【全職炒股】想辭職全職炒股 日賺2千有冇可能?

博客 16:35 2020/11/20

分享:

唔鍾意份工想辭職炒股日賺2千得唔得? 先創造穩定現金流

香港人工作忙碌,經常OT,唔少人有精神壓力,所以「唔使DO」,幾乎係大部分香港人嘅願望。有網民喺討論都訴苦,話工作壓力大,想唔撈兼轉全職炒股賺錢,目標係日賺2千蚊。

有網民喺討論區發帖,話自己月入3萬8,但因為工作壓力太大,想趁𠵱家擁有80萬現金,辭職唔做轉為全職炒股,問做Day trade(即日鮮)搵食可唔可行?仲話目標日賺2千蚊,當係供樓、食飯、生活費。結果係大部分網友都潑佢冷水!

先幫樓主計一計數,樓主想日賺2千,夠供樓、食飯、生活費,要留意,365日唔係每日係交易日,但佢辭份正職,理論上無交易日即係無收入,咁交易日嘅收益就要足夠補充假期嘅空日收入,咁佢1年回報即係以下咁計︰

1年總回報︰$2,000 x 365日=73萬

年回報率︰73萬/80萬=約92%

年回報要有92%,我諗好多人睇到都嚇親。就算係股王騰訊 (00700) ,5年總回報係約270%,每年平均回報只係54%。樓主希望嘅每年投資回報,我諗好多就算係基金經理級人馬,都難以連續幾年兼穩定地達到。

騰訊 5年總回報係約270%。

「退潮時就知道誰在裸泳」

除了回報,投資市場嘅風險有玩開投資開嘅都會明,更何況係即日鮮?大牛市個個都係股神,但到波動市就見真章,隨時係呢啲時間輸返晒,熊市時更可能輸身家,就好似巴菲特所講,「退潮時就知道誰在裸泳」。邊個夠膽講炒股無輸過?投資,特別係短炒,心理壓力好大,平時講就講追漲殺跌,但埋位嗰時,血壓飆高、頭昏腦脹,一時衝動做錯投資決定都話唔埋。諗下當收入只係靠炒股,做錯決定即係嗰日無人工。

投資市場不乏投資高手,不過平凡人,好多嘢唔識、無基礎、無方法,喺投資市場面前同賭大細無分別。

人到中年拎500萬身家炒股 你準備好市場新生態未?

滾大資金 靠被動收入過活

近年比較多人講財務自由、辭職唔撈,咁無正職收入就好靠被動收入,不過得嗰80萬,被動收入又唔夠樓主原本份人工咁多。假設一年6厘息,80萬只係收得48,000蚊,除開12個月,每個月得4千;如果本金係800萬,就1個月可以收4萬蚊息,結果就變得好唔同了。都係嗰句,本少就唔好講咩財務自由、靠被動收入住喇!

【財務自由】得嗰一百幾十萬 學咩人講現金流呢?

因為返工壓力大,其實應該從個人着手,轉另一份工,改善自己環境,辭職唔撈亦唔係上策,而且樓主仲要供樓,本身係一項負債。又或者,轉一份人工無咁高嘅工,但較為輕鬆的,而且有自己嘅空閒時間,令你可以開始學習投資,從小小本金開始,學下接觸投資市場。再為自己訂下目標,將80萬本金,透過自己已掌握嘅投資方法,滾大到可以靠被動收入過活,到時先諗辭職唔撈喇。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版