【虛擬銀行】Mox開業一周年優惠 1%活期息定純黑金屬卡吸引你?

個人增值 17:26 2021/09/29

分享:

儲蓄、消費、借貸各方面做咗幾多生意呢?

着數講完,返嚟講番啲嚴肅嘢。

要了解一間銀行嘅經營情況,單係睇報表係睇唔到幾多嘢的,簡單如有幾多客人就已經未必睇到喇。

Mox喺佢哋一周年嘅新聞稿就放咗一啲有關儲蓄、消費、借貸嘅數據出嚟,今日攞嚟同大家討論吓喇。

喺儲蓄方面,Mox上客數已經超過16萬,存款額接近56億。呢個數其實都唔細,根據我嘅認知,香港有好幾間中小型銀行嘅Deposit customer數目大概係40萬至80萬,即係話Mox用一年時間做到一間中小型銀行20至40%嘅客量,人均存款做到35,000蚊,都算唔錯嘅成績。

喺消費方面,Mox Card嘅總消費額接近20億,使用量接近600萬次,即係平均每筆消費333蚊,平均每名客戶消費37.5次,如果假設客量喺過去1年係前綫平均上升的話,有效客戶嘅每月平均消費去到6.25次,咁都幾犀利,證明Mox Card嘅Share of Wallet都做得唔錯。

喺高回贈策略下,Mox向客戶派出超過2,500萬現金回贈,以20億消費額計算,回贈額係1.25%,非常貼近基本回贈率1%,證明Mox成功透過指定商戶嘅高回贈,爭取到客戶喺其他低回贈嘅商戶消費,策略算係成功喇!

【一次性手續費 vs 每月手續費 消費分期「一次性手續費」真係着數啲?:按此

喺借貸方面,超過9萬名客戶已經申請Mox Credit,80%係Straight-through process而唔需要提交額外文件,平均7秒就有第一次申請結果,呢個同我之前嘅實測好接近喇!

總批出嘅信用額超過30億,假設有70%客人成功攞到Mox Credit,咁個平均信貸額就大約5萬 ;不過「信貸額」就唔代表「實際信貸量」,後者Mox今次未有透露,睇嚟都要等睇報表先會知道更多喇。

Mox未來發展又如何?

Mox亦都有透露嚟緊嘅Product pipeline,話佢哋有40%至45%客人希望有外幣兌換、股票交易、出糧戶口服務。

其實之前Mox喺出咗Card instalment loan之後,成個Credit card服務都可以話係「齊晒章」,可以將精力放喺其他產品喇。

新聞稿咁樣寫得,我諗Mox下一步會傾向再多做一啲基礎銀行服務,進一步穩固客戶忠誠,而無好似其他同行咁要快快「割韭菜」式地推出財富管理服務,睇嚟集團嘅目光唔淨止放喺未來1年咁短喇。

Mox一周年小總結

今篇同大家實測咗Mox嘅生日優惠,我覺得玩法上難度算係中至低啦,知道大家對「金屬卡」同「1%利率」都很想要嘅情況下,做出咗一啲令大家都開心嘅回應(銀行始終唔係善堂嘛),你好我好咁啦。

營業數據上就睇到Mox成個發展都做得唔錯,存款、支付、貸款三頭馬車都有一定嘅客量同忠誠度。我希望其他銀行都可以出多啲數據畀大家了解更多啦。

至於未來發展上,Mox就話客人想快啲有外幣交易、股票交易同埋出糧戶口服務,睇嚟Mox會傾向先進一步加強基礎銀行服務嘅配套,未急住馬上循財富管理嗰邊增加收入喇。

 

Mox開業一周年有咩優惠吸客?請按【上一頁

 

【文章來源:華田銀行;已獲授權轉載。原題:銀行閑談 (140) — Mox 開業一周年,儲蓄、消費、借貸各方面做咗幾多生意呢?有咩生日優惠值得大家留意呢?未來發展又會係點呢?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款