回顧2020年投資表現 ETF是王道的一年

博客 19:02 2020/12/21

分享:

回顧2020年投資表現 ETF是王道的一年

話咁快又一年,2020年係多災多難一年,要以一個形容詞形容今年感覺,可能大多數人都會用負面形容詞。喺投資市場,係又驚又喜一年,點解?因為你可能賺咗超多錢,但又有可能蝕咗好多錢。年尾,又係時候檢視一下個組合表現。

又驚又喜嘅一年

今年投資市場驚就驚在受新冠肺炎大流行影響,全球股票市場喺第一季急插,好多人喺嗰一刻坐艇或者輸蝕咗好多。美股今年史無前例10日經歷4次熔斷,「股神」巴菲特都話「活了89年,第一次遇到」。喺呢段時間係好多人焦頭爛額嘅。

美股暴跌後,美聯儲出動到史無前例放水政策,到3月中美股反彈,加上市場憧憬科技股會係疫情中最受惠,好多科技股率先創新高(而過去兩季業績亦顯示唔少科技股喺疫情中營銷大幅增長)。你又有冇捕捉到呢批股份暴升呢?有追到話,咁你呢一年就喜了。

你組合回報跑贏大市嗎?

今年咁大波幅,無經驗、無自己心法嘅投資者,好易玩到輸,而且更會令自己憂心傷神。一般來講,投資者檢視自己一年投資成果,都會用大市指數嚟比,以港股、美股指數計算,回報如下︰

指數 今年迄今回報*
恒生指數 -5.99%
恒生科技指數 20.25%^
道指 5.74%
標普500指數 14.81%
納指 42.16%
*截至12月18日
^恒生科技指數於7月27日推出

科技股為主嘅納指今年錄得42.16%,今年7月推出嘅恒生指都有20.25%回報,相反以舊經濟股為主嘅恒生指數同道指,分別只有-5.99%同5.74%表現。標普500指數則有14.81%,不過不失。

新經濟股跑贏舊經濟股

今年好明顯係疫情下,突顯咗舊經濟股為新經濟股分野,今年你買舊經濟股,可能得個桔,但你有上新經濟股列車,的確係嘗試咗高速列車嘅滋味。今年喺瘋狂印錢一年,而且係好多人引頸以待嘅股災一年,好多科技股大反彈之餘,表現亦跑贏指數回報,例如小米 (01810) 、美團 (03690) ,分別有超過160%同170%回報,美股果邊仲瘋狂,大家今年經常用嘅Zoom(美︰ZM)有逾490%回報,電動車巨頭Tesla(美︰TSLA)更被網民稱為財富快車,有逾730%回報。

就算唔識分析個股,只要買有科技成分嘅ETF,回報都可以豐厚。今年最多人茶餘飯後嘅話題就係被稱為「科技女股神」Cathie Wood管理嘅主動型ETF ARK系列,甚至打敗埋唔少被動型科技ETF。

ETF 今年迄今回報*
GX中國雲算 (02826) 71.41%
三星中國龍網 (02812) 71.02%
Amplify Online Retail ETF(美︰IBUY) 126.07%
ARK Next Generation Internet ETF(美︰ARKW) 161.90%
*截至12月18日

個股回報雖大,但誰有信心長揸唔放,我相信股價從高位回吐20%至30%,已經令唔少人人先行止賺。今年好多暴升股,買中係好易發達,亦都好易造就一批「牛市股神」,不過投資係講長遠,呢一年回報好,下一年係未知之數。不過,經歷動盪一年,股災都嚟過了,如果今年連大市指數都跑唔贏嘅投資者,又或者都上唔到倍升股列車嘅投資者,都係考慮下選擇表現ETF喇!無論係指數ETF或板塊類型嘅ETF,起碼你買咗係瞓得着。

最後都要戴吓頭盔,以上並不構成任何投資建議,僅提供作參考用途,本人並無持有任何以上股份及基金。

指數基金比主動基金更受歡迎? 巴菲特用「10年賭局」證明

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享5受人生。

 

撰文 : 積臣

欄名 : 積財有計

緊貼財經時事新聞分析,讚好hket Facebook 專版