【iBond 2020】抽iBond好唔好? 話你知3種投資取態的做法

博客 16:20 2020/11/03

分享:

【iBond 2020】應唔應該抽iBond?3種投資取態的做法

早陣子有媒體搵我,話想了解吓銀行人點睇i-Bond。咁我就真係認認真真坐低諗咗一次,以下就係我嘅3個結論喇!

1. 如果你係屬於勤力嗰批,又諗住長揸嘅,咁2%回報就真在太少喇

政府保證最低回報2%,兼且同香港物價掛鈎,咁喺全球努力泵水嘅情況之下,都真係唔錯嘅。

但係2020年係一個有趣年份,因為香港多咗一樣嘢叫「虛擬銀行」,天星做緊活期20,000元息率3.6%、螞蟻活期20,000元息率2.5%,嚟緊仲有仲未出場嘅富融,睇嚟佢玩高息定期都事在必行,2%都係真係麻麻地吸引喇。

咁我又明白呢啲存款最大嘅問題係「檔期」唔夠長,iBond玩3年,呢啲最多玩1年,好難直接比較喎。咁我咁講啦,iBond要申請,VB又要開戶,2個都係工夫,如果精力有限就不如玩晒啲VB先啦。

咁如果你唔止係勤力、而係好勤力,又或者係工作需要(即係我),咁就當然Why not all啦!

【想賺息或賺價要點樣抽iBond?:按此

2. 如果你係屬於勤力嗰批,又諗住短炒嘅,就梗係抽啦!

一個簡單嘅數學問題,如果一件貨本身值105元,但係你而家可以用100元買,仲保證可以即刻用105元賣返出去,咁你做唔做呢?

件事就係咁簡單,一張回報最少2%兼且同通脹掛鈎嘅債券本身就唔應該Sell at par,咁市場永遠都係Smart嘅,唔係咩iBond開市首日升幾多幾多,而係張Bond本身就唔應該原價At par咁樣賣畀你,唔係佢升咗,而係你At discount咁買咗啫。

咁點解你可以At discount咁買呢?因為你係香港人,而想買你張iBond嘅可能係啲無辦法買到一手iBond嘅投資者,咁大家用香港人身份買iBond,再賣畀無呢個特權嘅人,呢個過程咪叫「尋租」Rent-seeking咯。

所以如果你屬於勤力嗰批,又諗住短炒嘅,就梗係抽啦!𠵱家政府畀你都唔要,傻的嗎?

【iBond銀行券商優惠一覽:按此

3. 如果你屬於懶嗰批,都係抽吧啦!

3年期、每半年派息、保證2%息率、保證回報不低於通脹或原價發售,如果你係懶鬼一隻,都真係幾唔錯!至少好過放喺滙豐得0.01%啦!

認真的,今年市道蕭條,連滙豐都玩5免,細銀行如工商更加玩到9免,基本上長揸都係0支出,政府派幾多大家實收幾多喇。

所以如果大家係屬於懶嗰批,又有兩三萬閒錢,買股票又驚太波動,放銀行又覺得蝕畀佢(事實你係真係蝕畀佢嘅),買兩三手iBond都係精明選擇喇!

 

【文章來源:華田銀行;已獲授權轉載。原題:銀行閑談 (99) — iBond 應唔應該抽番2手呢?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版