【虛擬銀行】Mox純黑金屬卡有幾重? 有張卡仲重過佢20%!

博客 12:20 2021/09/21

分享:

Mox可能都知大家鍾意佢張「純黑金屬卡」,所以趁住開業一周年搞咗個MGM大抽獎,𠵱家叫親朋戚友開Mox戶口就有機會贏到喇!呢張值唔值得收藏呢?華田喺上年佢開業第11日,就已經成功入手咗呢張卡同大家開箱,心大心細唔知張卡正唔正,大家可以睇返下面呢一篇文章。

【首批限量3,000張!虛銀Mox不銹鋼黑卡開箱(有片):按此

不過我再睇返成篇文,好似講漏咗一樣嘢,就係其實張卡有幾重呢?金屬卡喎!又或者應該問,佢比正常信用卡要重幾多倍呢?如果大家中唔到個抽獎,但係又想開返張「墜手」金屬卡,甚至要仲要威過(重過)Mox卡嘅,又有咩選擇呢?今篇就同大家介紹返喇!

一般銀行卡有幾重呢?先嚟睇吓WeLab同ZA啦!

無比較就唔知邊個好嘛,首先嚟睇吓一般嘅銀行卡有幾重先!

首先望吓WeLab Bank張閃閃卡。

    點擊圖片放大

先唔好理個電子磅上面嘅墨跡,原來一張銀行卡只有5克重,我之前亦踩過WeLab Bank張閃閃卡呢一點,我當時係咁樣寫的……

呢張卡仔嘅質感真係好差,雖然佢同MOX嘅設計圖一樣都係閃令令的,但係MOX聲稱係用不鏽鋼,呢張係膠片,仲要唔係厚重嘅「硬膠片」,而係一片薄痴痴嘅「軟膠片」……

至於玩自選號碼嘅ZA綠閃卡又有幾重呢?一齊睇吓……

    點擊圖片放大

原來仲要重過WeLab 1克咁多,不過呢個可能係個電子磅嘅Rounding error,我手感上就覺得差唔多,咁不如打和,Super啦!

我自己都攞咗我手上嗰100張仲用緊或者已經報廢嘅銀行卡,全部重量都係5克至7克左右,我估我哋可以大膽假設正常Plastic嘅重量就係5克至7克喇。

咁Mox張純黑金屬卡又有幾重呢?

Mox純黑金屬卡係正常銀行卡嘅幾多倍重呢?

攞個電子磅出嚟先……

    點擊圖片放大

答案係14克,即係接近一張正常銀行卡3倍咁重吖!

我仲記得我第一次攞呢張Mox純黑金屬卡上手嘅時候,第一個感覺就係「哇,真係好墜手喎!」,除咗因為重量之外,我諗同個密度都好有關係。

問大家一條IQ題,一斤鐵同一斤綿花,邊一樣重啲呢?答案係一樣重,因為都係一斤嘛!但係我哋嘅直覺就係一斤鐵重,因為同樣都係一斤,鐵嘅體積比較細,我哋個腦就自然覺得佢要重一點。

同一道理,我將3張正常銀行放喺左手,再將張Mox純黑金屬卡放喺右手,我一樣覺得張金屬卡墜手啲咯。

金屬卡,很想要吧

可能睇到呢度,唔少網友都會有種「很想要吧」嘅感覺,可惜我都Share唔到我張卡畀大家,除咗等大抽獎,仲有咩方法攞到金屬卡呢?

有的,例如之前介紹嘅德國虛擬銀行N26就有金屬卡可以攞,不過香港應該好難申請到。

【德國虛銀N26 Bank有咩特別? 香港呢間虛銀都有佢嘅影子:按此

    點擊圖片放大

不過我手上有另外一張,仲要比Mox純黑金屬卡重多20%,而且應該仲申請到嘅,一齊睇吓佢有幾重先!

CRO卡真係超超超墜手,淨係收藏已經好正

呢張卡係Crypto.com同Visa合作嘅一張Prepaid card(即係類似Debit card啦),咁叫得Crypto.com當然係做加密貨幣生意,呢張卡亦係Visa喺亞洲第一張同加密貨幣有關嘅Prepaid card,而最重要係呢張卡係大家都可以申請的!

    點擊圖片放大

咁由於我無收佢廣告錢啦,我贊唔贊成投資/投機加密貨幣、呢間Exchange好唔好、穩唔穩陣、回贈抵唔抵、嗰啲免費Spotify/Netflix 正唔正、點申請、有咩優惠碼等等我就全部唔評論喇。

今篇只係想講一個Hard fact,就係呢張Crypto.com出嘅CRO卡真係好重,仲要質感真係好好好好好正!搞到我從來都唔用佢嚟消費,都要放喺銀包得閒攞嚟曬吓咯!

我諗單講重量,大家可能覺得17克 vs 14克分別唔太大,但其實重咗超過20%喇!再者個質感係好唔一樣的,先畀張圖大家睇睇:

    點擊圖片放大

上面嗰張係Mox,下面係CRO,論總厚度可能差唔多,但係大家可以細心睇:上面Mox嘅結構係中間一層金屬,上下再用塑膠包住;而下面CRO就係背面係塑膠,正面係原塊金屬!

所以同樣將2張卡攞上手,Mox仍然有一種「塑膠感」,因為大家仍然要隔住塑膠去感受金屬嘅重量同硬度;但係CRO就真係好有「金屬感」,因為大家係直接摸到塊金屬,質感當然好唔同!

亦因為咁,2張卡雖然總厚度差唔多,CRO要用比較多嘅金屬,就當然會更重啦!

所以如果大家想攞張有型金屬卡傍吓身,不妨考慮吓呢張。

 

【文章來源:華田銀行;已獲授權轉載。原題:銀行閑談 (138) — Mox 純黑金屬卡有幾重呢?CRO Card 原來比佢仲要重多 20% !?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

 

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版