【收息組合】iBond以外的收息選擇

博客 17:55 2020/11/18

分享:

【收息組合】iBond以外的收息選擇

iBond 2020(上市編號:04239)結果出爐兼掛埋牌,今批iBond認購反應熱烈,每人最多抽到4手。今批iBond保證息率增至2厘,喺𠵱家低息環境下,難得有高息穩陣產品,當然係吸引,不過只抽中4手,長揸3年合共保證收到2,400蚊息,對於想收息嘅都未必夠喉。除咗iBond之外,仲有咩收息產品?

銀債3.5厘高息 長者專屬

對於年滿65歲長者嚟講,好消息係政府公布咗新一批銀債詳情,保證息率同樣有加,至到3.5厘,收息嚟講比iBond更加吸引,而且只限長者玩,競爭無咁大。積臣上星期都寫過篇文,對於iBond收息唔夠喉嘅長者,係好值得去抽銀債嘅。

點解銀債係「無得輸」,按︰【下一頁

買債穩陣收息

咁未夠65歲,無得抽銀債呢隻「無得輸」嘅理財產品,惟有退而求其次。想穩陣收息,積臣推薦債券多過股票。

買債券一般都係主權債或企業債,較好係買屬於投資級别嘅評級債券(BBB-或Baa3以上),會比較穩陣。喺香港買債券渠道唔少,好多銀行、券商、金融機構都有提供,但通常入場得買債券都要有咁上下本金,例如幾十萬至幾百萬(每隻債券入場費唔同),由於近年市場多咗唔少金融機構加入市場競爭,部分債券入場費十幾萬港元都買到了,比起以前叫做平民化咗。

今年4月,5號仔滙豐唔派股息,令唔少人大感錯愕同不滿,唔少退休長者係靠滙豐派股息食長糧。滙豐股份唔派息啫,但佢啲債仲會派息㗎,佢有一款永續債,到期收益率有5.45厘,每半年派一次。積臣當然唔係sell滙豐債券,但咁睇,收息呢,其實仲有好多方法㗎。

滙豐停派股息 想收息仲有6厘息企業債,【按︰此頁

近年,唔少港人開美股戶口買賣美股,其中有一間美國大型券商,提供一種叫交易所買賣債券(Exchange Traded Debt,ETD),又叫Baby bond,顧名思義係可在交易所進行買賣嘅債券,因為發行面額較小,入場費較低(不少ETD以25美元水平上市),係非常適合資金有限嘅投資者。呢種產品香港唔多人講,但其實係美國係好常見,仲可以買到唔少美國知名企業,eBay、AT&T等。

買股收息 公用股優先

積臣係今年4月曾經撰文,想有一個穩陣嘅收息組合,較好做法係自組一個包含多隻投資產品嘅收息組合。積臣唔建議All in買股收息,要買的話,積臣只會心水公用股,因為股價波幅較其他股細(只係較細,唔代表股價唔會跌),例如中電 (00002) 、港燈 (02638) 、香港電訊 (06823) 等,目標係穩陣收息,和追求少少資本增值。至於其他高息股份,例如收租股、地產股、銀行股,易受經濟周期影響,今次疫情足證對呢批股份影響。

「變種」收息工具──短期儲蓄保險

另外,由於全球持續低息環境同埋波動市況,短期儲蓄保險開始受注目,儲蓄保險原意係提供穩健嘅理財產品,特別係針對本身唔識理財嘅、保守、同埋承受風險能力低嘅人。

由於短期儲蓄保險供款期短,供滿後幾年就可以拎返本金同紅利,而且有保證紅利回報,因此有投資者將短期儲蓄保險視為「變種」收息工具。𠵱家有保險公司提供嘅短期儲蓄保,年率化保證回報高達3.3%,供2年,第5年拎返本金同紅利。

不過,短期儲蓄保就未必啱長者了,因為設有投保年齡限制,對於長者嚟講,積臣覺得都係銀債吸引好多。

短期儲蓄保保證回報每年更勝iBond,供2年第5年取回本金及紅利,按【此頁

最後,放眼iBond之外,其實收息仲有好多方法。一個穩健嘅收息組台,其實應該係由不同嘅理財工具組成,勿把雞蛋放在同一個籃子裏。其實畀多少少心機,係可以搵到唔少投資產品。

最後都要戴吓頭盔,以上並不構成任何投資建議,僅提供作參考用途,本人並無持有任何以上股份及基金。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版