擔心信用卡被盜用 無號碼卡安全得多?

博客 18:37 2021/06/08

分享:

擔心信用卡被盜用 無號碼卡安全得多?

田太最近發生咗卡資料被盜事件,雖然最後銀行唔需要佢承擔個損失(都幾萬蚊㗎),但係都困擾咗佢(+我)好一段時間,亦都令到佢留意咗Card security嘅問題。

其實近10年喺「假卡」嘅方法經已唔同晒,由以前嘅真係整一張張嘅「假卡」,變成咗純綷攞大家嘅卡號碼同CVV去網上買嘢,今次田太亦都係咁樣中招喇。

【假卡黨用ATM偷錢 原來同呢款提款卡有關?:按此

點解會畀人攞到卡號碼同CVV呢?除咗有可能去過一啲釣魚網站之外,亦有可能係去餐廳食飯碌卡埋單嗰陣,畀侍應靜靜雞抄低咗啲資料,再轉賣畀假卡集團都未定。

真係咁恐佈?其實餐廳一直都係假卡滋生嘅溫床之一,或者睇完呢篇文,你都會考慮申請返去張「無號碼卡」嚟避免自己惹上麻煩喇。

其實餐廳一直都係假卡滋生嘅溫床呢!

講段小歷史同大家分享一下。

喺假卡仍然係一張張「假膠片」嘅年代,餐廳一直係常見「假卡」滋生嘅溫床,因為以前嘅信用卡大部分都係「無晶片」的「純磁帶卡」,而磁帶係無加密的!

假卡集團會收買餐廳侍應做內應,當攞咗大家張卡去櫃面埋單之際,靜靜雞將大家張卡喺手邊個Skimmer(磁帶閱讀器)度一碌,咁就攞咗大家張卡嘅卡號碼同CVV,然後就可以去做假卡咯!

咁𠵱家做「實體假卡」已經唔多流行,因為𠵱家嘅信用卡已經轉晒做「晶片磁帶混合卡」,又因為晶片加咗密兼且極難複製,喺實體卡支付場景(行內Jargon叫「Card-present」)下遇上假卡嘅機會已經少之又少喇,反而無卡支付場景(行內Jargon叫「Card-not-present」)嘅場景(例如網購)就成為假卡嘅主流喇。

咁大家可能會問,𠵱家好多信用卡仍然有磁帶喺上面,咁用Skimmer唔係一樣整到假卡咩?事實係其實又何需要磁帶+Skimmer,卡面有卡號碼、卡底有CVV,當大家張卡攞咗出櫃枱埋單嘅時候,有心人要攞張紙攞支筆出嚟慢慢抄都得啦。

不過大家又唔使太擔心,因為事實係整完都無咩用,因為張卡本身係一張「晶片磁帶混合卡」,喺Card-present嘅交易場景下,如果有晶片唔用、而要用磁帶做交易的話,銀行好多時都會好警惕,唔會咁輕易畀個交易進行的,假卡集團根本無咩可以做到,所以話𠵱家無咩人會再整一張張嘅「實體假卡」喇。

不過咁又唔可以放心得晒,因為Card-present唔需要擔心,唔代表Card-not-present下萬無一失,例如有卡號碼+CVV就已經可以網上買嘢喇!

【無號碼實體卡是甚麼?香港可以申請無號碼銀行卡嗎?:按此

保安應該首先靠自己

雖然銀行呢十幾年喺卡保安上面落咗好多工夫,用多咗好多大數據嘅方法去偵測交易嘅可信性,不過基於要顧全客戶體驗,當撞到可疑交易嘅時候,都未必會立即終止交易,反而會用Post-transaction notification嘅方法通知番客人剛剛有一筆交易進行,叫做有咩事都即刻知嘛。

不過最好方法當然係源頭堵截,即係好好保護自己嘅16位卡號同埋CVV喇。咁講到呢度,大家就應該明白「無卡號」有幾咁重要喇!因為就算張卡攞咗出去埋單,都無人有機會將你張卡嘅資料抄落嚟,因為卡面根本無號碼!咁就安全好多喇!

暫時香港最容易申請到嘅「無號碼卡」就首推兩家虛擬銀行Mox同WeLab啦,大家覺得邊張比較有型格啲呢?

 

【文章來源:華田銀行;已獲授權轉載。原題:銀行閑談 (126) — 無號碼卡喺 card security 上有咩優勝之處呢?】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版
訂閱《香港經濟日報》電郵通訊
收取第一手財經新聞資訊 了解更多投資理財知識 提交代表本人同意收取香港經濟日報集團所發出的推廣訊息,你也可以查閱本網站的私隱政策使用條款