅本地交通出行、咖啡店及輕食、網上娛樂平台2蚊=1 Mile為例,喺呢堆指定商戶消費首先會有2.5% RC回贈(而唔係Miles!),然後呢張卡入面嘅RC可以喺Reward+用特惠比率1RC=20 Miles去Burn(原比率係1RC=10 Miles)。

即係話每100蚊指定商戶消費先換2.5RC,然後2.5RC透過Reward+再換50 Miles,做到宣傳入面嘅2蚊=1 Mile。

    點擊圖片放大

講咗咁大堆理論,係要指出「你係可以唔換Miles的」,又或者係睇吓環球飛行情況先決定將唔將啲RC換做Miles咯。咁RC嘅有效期一般係1至2年(睇卡種,呢張未搵到),即係大家仲有時間決定要唔要換Miles。

呢度對比起渣打仲有個超大好處,就係大家可以根據大家需要幾多Miles嚟決定將幾多RC換成Miles而唔需要煩嗰啲「零頭」嘅問題,呢個好重要架,我畀你有14,999 Miles你話點處理好呢?(加錢咯,貴咯)

咁2.5%RC回贈又抵唔抵呢?以滙豐𠵱家兩張主卡嚟比較,Red Card網購有4%回贈;Visa Signature如果配合最紅獎賞放晒落賞滋味,咁食飯就有3.6%,咁樣比較2.5%就差啲嘅。

不過公平啲睇,2.5%都已經好癲,而其實Red Card同Visa Signature係包唔晒3大指定商戶類別(交通出行、咖啡店及輕食、網上娛樂平台)。

咦咦,乜唔係Red Card包網上消費,Visa Signature賞滋味包咖啡店咩?的確係包唔晒的,呢個就牽涉到呢張EveryMile卡喺整個滙豐信用卡大盤上面嘅定位問題,呢個就要留番下篇再講。

用Miles換禮品有幾唔抵?請按【上一頁

 

【文章來源:華田銀行;已獲授權轉載。原題:銀行閑談 (144) — 匯豐 EveryMile卡 (上篇) — 「無得飛換 Miles 嚟把 L 咩」】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款