香港第一間銀行係邊間呢? 𠵱家又去咗邊呢?

博客 18:25 2021/10/05

分享:

大家都知道現代銀行係西方嘅產品,咁香港自1841年開埠之後,過咗幾耐先有第一間嘅銀行呢?佢又叫咩名呢?背景又係乜嘢呢?今篇同大家銀行閒談一吓喇!

【在長崎遇上百年滙豐:按此

香港第一間銀行叫咩名呢?

喺1845年,一間當時總部位於印度叫「東藩匯理銀行」(Oriental Bank Corporation)嚟到香港,香港嘅現代銀行史咁就開始咗喇。

    點擊圖片放大

東藩匯理銀行1842年喺印度孟買成立,開始嘅時候叫Bank of Western India,1845年將總部搬至倫敦,改名做Oriental Bank,並喺4月喺先後喺香港德己立街同廣州設立分支機構,成為最先進入香港同中國大陸口岸嘅外商銀行。

除咗香港同廣州,喺斯里蘭卡首都科倫波、印度東部加爾各答、上海、新加玻、福州、墨爾本、悉尼、奧克蘭、威靈頓、神戶、橫濱、三藩市等地都可以搵到呢間銀行,唯一分別係銀行個中文名喺唔同地方可能會稍有不同,例如香港叫金寶銀行、福州叫東藩滙兌銀行,上海叫麗如銀行。

Oriental Bank喺1850年收購咗Bank of Ceylon(即係錫蘭銀行,錫蘭紅茶嗰個錫蘭,即係斯里蘭卡咯),並喺1851年改名做Oriental Bank Corporation,亦有份埋下之後悲慘收場嘅伏綫。

講返香港,呢間Oriental Bank都幾威的,除咗係香港第一間銀行,亦係香港第一間發鈔銀行,早喺1845或46年已經印製第一批鈔票,到1851年攞到皇家發行港鈔嘅特許狀(係吖,頭幾年無皇室批准都敢印鈔,係咪好威先),到1857年成為受香港政府庫房接納支付政府費嘅合法貨幣,即係政府都認佢咯。

不妨欣賞吓以下呢張銀紙啦。

    點擊圖片放大

根據馮邦彥教授嘅著作,Oriental Bank作為香港首要銀行達20年咁耐,到業務喺1860至1870年代達至頂峰,連當時喺香港已經開業多年嘅滙豐同渣打都完全唔係對手;如果引用Stuart Muirhead嘅講法,當時嘅Oriental Bank係「Most powerful, oldest, and most prestigious Eastern exchange bank」,都幾勁架。

【曾規定職員做滿10年方可結婚 令呢間銀行有「毀婚銀行」綽號:按此

呢間銀行去咗邊?

我幾肯定地球上面經已無人親身接觸過呢間銀行,因為間銀行喺1884年5月經已清咗盤,原因係當年向斯里蘭卡咖啡農(記唔記得話佢收購咗Bank of Ceylon?)同毛里裘斯嘅糖農批出咗大量貸款,但係當年咖啡同糖大規模失收,喺債仔無力償還貸款下周轉不靈要宣布破產收場咯。

之後創辦人W. W. Cangia成立咗新麗如銀行(New Oriental Bank),總行仍然設喺倫敦,但係眾多競爭對手包括滙豐同渣打嘅夾擊下,1892年宣布結業,年底更將上海分行營業大樓賣埋畀渣打銀行嘅前身「麥加利銀行」。

由1845年進入香港計算,只係經歷咗47年,呢間香港第一間銀行就永遠走入歷史檔案入面喇。

 

【文章來源:華田銀行;已獲授權轉載。原題:銀行閑談 (139) — 香港第一間銀行係邊間呢?佢又喺邊一年創立既呢?而家又去咗邊呢?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款