炒燶GME點算好? 唔盡早斬纜盞愈輸愈多

博客 18:54 2021/02/08

分享:

炒燶GME點算好? 唔盡早斬纜盞愈輸愈多

美股「散戶屠鱷」事件塵埃落定,「GameStop」(美︰GME)股價從天堂狠狠摔返落地面,早入場而且有沽貨嘅散戶就賺到笑,但遲入場嘅,可能已經「坐緊艇」,如果係「坐緊艇」嘅其中一員,積臣說話未必啱聽,因為我會選擇盡早斬纜。

【延伸閱讀】美股「散戶屠鱷」事件嘅思考 係一場散戶挑戰華爾街精英之舉?

從高位計 大瀉86.79%

上星期一(2月1日)開始,GME股價就拾級而落。從最高位每股483美元計,至上星期五收市報63.77美元,大瀉86.79%,無止賺嘅股民,睇住戶口結餘由綠色變做紅色,心情肯定唔好受。至於遲咗入場嘅,發達唔成,仲要帳面大輸,心情肯定係囉囉攣。

唔少散戶仲相信「挾大戶淡倉」派對仲未完,仲相信GME股價仲有得升,更不斷係網絡論壇呼籲要SH(即Strong Hold簡寫,意思要堅定持貨),令積臣感意外嘅係,唔少人真係SH,仲貼埋倉證明無賣到,即使佢哋輸緊錢。積臣睇到佢哋輸到一頸血都於心不忍。

唔盡早止蝕 或會輸更多

好多人又話一日唔放一日唔算蝕,但以數學計算,條數虧損得愈多,就愈難追返虧損,正如下表計算︰

虧損百分比 要追回虧損的升幅百分比
10% 11.1%
20% 25%
30% 42.9%
50% 100%
70% 233.3%
90% 900%

當你輸10%時,隻股股價要升11.1%先見家鄉,呢個數積臣覺得唔難;咁睇下輸30%時,隻股要升返42.9%先得,呢個時候積臣就覺得有難度了;再睇返你輸90%時,隻股要升900%先追得返晒啲虧損,呢個回報只能係大師級Level先做得到。所以,止蝕嘅重要性就喺呢度。

諗住坐下貨? 實為不智

如果你持有嘅係ETF,或者係騰訊 (00700) 或亞馬遜(美︰AMZN)呢類增長型股票,積臣先會考慮坐下貨,但GME明顯係炒作,股價瘋狂上升,已同公司前景、業績盈虧沒甚關係了,終有一日股價會落返地面,所以並唔係可以坐下貨嘅股票。

加上,「坐貨」係會輸時間值,今次GME係純炒作,未必再有一次「挾大戶淡倉」,而瘋狂炒作一輪,更難有機會畀你返到「家鄉位」。但當你一心一意等佢返家鄉,你買另一隻增長股可能已經抵銷返部分損失。舉個例子,各位網友不坊用5年表現圖比較返5號仔滙豐 (00005) 同700喇。

5號仔同700 五年股價圖表現比較。

切勿輕易走去破產

投資行為要自己負責,既然已經做錯決定,就要承認錯誤,死攬實隻股都無好結果,止蝕亦都有必要做。但如果你係借孖展或炒輸槓桿工具而輸凸本金之餘,仲爭券商錢,連自己身家都還唔到欠款,唔少網民建議當事人破產,但積臣就有保留,始始破產後遺症好大,信貸評級不良外,你以後申請信用卡、借錢周轉、甚至係買樓都受到影響,更有大機構及職業對於曾經破產嘅人都有負面印象。

所以,如果私人貸款係可以解決筆欠款,不妨一試,亦可以試下同券商傾一傾,睇下分期還款得唔得,始終債主都唔想債仔唔還錢嘅。另外,家庭成員永遠都係支持你嘅人,亦不妨向家庭成員求助,可能有人話同家庭成員唔夾,唔得喎。大難當前,當你肯放低自我ego,好多嘢係好辦好多。

最後,積臣知道貪心想搵快錢嗰種心態,GME事件已經唔係投資,係對賭了。就算想博一博,都只好拎你可承受損失嘅投資額出嚟,千萬唔好「All in」。但都係嗰句,有得揀唔會揀呢啲,投資市場星期一至五都開,機會處處,何必急在一時?從錯誤學習,下次要識避開呢啲了。

美股「散戶屠鱷」事件,GME股價瘋狂炒作。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

===========

提升中小企現金流。高達$1,500獎賞!條款細則適用

https://bit.ly/36SseGH

 

撰文 : 積臣

欄名 : 積財有計

緊貼財經時事新聞分析,讚好hket Facebook 專版