【理財個案】32歲持100萬存款部署置業 建收息股組合滾存首期

博客 13:30 2021/07/08

分享:

【理財個案】32歲持100萬存款部署置業 建收息股組合滾存首期

不少投資者都喜歡短炒,希望賺個快錢。有讀者表示,回顧過去買賣股票經驗,短炒最多只能打個和,未能有效地滾存財富。現年32歲的他希望重整投資步伐,計劃2年後置業,現持有100萬元存款,應如何做好部署?看看龔成是如何回答。

讀者:

你好,近年喺Facebook睇到你分享資料好有用,而且你強調買股票應該採用價值投資法,而唔好只係為短炒波幅,呢一點真係好點醒我。

回顧過去買賣股票,因為只顧短綫波幅,其實獲利唔多,只可以打和。所以𠵱家開始,我都希望自己可以跟從你嘅方法去投資,想請教一下。

我今年32歲,月入3萬元。存款100萬元,月息可收約2%,股票約30萬元,包括:

以前買股票,短炒為主,波幅收入會儲一半,花一半。

1. 未來1至2年希望買樓,請問覺得我應該從現金再投資幾多去股票市場會比較好?

2. 同埋想問一下金山軟件(03888)、明源雲 (00909) 呢類是否可以低吸儲貨?謝謝!

【31歲月入4萬準備結婚 持130萬現金應否再買樓收租?:按此

龔成:

1. 記住,我哋投資股票,係希望長綫持有一些優質企業,透過佢自然增長,達至財富增值目的,而唔係做短炒,去賺差價,這個方法係好錯。

32歲計,你應先做好增值部分。但由於你1至2年內要置業,資金係有一個明確的使用目的。

而且時間太短,如果用來投資較有潛力股票,會有一定波動性,影響最終回報。

以你情況,資金最多可以投資一半在收息股,另一半則以現金或定期持有。再保守啲,你可以只持有現金或定期都可以。

收息股︰
港燈 (02638)
香港電訊 (06823)
工行 (01398)
恒生 (00011)

置富產業信託 (00778)
陽光房地產基金 (00435)
深高速 (00548)
高股息率基金 (03110)

現有持股,華夏恒生生科ETF (03069) 和阿里巴巴 (09988) 波動性會較大。中國人壽 (02628) 質素只是中等。

如果置業時都需要贖回現有持股,我建議你減持部分,將佢換成收息股,定期存款或現金,會較好。

到你買樓後,新資金才投入較有增長力股票,幫你作財富增值。

【30歲投資初哥冀兩年後置業 如何善用50萬元滾存首期資金?:按此

2. 金山軟件 (03888) 主要從事遊戲研發及提供網絡遊戲、手機遊戲及休閒遊戲服務;提供雲存儲及雲計算服務;設計、研發及銷售推廣辦公軟件產品及服務。

業務有質素,長遠發展潛力不差,不過擔心股價較為大上大落,現價合理區頂位,這股前景正面的。

明源雲 (00909) 有潛力。主要係中國房地產開發商及房地產鏈參與者,提供企業級ERP解決方案及SaaS產品。

睇返呢間公司之前的資料,係中國房地產開發商的第一大軟件解決方案供應商,市佔率有約2成。喺呢個市場裡面,按收入計,亦為ERP解決方案及SaaS產品的最大提供商。

其實,佢的角色可以話中國房地產行業的數字化轉型,為房地產開發商及其他參與者,開發了一套行業垂直的ERP解決方案及SaaS產品,以助其管理廣泛的業務運營。包括銷售及營銷、採購、成本管理、項目管理、預算以及房地產資產管理,佢的SaaS產品包括雲客、雲鏈、雲採購及雲空間。

業務雖然有增長力,但股價都唔平,如果初步分析,處於貴水平,值博率未算強,始終市場現時對這類股有好大期望。

但由於金山軟件 (03888) 和明源雲 (00909) 都係波動性高嘅股票,暫時不適宜你用來投資,等你置業完成才再考慮。

【本文獲作者龔成授權轉載】

撰文 : 龔成

欄名 : 80後百萬富翁

緊貼財經時事新聞分析,讚好hket Facebook 專版