【經濟衰退】裁員潮殺到埋身 點做好?

博客 18:18 2020/10/21

分享:

【經濟衰退】裁員潮殺到埋身 點做好?

本港第三波新冠疫情漸趨緩和,街頭重現人頭湧湧嘅情況,不過,政府昨日公布第三季失業率,由6.1%升至6.4%,見16年嚟新高,加上國泰航空公布最新重組計劃,大削8,500職位,第三波疫情對本港嘅經濟影響逐漸浮現。

【國泰重組】國泰港龍即日停運、員工全數被裁 國泰全集團削8500職位、香港裁員5300人(不斷更新)

疫情未完結 最差情況或未到

國泰航空裁員嘅新聞一出,應該唔少人都感到譁然,或者又會諗:「咁大間機構都頂唔住,會唔會輪到自己?」之前唔少企業都係靠「保就業」計劃頂住,唔裁員住,但只係「吊命」,始終航空業係最受疫情影響嘅行業之一,國泰近幾個月客運量比去年同期均大跌98%或以上,所以國泰其實係受疫情重創。

全球疫情大流行未完結,歐洲爆發新一輪疫情,全球最大經濟體美國嘅疫情未停止過,中國係最快係疫情中恢復嘅國家之一。之前積臣引述過坊間報道,話疫苗或可以在第4季面世,但睇返各國研發進度,能夠係年底面世,已經係樂觀了,加上要預計大規模生產及接種嘅時間,經濟完全重啟睇嚟係需要更多時間。大家要有心理準備再捱多一段時間。

靠自己重新振作

但真係裁員殺到埋身,好多人頓時好惶恐,但驚都要面對,再求職搵新工,重新出發。對於結構性失業嘅工種,即係好似航空業,全球航空公司都裁員,就好難短時間內搵返同一行業嘅工,咁馬死落地行,轉行都要。

突如其來嘅失業,心裏總不免感到忐忑不安,好多時係要靠自己重新振作。首先,唔好覺得被炒係世界末日,逆境只係暫時性,一切會過去。更唔好因為挫折而自我封閉,甚至自我放棄、自我頹廢,將自己腦袋充滿負面情緒,當你放棄自己,沒有向前邁進嘅動力,咁樣你係離開唔到低潮漩渦。

不能不學無術

你要更加積極面對,找尋新工作,亦應該趁失業嘅空檔期,學習新技能,增值自己,增強自己履歷同競爭力,須知道係呢段時間,好多人同你一樣失業,佢哋都可能同你同一背景或有相似工作經驗,你需要sell自己同其他人有咩唔同。

又或者,如果你本身有創業嘅夢想,今次可能係你踏出第一步嘅機會,趁有空閒,構思一下自己創業大計。

咁喺失業時間,就好需要「重組」埋自己日常生活開支,節衣縮食,須知道你唔一定係第二日就搵到新工,有可能要幾個月時間先搵到新工,唔可以坐食山崩,其次,喺經濟不明朗情況下,減少不必要嘅開支,未雨綢繆,並不過分。

留意精神健康

失業的話,除咗要增值自己,亦要留意自己精神健康同情緒變化,可以做返自己平時因為返工忙到濟而無做嘅事,例如執屋、健身、行山等,又或者每日要做一件令自己感到愉快嘅事,一來可以打發時間,二來亦令自己有忙碌的感覺,不致於令自己好無所事事,兼維持正向思維。

最後,凡事必有出路,我哋要做嘅就係去做我哋可以控制嘅事,當自己有準備時,當載有機會嘅列車嚟到嗰陣時,就係你可唔可以抓緊佢,上車嘅時候。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版