為甚麼每年新年目標都達唔到?

博客 18:34 2021/01/04

分享:

為甚麼每年新年目標都達唔到?

艱難嘅2020年過去了!嚟到新一年,好多人都會為自己訂立新一年嘅目標,但結果係知易行難多,你有冇問過自己咁多年嚟,有幾多次係達成年頭訂立嘅目標呢?有冇問點解以前會失敗?

逾4成人未能達成新年目標

每一年新開始,都會雄心壯志為自己訂立新一年嘅目標,目的想自己進步一步,又或改變一下自己,成為「Better me」。點都好,每人想盡量令自己喺新一年有個新形象同改變,並唔係壞事。不過,好多人就算初初幾有決心向目標進發都好,去到年中就會唔當一回事,再去到年尾,先醒起今年目標未達成。

Statistic Brain Research Institute喺2017年嘅一項研究顯示,喺1,273名的受訪者中,有超過42%嘅受訪者表示每年定下嘅目標都無成功。睇數字,係咪有種「I'll never walk alone」(我永遠不必獨行)嘅感覺呢!原來達唔到新年目標嘅人數唔係少。

點解會失敗?

點解達唔成?原因有好多,唔計自己懶、唔認真對待個目標等個人原因,首先你要諗下個目標係咪太遠大,而又不切實際,例如學外語,要由零去到流利階段係需要長時間浸淫,好多人目標會寫「新一年要學日文」,但只用1年時間就想講到流利外語,太唔考慮現實喇!

另外,好多人無計劃步驟,心裏只諗住「我要做到」,但無詳細計劃,平時只係呢度做啲,嗰度做啲,但時間一長,就會慢慢放棄唔做。如果中途有其他個事情要做,咁新年目標更容易放埋一邊唔理。除非你係一個執行力強、意志力強大嘅人,一直勇往直前。

如何成功?

要做到新一年嘅目標,除咗訂立貼地同清晰嘅目標,最好可以將目標具體化,又或者「斬件式」執行,並設定時間步驟。以目標為減肥20KG為例(不要寫「我要減肥」,要寫具更體的),你要將目標分為節食同做運動,設定具體步驟,而每個步驟嘅結果係可以量化嘅,類似係要求自己每星期要去健身室做健身5小時、每日早餐要食健康減肥餐、一日只可以吸收幾多卡路里等等。

而步驟亦最好按時間段節去調整,例如去健身室,平時自己唔多做運動,怕目標太高做唔掂,第一季先訂下自己每星期去健身室做健身5小時,達成後,第2季將目標提升,每星期去健身室做健身10小時等等。

另外,尋找同伴一齊做亦係唔錯嘅方法,有人同自己一齊向一個目標邁進,可以增加個人信心,亦都可以一齊分享喜悅、成果,同埋檢討過程,兩個人亦可監察及篤促對手,唔好偷懶。

以上是積臣嘅心得,希望各位可以係新一年可以達成目標,唔好再將舊年目標推遲一年就當新一年目標,年復一年,永遠Loop(循環)。

【新一年目標】3個學校無教步驟 幫你設立年度目標

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版