【無視疫情】2020年5大驚奇! Tesla爆升7倍 Bitcoin重回2萬美元以上

博客 13:53 2020/12/29

分享:

【無視疫情】2020年5大驚奇! Tesla爆升7倍 Bitcoin重回2萬美元以上

2020年爆發史無前例嘅新冠肺炎疫症,衝擊各國經濟之餘,又令投資市場翻天覆地,今年初好多大行對今年嘅預測都錯晒,咁的確好難話邊個咁「神婆」可以估中今年爆發世紀疫症先。今年投資市場好多驚奇,積臣就講下我自己認為嘅驚奇。

1. 無懼疫情 美股創新高

直到𠵱家,美國係全球最多新冠肺炎確診個案嘅國家,而且未有減退嘅跡象。即使經歷過封城、禁足、經濟停頓,美股3大指數唔單止收復第一季嘅跌勢,而且仲不斷破頂創新高。

今年第一季,美股10日內經歷4次熔斷,連股神巴菲特都話活咗咁耐都未見過。美聯儲推出被稱為無限量印錢嘅救市措施,亦令市場上嘅熱錢比2008年金融海嘯後嘅更多,呢個又係史無前例。

2. 舊經股低迷 疫情受惠股爆上

經濟差,又股災,但唔代表無股炒,可以係「炒股唔炒市」。舊經濟股因低迷經濟受影響,股價無「出色」,但一批疫情受惠股就殺出重圍,特別係同新經濟有關嘅股份,爭在你有冇捕捉到機會。港股例如有美團 (03690) 、阿里健康 (00241) 、香港電視 (01137) 等,美股有Zoom(美︰ZM)、Peloton(美︰PTON)、Shopify(美︰SHOP)等。

爆上嘅仲有一大堆SaaS股、電子商貿、網絡保安等等。市場預期就算疫情完結,唔少公司已經藉今次疫情發展自己嘅市佔率,客戶亦都有依賴性,唔會話唔要就唔要。

【年度總結】港股2020年升幅榜Top 10 比亞迪排第4 頭3位你有冇買中?

【年度回顧】美股2020年升幅榜Top 10 Tesla無份 最勁一隻升近3000%

3. 電動車之年

「財富快車」Tesla相信無人唔識了,今年回報近700%,市值突破6,200億美元,亦令Tesla老闆馬斯克身家如同火箭升空,超越微軟創辦人蓋茲,成為彭博億萬富翁指數富豪榜第二名,僅次亞馬遜創辦人貝索斯。Tesla近日被納入成為標普500指數成分股,是有史以來加入指數時市值最高嘅公司。但其實喺2018年,Tesla因為未能準時交付訂單,股價陷入低迷,多次被機構狙擊沽空,馬斯克受到多方壓力,一度口出狂言要私有化Tesla,馬斯克當然無足夠資金做呢樣嘢,最後更被美國證券交易委員會處罰。

除了Tesla,中概電動車股表現亦唔遜色,例如比亞迪 (01211) 、雅迪控股 (01585) 、蔚來(美︰NIO)、小鵬(美︰XPEV)、理想(美︰LI)等,其中蔚來股價表現更跑贏Tesla,升近1,000%。就連蘋果公司最近亦宣布加入電動車戰團,積臣要講句,電動車,「真香」!

4. 可持續發展回報不輸蝕

電動車股可以爆炒,部分原因係因為環保兩個字,為應對氣候變化,各國未來會大力推動可持續發展、減排等措施,當中傳統燃油車將被淘汰,而事實有部分國家,例如日本、英國、挪威與荷蘭等,已經宣布喺某個年份禁售燃油車。電動車只係推動可持續發展其中一個行業,事實上今年同可持續發展、ESG、綠色相關嘅股份回報亦唔差,甚至唔輸於疫情受惠股。

舉例,GLOBAL X中國潔淨能源ETF (02809) 今年大升逾120%,還有一批與新能源製造業相關股份、電動車相關嘅鋰電池股等都有唔錯嘅升幅。

美股新能源ETF升幅比港股更多,Invesco太陽能ETF(美︰TAN)同Invesco WilderHill潔淨能源ETF(美︰PBW)今年分別升逾230%同200%,升幅比科技女股神Cathie Wood管理嘅ARK Next Generation Internet ETF(美︰ARKW)嘅約150%更強。

積臣知道叫香港人環保啲其實好困難,甚至唔少人認為環保係假命題。喺投資市場上,環保會加速產業轉型,舊嘅走,新嘅嚟,當中產業淘汰就會有投資機會。

女股神Cathie Wood:5大科技顛覆全球經濟 標普過半成分股面臨危機

5. Bitcoin再起

Bitcoin經歷3年整固,今年重回2017年底高位2萬美元水平外,最近更突破2萬6美元水平,創歷史新高。2017年,Bitcoin暴升暴跌,當時很多人形容Bitcoin係泡沫、騙局,但Bitcoin今年嘅強勢,係因為有機構投資者進場,聰明錢已先進場了。今年各國大規模量寬,熱錢多到氾濫,同時美元不斷眨值,更有評論認為美元王者地位將不保,身為另類貨幣嘅Bitcoin乘機再起,更憧憬成為未來數碼貨幣嘅交易媒介之一。

最後,2020年對於香港人嚟講,可能係負面嘅一年,對於投資者嚟講可能係輸錢一年,亦令好多人對投資市場大跌眼鏡,但今年的確唔少人賺到盤滿缽滿。投資是要買未來,今年疫情加速咗各國經濟轉型、科技應用進程,未來趨勢係點,其實可能好多人睇新聞、上網都睇到,關鍵係你肯唔肯去捉緊趨勢。

最後都要戴吓頭盔,以上並不構成任何投資建議,僅提供作參考用途,本人並無持有任何以上股份及基金。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享5受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版