帶飯返工1年慳過萬蚊真係唔現實?

博客 18:41 2020/11/02

分享:

疫情重創本港經濟,唔少人失業無嘢做,仲有份工嘅都可能要凍薪、無花紅,甚至要減人工。喺𠵱家市道,慳得就慳係一件好平常嘅事。但積臣見到有FB專頁就炒起咗一個帶飯返工嘅話題。

帶飯返工每年可慳1.4萬?

嗰話題係喺FB專頁公務員secrets到嚟,當然呢啲話題熱門討論區唔會缺席喇!有網民投稿表示,來年公務員或要凍薪,因此希望分享慳錢心得畀有需要嘅弟兄。佢首先講𠵱家中午出街食平均一餐起碼60蚊,假設每個月返20日工,1個月嘅午餐開支就接近1,200蚊,如果帶飯返工嘅話,每年就大概慳到1.4萬,話足夠一家四口去台灣4天遊了!

跟住呢位網民由慳家師奶,忽然股神上身,建議各位公務員將其中1,000蚊拎去投資,每年回報率有5%嘅話,5年後就會有7萬,10年之後就變成16萬。又話正所謂「小富由儉」。

積臣睇見呢啲腦筋急轉彎嘅文章,當然要Fact check一下啦,一check就知道原出處係《錢家有道》網站嘅文章啦,原意係藉生活理財例子,教育咩係複息效應。但令積臣感到意外嘅係帖文一出,唔少人對呢篇「投稿」負評重重,大多數批評該內容唔現實、限制多多,無計帶飯成本等等。

以每餐60蚊嚟計的確可能係誇張咗,𠵱家茶餐廳碟頭飯大約係45蚊,計埋當中成本及其他不可控因素,每年未必慳到1.4萬咁多。但積臣都曾經帶飯返工,又會出街食嘅辦工室打雜,係領會到帶飯係會幫到你慳到錢,但如果你個飯盒係豪食鮑參翅肚,咁帶飯當然係貴過出街食喇,但更重要嘅係慳之餘,同時要識投資。

【第八大奇迹】複息效應好似滾雪球愈大 愈早開始愈着數 遲10年回報可差2倍

「慳錢」同「投資增值」兩條腿走路

香港人經常想「唔使DO」,早啲退休,即係以𠵱家新派啲嘅term形容,叫財務自由,除咗有父母幹、自己創業外,唔少例子嘅財務自由必然與「慳錢」同「投資增值」兩重點拉上關係。

【財務自由】35歲提早退休並不難 看看白手興家百萬富翁達到財務自由的6大心得 全部你都能做到!

你有收入,但「洗腳唔抹腳」,經常使錢喺不必要嘅開支上,儲唔到錢,本金都無,係唔使講財務自由呢步。

當你肯慳錢儲錢了,但齋儲錢亦都達唔到財務自由,𠵱家銀行低息,揸現金放銀行無收益,係唔會滾存到你達到財務自由嘅金額呢?就算幾年後加返息,但通常呢個時候即係經濟轉好時候,即係有返通脹,咁你放銀行收益可能只係啱啱好抵銷到通脹。

所以第2隻腳就要識得投資增值,將本金增值至可以抵銷到通脹之餘,同時滾存到你財務自由嘅目標金額。上面《錢家有道》文章嘅例子,其實就係介紹複息效應嘅威力,假如你投資1萬蚊,1年回報係10%,咁下年起步就係1.1萬蚊,投資金額愈大,投資回報愈高,複息力量更明顯。《錢家有道》係有計算機幫到你演算例子嘅。

如果你可以增加收入,並將更多人工拎嚟儲蓄及投資,達到財務自由嘅目標就更加快。咁係唔係代表你今日做,下年就可以財務自由?又唔係,好多香港人想一朝致富,咩都要快,咁係唔現實。財務自由嘅目標金額,人人唔同,要睇你想有咩生活質素,而重點係你有冇目標同計劃逼自己去做,並唔係喺度事事都話無可能。

【退休理財】理想退休生活要幾多錢 退休計算機輕鬆幫你計

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

=======

市場瞬息萬變,但機會處處。即上滙豐「FinFit」理財資訊平台,助你掌握先機,創造創富,財務自由就在不遠處。

撰文 : 積臣

欄名 : 積財有計

緊貼財經時事新聞分析,讚好hket Facebook 專版