【虛擬銀行】富融銀行有咩服務解決ZA同Airstar嘅邏輯漏洞呢?

博客 16:03 2020/12/29

分享:

【虛擬銀行】富融銀行有咩服務解決ZA同Airstar嘅邏輯漏洞呢?

講咗咁耐,最後一間VB富融銀行Fusion Bank終於都趕到喺2020年冬至正式上綫,由2019年5月正式攞到牌計起,足足經歷咗19個月嘅時間,都真係幾誇張的。咁慢又係咪慢得有道理呢?咁都可以一齊數數有咩服務,同埋Fusion Bank到底點樣解決ZA同Airstar一個喺服務上嘅大漏洞呢?

【8間虛銀全開業 邊間虛擬銀行優惠計劃着數啲?:按此

富融服務一覽

要數Fusion嘅Product feature其實都幾齊,基本上只有頭2檔上綫嘅ZA同Airstar可以比較一下(係吖,愈早上反而愈齊咯),亦算係完勝之後上綫嘅WeLab、Mox、Livi、PAOB同Ant嘅……

存款方面有齊3種貨幣嘅活期同定期,轉帳支援FPS、FPS Addressing、FPS e-DDA(暫時無Block到HSBC)、本地RTGS,不過私人貸款、企業貸款、Debit Card、提款同In-app payment就欠奉喇。

除此之外仲有2個最大亮點,就係:

1)Fusion有FX買賣服務,即係可以港幣、人民幣、美元相互兌換,呢個唔可以話好重要,不過算係堵塞咗一個ZA同Airstar嘅大漏洞,就係你既然可以做美元活期同定期,但係你又無得用港紙/人仔買入,咁我就只可以喺第二間行存入美金啦,但係FPS又唔支援美金,咁即係只能夠收本地RTGS或者International remittance。

但係ZA同Airstar未支援International remittance,就算支援都好,RTGS同International remittance都係要收費嘅,即係話喺大家唔願意額外課金嘅情況之下,係根本無辦法放美金入戶口,咁你又無得直接買,又更加無分行畀我存美金,結論就係會Loop死咗咯。

【邊間虛擬銀行服務最吸引?7間虛擬銀行服務比併:按此

2)Fusion已經可以連結WeChat Pay HK,咁大家明白係騰訊閉門一家親啦,自己人益自己人正常到不得之了。

其實我之前喺唔同文章都講過,如果要選擇一個Payment partner,全球支援嘅VM Network(即係Visa、Mastercard啦)同埋香港Local嘅Alipay HK同WeChat Pay HK都會係好選擇,換句說話講,In-app payment同銀聯(即係Livi個Case)就真係唔多好喇。

原因好簡單,VM同Alipay WeChat network喺香港嘅滲透率都非常好,檔次上算係一高一低,最重要係唔需要改變消費者嘅習慣,前端仍然係用PayWave或者QR Code,只係後端嘅銀行唔同咗,咁消費者就比較容易接受,亦唔會出現早前專欄提到嘅「KFC事件喇」。

【WeLab Bank回贈優惠計計數 2個Bug位要睇清楚:按此

富融前景如何呢?

之前佢哋CE Eric Sum說好的存錢睇書、存錢聽歌、存錢食雞等等同騰訊嘅Cross-over就始終未見影,佢哋啲新聞稿亦都無咩提過呢啲嘢,咁我諗大家都要等一等先喇。

睇返隻App就見到有「跨境滙款」嘅Button,睇嚟都會喺下一步嘅行動。

至於貸款同Debit card等嘅服務,就完全唔見有。其實WeLab講咗話要搞貸款都好多個月都未有聲氣,我諗樣樣都慢過人嘅Fusion就更加要等吓先喇。至於Debit card呢,如果已經可以連結WeChat Pay HK,再出Debit card又會唔會有啲重覆呢?呢個就真好睇佢哋Senior management嘅取態。

至於優惠,5%年息3個月定存上限38,000港元我覺得可以喇,而喺息口咁低、周圍又無咩優惠嘅環境之下,叫做聊勝於無啦;微信188港元優惠券當然就係「不拿白不拿」,不過好可惜華田Bind咗好多次都Bind唔到,睇嚟可以打去試吓佢哋個CS Hotline喇……

 

【文章來源:華田銀行;已獲授權轉載。原題:Fusion Bank 有咩服務解決 ZA 同 Airstar 既邏輯漏洞呢?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版