【窮人生仔】窮人真係唔可以生仔?

博客 18:00 2020/11/06

分享:

窮人真係唔可以生仔?

近幾年,網上討論區久唔久就會有個「月經」話題(即係每隔一個月都出現一次),主題大概係「窮人唔好生仔」。呢種思維非常之負面,積臣當然唔同意喇!但當中亦有值得思考嘅地方。

家教與貧富無必然關係

近日有討論區亦都有人出帖,大意係發帖者忽然諗起兩年前某日喺街遇到個小學生,佢拎住本手冊不停咁喊,於是嗰位網友就上前了解一下,知道呢位小朋友經常受父母體罰,加上最近默書不合格,所以唔敢返屋企,更表示曾有輕生念頭。

發帖者表示感同身受,因為自己細個都經歷過。之後又延伸到:

窮人、唔識教仔嘅人,我真係求下你哋唔好生

帖文一出,有唔少網友贊同,分享自己嘅童年嘅不愉快經歷,更表示貧窮令自己童年生活比不上其他小朋友。

積臣都對於發帖者同呢位小朋友嘅經歷感到難過,不過始終有地方要搞清,家教好唔好,與富人與窮人其實無大關係。

當然,富人可以畀多啲物質自己小朋友,但一樣可以對自己嘅小朋友作出體罰或言語暴力,就好似有網民留言話自己識有人在band 1學校全級考第3,但都被佢阿媽責罵,仲要扣零用錢同補多2個補習班。

良好財政基礎 對子女發展係有幫助

生仔同教仔係兩回事嚟,窮人一樣可以教好仔女,富人一樣可以教唔好。

將教唔好仔女嘅人等同係窮人,其實都係一件唔好嘅社會定型。

富人一定係好仔?又唔一定㗎,睇啲八卦新聞,你實見到唔少「二世祖」其實人格係幾衰。

若要相比,窮人的確有較高機會因為財政問題,而產生家庭爭拗,更嚴重嘅仲會有家暴問題;而富人可以畀多啲機會自己個仔出去試唔同嘅嘢,用錢就解決到唔少問題,家庭有良好財政基礎對子女發展係會有幫助。積臣對此唔會否認。

但係將「窮人唔好生仔」呢個想法扭曲去到一個程度係,只要你屋企唔係富人,就會仇恨父母,不停埋怨父母,其實係極危險嘅事,亦都否忍自己可以改變自己嘅能力。

俗語話「錢解決到嘅問題就唔係問題」。上一輩嘅事已不能改變,但將來各位若成為父母,但有冇諗過唔想自己子女重複自己當年苦況,其實係要趁你仲年輕時籌劃,充實自己嘅財政狀況。

窮與不窮 由自己開始

積臣有次同個朋友討論中美局勢,順便講下經濟戰,講講吓就講到強積金,佢話佢蝕,我話我賺,點解唔同嘅?

因為佢從無主動了解自己退休規劃,聽人講揀保守基金,有睇開積臣博客嘅朋友,都知道積臣一直鼓勵年輕時要揀高風險股票基金,賺取最大回報。

之後積臣畀一個複息效應嘅圖佢睇,話:

如果你想之後有筆讀書基金畀仔女,又好驚第時自己負擔好重時做會好辛苦,其實要係你趁𠵱家年輕時做

佢之後雙眼發光,好似發現新大陸,因為佢想像唔到自己未來可以儲到咁多錢,而佢平時係一個洗腳唔抹腳嘅人(佢算係中高收入人士)。

如何靠複息效應成為長勝將軍?了解按︰【下一頁

以前資訊唔發達,上一輩理財知識不足,好多人係賺幾多使幾多,但喺𠵱家科技年代,你喺Google打關鍵字「理財」+「教育」,肯定見到好多內容出咗嚟,而且𠵱家好多KOL係社交媒體分享理財資訊,而且好多理財產品嘅入場門檻已降低好多,例如以前買基金要可能要一百幾十萬,𠵱家低到幾千都有。

重點係,你有冇呢一刻開始準備累積財富,而唔係洗腳唔抹腳,日日花天酒地。

唔好到你下一代,以同樣說話問你「窮人唔好生仔喇!」

5個必要知管理強積金要點,了解按︰【下一頁

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

======

市場瞬息萬變,但機會處處。即上滙豐「FinFit」理財資訊平台,助你掌握先機,創造創富,財務自由就在不遠處。

撰文 : 積臣

欄名 : 積財有計

緊貼財經時事新聞分析,讚好hket Facebook 專版