【虛擬銀行】3家台灣虛銀 樂天銀行、Line Bank、將來銀行的特色

博客 15:37 2021/05/18

分享:

【虛擬銀行】3家台灣虛銀 樂天銀行、Line Bank、將來銀行的特色

花旗銀行早前宣布退出13個地區嘅零售業務,當中包括仍具盈利能力嘅台灣。不過想進入呢個市場嘅參加者仍然唔少,當中就包括台灣新發嘅3家「純網銀」牌照,包括「樂天銀行」、「Line Bank」同埋「將來銀行」。

【日本虛銀「auじぶん銀行」成立近12年 有咩地方值得香港借鏡?:按此

今次就簡單講講各台灣虛銀最新動態同特色啦!

樂天銀行-我都好想開返個戶

「樂天國際銀行」喺今年1月19號開業,以「安心、安全、便利」做口號,成為首家喺台灣開業嘅純網銀。

如果大家有喺日本網購,我諗都唔會對Rakuten陌生,其實樂天喺日本進軍金融業都有好耐歷史喇。

    點擊圖片放大

樂天銀行前身係eBank(イーバンク),喺2001年初成立,次按危機後樂天入股,再喺2008年改名做樂天銀行。

咁樂天銀行喺日本成績都幾威威㗎,號稱「 ネット銀行口座数№1」(純網銀帳戶數目第一名),根據官網資料,喺2021年剛好突破1,000萬個戶口,以日本1億3千萬人口嚟講,算唔錯咯喎!

(btws,大家有無留意到日本版口號係得「安心、便利」而無「安全」呢2個字嘅呢?)

咁無論日本同台灣,大家都可以想像到樂天銀行嘅賣點,就一定係生態圈啦!雖然台灣呢邊仲係起步階段,不過就已經可以用「樂天點數」作為儲分嘅機器,未來就一定發展到好似香港渣打咁,做乜都可以儲Miles咁咯。

    點擊圖片放大

咁點解我都想開返個戶呢?因為我係電子書「樂天 Kobo」嘅重度用家,𠵱家新開戶有「購物金」+「買書5折起」,大家知唔知自從樂天銀行上綫之後,Kobo就好少再做全站7折喇(哭)。

Line Bank-不就是台灣版Kakao Bank嗎?

台灣第二間登場嘅純網銀,就係有日本通訊軟件Line做大股東、以「Banking in Your Hand」為口號嘅「Line Bank」,喺搞咗一輪「好友見面禮」之後呢,終於喺4月22號上綫。

咁叫得做Line Bank,就唔少得叫埋「熊大」同「兔兔」(唔睇新聞稿都唔知Brown同Kony有中文名的……)一齊剪綵啦。

Btws,單以口號計,我就比較鍾意樂天多啲,「Banking in Your Hand」有無令大家諗起楊千嬅呢?

咁喺Research嘅過程中,當我一路睇Line Bank嘅內容,一路諗剩係諗到韓國Kakao Bank,咁性質都好類似嘅,畀張對比圖大家睇吓,係咪真係似得有啲過份呢?

    點擊圖片放大

由於台灣仲未有類似香港FPS嘅技術,所以P2P轉帳仍然係一個大痛點,咁Line作為台灣其中最多人用嘅通訊軟件,咁用Line做P2P就當然係主打之一啦!嗯……咁咪又係同Kakao Bank差唔多咯?

其實比較返香港嘅VB(Virtual Bank),Line Bank同樂天銀行嘅服務算係相當多,一開業已經有存款、貸款、Debit Card,反觀香港嘅8間VB,有貸款+Debit Card嘅仍然係少數。

【開業5日開戶人數達百萬 南韓虛銀Kakao Bank的成功之道:按此

咁我喺返銀行人角度睇,香港有FPS都已經夠煩死你(仲未計要同各大行就住eDDA逐間Setup、逐間講價),仲有喺各類保安方面香港都係世界頂尖要求的;咁不過我喺消費者個角度睇,就覺得台灣有效率得多喇。

將來銀行,到底會唔會來呢?

先抄返之前專欄段字:

雖然花旗辭官歸故里,但係直到今年都仲有人漏夜趕科場,我講緊今年1月新開嘅樂天國際銀行,日本Rakuten旗下,virtual bank啦都係,嚟緊仲有Line Bank,當然都係日本嘢啦,好快開舖。

仲有間叫「將來銀行」,中華電信係大股東,個名都唔知邊個諗嘅,「將來」即係「仲未來」,隱隱約約有種開唔成嘅味道喎。

之後有緊貼台灣局勢嘅網友都提返華田,話呢檔嘢出咗資安、人事與採購圍標爭議。

不過,我覺得唔好睇死佢,唔講可能唔知,成日畀我讚嘅ZA Bank其實喺開業前都換過董事會成員同 CEO,一齊睇吓最後呢間「將來銀行」開唔開得成啦。

 

【文章來源:華田銀行;已獲授權轉載。原題:銀行閑談 (122) — 說一下 3 家台灣 VB 「樂天銀行」、「Line Bank」和「將來銀行」的最新動態】

【關於作者】
兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版