【虛擬銀行】Mox消費分期有驚喜 解決咗一個好多人都面對緊嘅問題!

博客 14:10 2021/08/31

分享:

早前專欄花咗唔少篇幅講喺信用卡利息收入極為疲弱嘅情況下,「消費分期」喺零售銀行由雞肋變成主菜嘅經過,同埋介紹咗各銀行喺「消費分期」上面花嘅心思。

【識買又識Pay Later BNPL如何解救內憂外患信用卡業務:按此

睇返香港現時8間虛銀,Mox作為少數以消費信貸作為主調嘅虛銀代表,早喺今年4月已經推出第一隻信用卡產品Mox Credit,明顯唔會只甘於收取微薄嘅簽帳手續費收入(根本唔可能計得掂條數哦),而會希望進一步染指「消費分期」呢碟主菜。

等咗3個月,Mox終於喺7月尾推出「消費分期」,整體上成隻Product我係好滿意的:喺「申請時間點」上誠意十足、申請過程流暢、收費清晰易明、申請後要翻查記錄亦十分容易,繼續合乎我對Mox一貫嘅期望。

    點擊圖片放大

「申請時間點」誠意十足,剩係呢個已經要讚

我諗Mox喺2021年畀我最大嘅感覺,就係產品細節上顯得好有誠意,好似之前嘅文章都有提及,Mox將Debit Card轉換成Credit Card嘅好多細節上做得非常仔細,今次呢隻Mox「簽帳分期」都唔例外。

首先,Mox喺Entry Point上面用咗渣打嘅套路,喺每筆合資格分期嘅簽帳下面加入咗申請嘅按鈕,呢度大家可以留意吓我以下呢筆Foodpanda嘅簽帳,係處於Pending狀態,即係話連商戶未清機嘅交易Mox都可以畀大家做到分期!

    點擊圖片放大

呢度可能一般市民未必好留意,其實喺每筆簽帳之後,銀行係唔會馬上過數畀商戶,而會等到日終商戶進行結算(Settle,俗稱清機)先會由收卡行集齊整日嘅訊息,再發畀唔同發卡行收錢,之後商戶先會再收到錢,即係話喺「簽帳」同「結算」中間嘅時間,交易其實並未真正進行,大家嘅信用額只係被暫時「扣起」,類似大家喺酒店Check-in畀按金咁啦。

【消費分期點解會成為信用卡救兵? 用3間銀行例子話你知:按此

所以有唔少銀行喺交易尚未結算之前,係唔容許大家申請簽帳分期的,一來交易未真正生效,二來喺未結算情況下,客戶或者商戶要退貨或者更改交易細節都相對容易,之後如果要改更已落實嘅消費分期就會令銀行做多好多工夫。

好記得我好多年前做Credit card嗰陣,香港係仲有銀行衰到要個簽帳落埋月結單先可以做到分期,即係話幸運起上嚟要等足30日,你打上去Call centre佢都只會答做唔到,不過呢啲衰嘢我就唔講太多,留番畀大家慢慢探索;所以話Mox喺呢個細位係好畀心機做的,務求令大家喺簽帳之後,馬上可以做到分期,單係呢個位已經抵讚喇。

申請流程一貫簡約流暢,還款時間表清晰易明

喺Entry Point進入申請頁面,大家可以揀選最多5筆想合併做分期嘅簽帳,跟住就可以透過更改還款期,動態地睇到每月還款額、APR、總還款額等嘅資料。

咁呢期Mox玩緊推廣期內8,000蚊以內嘅3個月簽帳分期總收費只係1蚊,所以大家會見到我呢張圖嘅簽帳額係405.6蚊,總支出係406.37蚊,即係1蚊都唔使咯。

    點擊圖片放大

當然可能大家覺得「Check到呢堆資料都好應該啫」,但現實就係應該嘅事好多時都無出現到,總還款額無咩邊間銀行會喺咁早階段顯示,咁早出晒成個還款時間表就更少,更唔好講嗰啲我睇咗一個鐘頭KFS(Key Fact Statement)都未搞得清還款期嘅貸款產品啦。

確認之後可以幫呢筆分期改番個名(例如Foodpanda Split),再Confirm就OK喇!

    點擊圖片放大

其實成個過程可以話係無咩特別,仲有幫個Transaction改個名都好無聊(有用的,下段講),不過我就係覺得成個過程足夠簡單,所以一般人都會用得到、亦用得好,咁亦合乎番VB「普及金融」嘅初心啦。

Mox服務有咩特色?請按【下一頁

 

【文章來源:華田銀行;已獲授權轉載。原題:銀行閑談 (135) — 又一虛銀推消費分期,Mox 今次點樣維持一貫高水準呢?】

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款