【虛擬銀行】未畀錢先回贈? 分享Mox Credit勁爽用後感

博客 15:15 2021/06/16

分享:

【虛擬銀行】未畀錢先回贈? 分享Mox Credit勁爽用後感

幾個星期前嘅專欄就介紹咗Mox Credit喺「申請之快速」同埋「使用之流暢」兩個層面做得有咩優秀嘅地方。咁呢個月我都久唔久用有吓呢張卡,發覺用落都好唔錯,亦都畀到一啲其他信用卡畀唔到我嘅3大暢快感:

  • 未畀錢、先回贈,咁先係誠意表現嘛!
  • 有實卡、無號碼,咁先係保安示範嘛!
  • 有生態、有優惠,咁先係虛銀初心嘛!

今日就逐個點同大家分享吓啦。

未畀錢、先回贈,咁先係誠意表現嘛!

我明白嚟到2021年的香港,喺信用卡支付上面已經好難有咩Customer loyalty,自渣打信用卡提供1.5%回贈開始,信用卡回贈已經進入超白熱化時代,所以同大家講HKTaxi、csl、OK、麥當勞等等有5%回贈、foodpanda有10%回贈,大家都可能會輕輕講一句:

嗰張信用卡最少都有4%啦!嗰間銀行網上劃一8%啦!仲有嗰間外賣有11%添呀!

其實我都唔反對,啱用就用嘛,的確HKTaxi我係日日搭嘅(喂,晚晚做到11點先收工喎),foodpanda我亦成日嗌,啱用咪用咯。

不過我都唔係想講呢樣,我係想講佢「未畀錢、先回贈」呢個位真係超級無敵有誠意!咩意思呢?

大家諗返成個交易過程,當大家用Mox Credit畀咗錢之後,因為成件事係On credit的,大家事實係30至56日之後先真正畀錢(還款),但係大家賺嘅1%/5%/10% Cash back卻係即時嘅!

【首間虛銀推無卡提款 實測平安壹賬通JETCO無卡提款服務:按此

Mox唔單止即時回贈畀你,仲話埋畀你知每一個交易會回幾多畀你,等你唔使月結嗰陣先睇到個總數,1個月咁多Transactions,其實邊睇到邊個Transaction合資格邊個唔合資格攞額外回贈吖!

好無聊?唔係㗎!如果大家睇返啲大行嘅報告,喺Accenture嘅《Banking in 2021: Top 10 trends to watch》嘅第4點就提到「Radical transparency」呢一點,即係銀行會喺2021年必須要令佢哋嘅產品透明度愈嚟愈高,先可以有效留住客人喇。

我覺得喺信用卡回贈上面,最令人沮喪嘅就係月尾先睇到個總數,𠵱家逐筆交易都話我知會回贈幾多,仲要即時落我戶口,咁仲唔係各銀行嘅學習對象?

有實卡、無號碼,咁先係保安示範嘛!

喺上期專欄都已經介紹過無號碼卡喺保安方面嘅優勢,簡單講就係堵截咗畀人抄低卡號碼同CVV再去網上購物嘅風險,最常見嘅犯罪溫床就係餐廳一類會攞走大家張卡嘅場所喇!

咁Mox Credit喺保安方面仲有其他做得好嘅地方,例如「手機鎖卡」功能就好抵讚,等大家可以一懷疑自己張卡被盜,就可以即刻喺手機鎖卡,唔使打去Call centre又搵電話、又對一輪身份咁麻煩,之後搵返張卡亦可以輕鬆解鎖,係一個既兼顧保安又照顧客戶體驗嘅方法嚟㗎!

除咗「手機鎖卡」之外,「交易限額設定」亦係一個貼心嘅方案,大家可以喺手機隨時設定每日交易上限,就算不幸畀人偷咗張卡,都可以最大限度減低損失喇。

    點擊圖片放大

我自己習慣就係將個每日上限調低一啲,有咩需要大額消費先將佢調高,用完就再調返低,咁做最萬無一失喇!

唔知各大銀行可唔可以都整返「手機鎖卡」同「交易限額設定」落去嗰App度呢?

MOX在生態方面有咩出色之處?,請按【下一頁

 

【文章來源:華田銀行;已獲授權轉載。原題:銀行閑談 (127) — Mox Credit 三大暢快用後感!】

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款