無得飛換里數做乜? 滙豐EveryMile「申請的意義」

博客 19:15 2021/11/02

分享:

滙豐好耐無出新卡,對上一張旗艦卡Red Card已經係2019 Q3嘅事,都真係好耐咯,仲有上次個宣傳明顯無今次咁浩大,所以話滙豐今次真係隆重其事架!

今次呢張EveryMile卡暫時打算分3篇寫,中篇同下篇會講吓呢張卡着唔着數、有無誠意、有無霸氣、有咩歷史意義、張卡喺滙豐整個Card business嘅大盤上面嘅定位、滙豐又有咩願望等等,呢篇上篇就剩係想回應一個Point:

無得飛換Miles把鬼咩!

我見唔少網民甚至KOL都用「無得飛換Miles把鬼咩!」形容呢張主攻換Miles嘅新卡,係咯,「無得飛換Miles把鬼咩!」。

我諗可能嘅回應有3個啦,包括:

  • 1. 換Miles唔一定要飛㗎嘛(我覺得係唔成立的)
  • 2. 如果𠵱家開始玩,夠Miles都差唔多飛得返喇掛!?(我無水晶球知幾時開返關,不過我估大家唔會半年就攞到幾萬Miles掛?)
  • 3. 其實唔換Miles、Keep番RC都得個喎!(呢個Point係最有力的)

我諗如果換Miles係無意義的,一切都真係唔使討論落去,我畀100%回贈不過in津巴布韋幣就一切都係虛妄啦。

今篇就先講吓換Miles嘅意義吧。

回應1:換Miles唔一定要飛㗎嘛!咁你就真係太闊綽了

首先講一個唔太成立嘅回應:「換Miles唔一定要飛嘅,仲有好多嘢可以換嘅」!

的確Asia Miles喺重組番入Cathay之前已經轉型緊做一個Rewards platform,唔單止有機票換,仲可以換禮品、換演唱會、轉做其他平台積分、慈善捐款等等,至於個Conversion rate抵唔抵就……

用最公價嘅Apple Product比較一下:

    點擊圖片放大

如果大家喺AsiaMiles官網換價值1,499蚊嘅AirPods 3就盛惠45,930 Miles,即係大概30 Miles換1蚊,以一般銀行成本價1蚊可以買到10至12 Miles計算,30 Miles嘅成本係2.5蚊至3蚊,即係話你每換1蚊價值嘅禮品,AsiaMiles就食咗1.5蚊至2蚊,咁你話用Miles換禮品係咪好傻呢?

    點擊圖片放大

如果從回贈角度睇,用渣打張Cathay卡(即係AsiaMiles卡咯)食飯4蚊換1 Mile計算,100蚊食飯換到25 Miles,但係25 Miles用嚟換禮物的話,就連1蚊都換唔番(30 Miles對1蚊嘛!),即係張Cathay卡嘅實際回贈連1%都做唔到,只能說用Miles換禮品真係好傻咯。

結論係如果你用Miles唔係用嚟飛而係換禮品的話,你就真係太闊綽喇!

回應2:儲Miles都要時間,搞得嚟差唔多飛得返喇掛?

如果大家無玩開Miles,𠵱家先開始玩都的確要少少時間,短則平民艙飛台灣要15,000 Miles、中則飛日本要30,000 Miles、長則飛歐洲要60,000 Miles,喺唔瘋狂玩迎新下,正正經經玩Card feature去台灣都要消費返幾萬蚊先啦。

例如呢張EveryMile卡最搶眼球嘅咖啡店消費2蚊=1 Mile,你都要飲30,000元Starbucks先成到事,就算日日扮藝文青43蚊一杯,1年都「只係」15,695蚊,都未夠飛台灣呀。

    點擊圖片放大

加上我成日都話,玩得Miles就唔係望平民艙飛台灣啦,香港飛台北喺疫情前係全球最繁忙國際航綫(沒有之一),飛機之多、機票之平實在毋須苦苦飲30,000蚊Starbucks換啦!

咁換咩好呢?要換就至少換香港飛東京商務艙啦!原因同數學喺之前專欄已經寫過,大家可以去下面條Link睇番哦。

【滙豐信用卡換里數好着數? 識玩應該點樣玩?:按此

雖然香港飛東京商務艙計回贈率就好抵嘅(用HSBC VS的話係10%+!),不過就要足足50,000 Miles,我同田太兩個人去就要足足100,000 Miles,勉強兩三年一次啦吓。

    點擊圖片放大

我就無水晶球知道兩三年之後咩光景啦,邊個又說得準呢?不過,我估等兩三年之後情況應該有變喇掛?仲有呢,近年AsiaMiles改咗少少玩法,只要你個戶口Keep住有動作啲Miles就唔會過期,所以之前嗰啲「唔夠時間儲夠60,000 Miles飛歐洲」嘅挑戰唔成立㗎喇。

喺1)儲Miles都要時間、同2)Miles可以不斷延期下,我覺得「搞得嚟差唔多飛得」都算勉強合格回應到「無得飛換Miles把鬼咩!」嘅挑戰吧。

唔想換Miles可以點?請按【下一頁

 

【文章來源:華田銀行;已獲授權轉載。原題:銀行閑談 (144) — 匯豐 EveryMile卡 (上篇) — 「無得飛換 Miles 嚟把 L 咩」】

開啟hket App,閱讀全文

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款