「〤〇」等於幾多錢? 花碼你又睇唔睇得明?

博客 12:55 2021/10/26

分享:

講起花碼,我諗90後好可能唔知我講乜;80後就可能只會答:小學好似有教過;60、70後就可能會:話「小巴」價錢牌見過;50後就可能會話:好好耐無見過,𠵱家唔知仲識唔識睇咯!

    點擊圖片放大

其實,有好長一段時間,花碼係每個香港人日常生活嘅一部份。

花碼點睇呢?有咩證據證明花碼曾幾係香港人生活嘅一部份呢?點解要用花碼而唔用阿拉伯數字呢?今日銀行閒談就同大家傾吓「花碼」喇!

    點擊圖片放大

花碼點樣睇呢?

花碼其實一啲都唔複雜,整個花碼可以分做上下兩個部分,用下圖做一個例子:花碼上半部係數字,例如呢度「〤〇〢二」代表4022;花碼下半部係量值,「十元」代表「4」係由「十位」起計,「元」就係「dollar」咯,所以呢個花碼就代表40.22元喇!

    點擊圖片放大

畀個多例子,下圖蓮香居嘅「金菇粟米羮」賣幾錢一份呢?答案就係85蚊喇!

    點擊圖片放大

點解要寫花碼呢?

點解要寫花碼,而唔寫阿拉伯數目字呢?呢度有歷史亦有實用原因喇。

講實用層面,如果我哋要標示40.22元,「〤〇〢二 十元」其實要比「四十二元二角二分」要簡明易用,花碼採取十進制記數法,明顯對讀寫雙方都係好嘅選擇。

咁大家會即刻問,咁點解唔寫「40.22元」或者「$40.22」?呢個就同歷史有關,一直寫花碼嘅原因好可能係因為「慣咗」,香港開埠初年根本無人識阿拉伯數目字,全部都係用「花碼」標示價錢,呢個習慣就一路流落去咯。

呢個習慣一路沿用到香港1960至70年代,當時仲大把會寫會睇花碼的,而隨住香港教育普及(1971年開始六年免費教育、80年開始9年免費強迫教育),阿拉伯數字就變得普及,香港嘅小巴花碼牌亦喺80年代開始被阿拉伯數字牌取代。

畀兩張古舊收據大家睇吓,留意寫銀碼嘅方法哦!

    點擊圖片放大

以上嘅「三十五年」係指民國三十五年(即係公元1946年,係吖,當時香港人係用民國幾多年做年號的)先施嘅服裝發票,馬褂、長夾衲、大襟衫褲合共4套連工包料603元,用嘅當然係花碼喇。btws,都幾貴個喎,603蚊係足足係當時一個巴士司機3個幾月人工!

    點擊圖片放大

而以上就係1964年德利米行嘅新界絲苗發單,大家可以留意無論係價錢定係重量都係用花碼嚟標示的,亦好有趣地電話會用中文數字由右至左寫一次、再用阿拉數字由左至右寫一次的。

Btws,又岔開一句,當年新界絲苗其實好出名,出名到係會出口去美國的,不過後來戰後大量移民湧入,本港喺人口劇增下,港英政府先後引入廣州油粘米同越南米,新界絲苗先至息微。

【香港第一間銀行係邊間呢? 𠵱家又去咗邊呢?:按此

咁點解𠵱家仲寫花碼呢?

咁寫花碼除咗有「古老當時興」嘅玩味之外呢,其實仲有一個非常實用嘅用途,就係「靚」喇!

當中文直寫嘅時候,大家覺唔覺得突然插個阿拉伯數字落去,美感總係差咁少少咁呢?

美感就好個人嘅,潮流興保育,如果呢套香港人用咗過百年嘅記數系統咁就從此消失,我會覺得有少少可惜咁咯。

 

【文章來源:華田銀行;已獲授權轉載。原題:銀行閑談 (143) — 花碼你又會看嗎?你知道曾幾何時花碼先係主流嗎?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款