【虛擬銀行】livi bank夥yuu推獎賞 今次合作有咩亮點?

博客 12:55 2020/12/08

分享:

【虛擬銀行】livi bank夥yuu推獎賞 今次合作有咩亮點?

又嚟認叻一下,從八達通日日賞壽終正寢,我就已經話「怡和」會開一個類似「百佳易賞錢」嘅物體,跟住再聯合埋「中銀」一齊做大個市場。雖然yuu第一水係同恒生合作,但𠵱家都總算歸隊,同livi做返好朋友喇。而今次會講吓livi同yuu合作令人滿意嘅2個Delight point。

【邊間虛擬銀行服務最吸引?7間虛擬銀行服務比併:按此

Delight Point 1:成個Binding流程都總算順暢

經更新嘅livi app呢,喺個首頁度就大大隻字叫大家Activate隻yuu,撳入去就有Link同Activate兩個選項。師奶仔如我的,當然一早就有yuu啦,撳Activate,會出一個Invitation code。

跟住呢個位就有小小衰,因為你要走返去yuu度入呢個Activation code,而唔可以喺livi直接叫醒隻yuu做binding再自動跳返去livi,而要大家幫佢手動。

不過都差唔晒,因為當大家一入啱個Invitation code,喺yuu app會出現返livi個Logo,話畀大家聽無去錯門口,咁都唔錯啦。跟住再收一個SMS咁就搞掂。

咁呢個位其實都可以踩一腳,就係yuu唔識要求權限去Read sms令大家唔使又手動幫佢做個連結,其實呢類型Read sms嘅Feature真係唔少見,例如Airbnb就有呢個Function,不過都係小問題,基本上1分鐘搞得掂。大家睇吓,其實我要求都好低啫係咪?

綁完之後,大家就可以喺livi查到yuu積分,做到嘢喎今次!

【Mox「日日派息」真係着數啲?可以收多幾多利息?:按此

Delight Point 2:兩個QR竟然無縫接合了!

粉絲應該會記得華田喺之前專欄曾經討伐過livi同yuu同時用QR Code係超錯的……

所以理論上你用得yuu儲分嘅商戶,都可以用livi呢個「搖一搖」同步攞獎賞,不過喺成個客戶流程上真係錯晒。 

因為首先你要記住要先嘟yuu再用livi個App畀錢,係不能倒轉的。yuu個速度都可以,撳入去、Load一下、撳中間個Button再Show QR Code就OK;但係之後就慘咯。Livi個App嘅保安係國防級,你要入去、Face ID/Touch ID、Load(跟住不定期彈App)、撳Pay、再Load好幾秒、再Show QR Code,途中仲要Network良好至得!

但係livi今次一個小改動,就令整個「差劣至極」嘅流程變做「極度流暢」,點做呢?當大家用銀聯二維碼畀錢嗰陣,同步有一粒掣,可以切換過去yuu二維碼就OK了!

(左邊截唔到圖……Again真係國防級保安,不過都好嘅,始終二維碼無加密,都是很危險的東西)

咁又係循例挑剔一句,係唔係可以一個QR Code做晒呢?算啦,我要求真係好低的,咁又係抄返上次段字仔:「我試咗一次喺7-11畀後面個5呎11吋200+磅等住買煙嘅阿叔狠狠地睥咗一次之後,我就畀錢之前先撳咗個Livi App等佢Load晒先敢埋Cashier,咁個UX咪差到震咯。」

Day 1個yuu就唔應該夾Enjoy Card,用Livi畀錢自動儲埋4X yuu積分豈不是一石二鳥之計?

係咯,用Livi畀錢自動儲埋4X yuu積分豈不是一石二鳥之計?

【眾安銀行全靠呢2樣設計 在User Experience方面領先一眾銀行?:按此

大家又唔好覺得我吹水,連同怡和鬧翻咗嘅八達通同埋將被即用即棄的Enjoy Card都可以「自己儲分」,即係只要做咗Binding又喺yuu商戶用八達通或者Enjoy Card畀錢,根本唔需要開着個yuu app都可以射到啲分落去,點解你livi唔得呢?

不過都係嗰句,網民成日都話我太Mean,又剩係識做ZA Bank打手。好喇好喇,我降低一下要求,啲個In-app嘅Switch都算係簡單得嚟叫做解決咗2個App彈嚟彈去嘅Pain point啦!

 

【文章來源:華田銀行;已獲授權轉載。原題:銀行閑閑談 #53 - 總算流暢的 livi X yuu 大合作】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版