牛三易賺錢多股神 你賺到可能係你本事 但切忌貪勝不知輸

博客 18:46 2021/01/25

分享:

牛三易賺錢多股神 你賺到可能係你本事 但切忌貪勝不知輸

積臣寫呢篇文章之日,正正係港股大時代之時(積臣個人認為𠵱家係大時代同牛三時刻,下文都會咁樣稱呼),恒指升穿3萬點,而且又有多日錄得逾3,000億成交額,交投十分暢旺,應該令唔少人諗返起2015年嗰陣時嘅港股大時代。另一邊廂,香港第四波疫情仲未停止,唔少處所仲係禁止營業,加上失業率升到6.6%,創16年新高,令人感覺香港經濟與香港股市係兩個時空嚟嘅。

港股大時來臨

今次港股大時代,同2015、2017年差唔多,都係北水支持,自從開通滬深港通後,北水對港股嘅支持愈來愈重要。如果有留意嘅話,今次大時代北水吸納嘅主要唔係港資股如港鐵 (00066) 、長和 (00001) 、新鴻基地產 (00016) 等,𠵱家北水愛嘅係中資股,特別係新經濟相關,騰訊 (00700) 、美團 (03690) 、比亞迪 (01211) 。香港經濟無甚起色,而中國係最先從疫情復甦嘅主要經濟體,唔買中資股,唔通買港資股咩!

另一個原因係市場憧憬拜登上台後,中美關係得以紓緩,起碼拜登唔似特朗普咁難以預測,投資市場就係唔鍾意不確定性嘛,市場亦相信拜登不會對中國企業推出強硬嘅不利措施。

當然,仲有一個原因係,就係全球熱錢多,積臣過去一直係咁講,各位股民至今應該領悟到熱錢嘅威力。

「全民皆股」再現

喺今輪牛市,或者你喺條街,搭巴士時,甚至喺網上討論區,都聽多咗或見多咗人講股票,「全民皆股」係牛三特徵之一。「既然難得牛三,點可以唔參與一份呢?」,相信呢個係唔少股民心聲,都想賺下快錢都好嘛。同時,網絡討論區都多了一堆帖文問邊到借錢平,想「All in」股票市場。

牛市係易賺錢,但又未必個個賺到錢,剛好今日積臣見到有大學生網民開post話將學生貸款炒輸晒,𠵱家就惆悵緊點樣填返個窿好,而佢仲要係炒更高風險嘅Bitcoin。積臣相信係牛三下,呢類炒燶股個案會開始多。

牛市多股神

好多人話牛市多股神,咁積臣又唔會否認呢樣嘢,牛市係最易賺錢嘅時候,唔通喺熊市最難賺嘅時候賺咩?牛市人人都可以賺錢,但個重點係,當市場轉向嗰刻,你肯唔肯離場?好多人係轉勢嗰時依然覺得牛市未完,仲大額大額投放市場買股,呢個時候,係可以將牛市賺嘅還返畀市場,仲可能輸有凸添。特別𠵱家低息環境下,好多投資者係槓桿投資,當全世界一齊散水嗰時,嗰種跌市將同「要錢唔要貨」市況一樣,殺到散戶不知所措。

牛市係好易賺錢,你炒到贏幾大都好,唔能夠鎖定利潤,就係假。過去幾次大時代過後,都總會聽到邊個邊個話高位買咗邊隻,跌咗好多,想等返家鄉先放。呢啲好彩幾年就等到家鄉位,唔好彩,可能唔知等到幾時𠻹。中國移動 (00941) 曾經都係好多股民嘅心水股嚟㗎,但𠵱家仲有好大段路先重返2008年高位呢!緊記,巴菲特名句「退潮的時候,你才知道誰在裸泳」。

終歸係,積臣相信人人都貪婪,唔貪婪就唔會掂資本市場喇,但要清楚自己貪婪程度去到幾多就要識收手,同埋自己有無一套風險管理系統。

最後,就算喺牛三炒股,都永遠只好用空閒錢,即係輸晒或蟹晒都唔會令你破產。積臣相信無人想做上面嗰位連登大學生要周圍撲水啩。

投資有賺有蝕,股票市場風高浪急,呢一刻可能你係「股神」,但緊記風險永在。最後都要戴下頭盔,以上並不構成任何投資建議,僅提供作參考用途,有需要宜先諮詢財務顧問。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

=============

貼身追蹤股價變化、重要消息、賺蝕成績,更易作出投資判斷 | 立即免費下載使用 按此

撰文 : 積臣

欄名 : 積財有計

緊貼財經時事新聞分析,讚好hket Facebook 專版