【MPF】你沒買滙豐 但你份強積金可能有……

博客 10:59 2020/10/14

分享:

仲有兩個月就係聖誕節,今年有冇機會去外地過白色聖誕,積臣唔樂觀。喺投資市場,以前一講聖誕節,就會話「聖誕鐘,買滙豐」,即係話呢段時間買滙豐,回報會較好。但今時今日,呢支歌仔已經唔合時,滙豐股價係點,你我都目睹,甚至𠵱家話要避之則吉。

「聖誕鐘,咪買滙豐」

今年滙豐同其他企業一樣,業務都受新冠肺炎衡擊,加上4月時宣布不派息嘅消息,令股價一挫再挫,上月傳出中國或將滙豐列入不可靠實體清單嘅消息,滙豐一度跌穿埋09年金融海嘯28蚊供股價,當中國平安保險「撈底」增持滙豐,成為最大股東,滙豐先重上30蚊關口。但其實滙豐基本面仍然係無改善,亦都未恢復派息,𠵱家只係消息炒作咋。美國近日會公布制裁香港金融機嘅構名單,市場密切關注滙豐、渣打會唔會榜上有名,如果係真,滙豐股價會跌得更加深。年初至今,滙豐已經跌咗5成喇!

年初至今,滙豐已經跌咗5成了!

你無買滙豐 但你份強積金可能有

滙豐今年嘅跌勢,的確令好多人好錯愕,有貨嘅好惶恐咁問清唔清倉好,無貨就睇戲食花生。不過,你無主動買啫,但你份退休金,即係強積金呀,有可能有喎。上月積臣同朋友講起滙豐,朋友們都唔知原來自己份退休金可能揸住滙豐。

要知你份強積金有冇揸滙豐,首先要睇你個強積金戶口係揀咩基金,如果係恒指基金,基本上就肯定會有滙豐,因為MPF恒指基金嘅投資目標係追蹤恒指,而滙豐喺恒指嘅比重大概係8.14%。

MPF表現要好 首先你識唔識睇呢個關鍵內容?

恒指、港股基金持滙豐機會大

既然恒指基金有,咁MPF港股基金都一樣有?咁又未必,如果基金係主動型基金,持股係由基金經理決定,不過,喺今年之前唔少港股基金都會揸滙豐,咁係因為滙豐算係優質大藍籌,業務穩健、派息穩定,又係國際銀行,大大隻,又唔怕執笠,所以好多基金經理都會持倉滙豐,係多少咁解。積臣無睇晒所有MPF港股基金持倉,但幾間嘅大型MPF受託人嘅港股基金都會揸滙豐,例如宏利、AIA友邦、滙豐、恒生強積金等。

有人可能會好醒咁話,我避開恒指基金同埋港股基金,揀大中華股票基金、亞洲股票基金、或者股債混合嘅基金咪得。積臣要講聲︰「你以為喇!」,舉例下面宏利中華威力基金,就持有2.63%滙豐。

定期check基金便覽    

所以呢,唔想揸滙豐,就要自己check住受託人係喺網上公開嘅基金便覽,睇下你揀果隻基金其實揸咩貨。遺憾係基金便覽只會列出基金嘅頭10大持倉名單,即係佢頭10大無列出滙豐,但佢可能仍然持有。係美中不足㗎喇,但起碼有個source畀你趨吉避凶,你都唔想揀隻基金係重倉滙豐,而又陀衰你個強積金戶口表現喇啩。

唔啱心水,就轉基金,如果連受託人都唔啱心水,強積金「半自由行」就幫到你,你可以自己揀心水受託人同強積金計劃。

【輕鬆管理強積金好簡單】3個步驟整合強積金 省卻煩惱兼賺基金單位回贈︰按此了解

積臣就話,點止踢走滙豐,即情要睇埋有冇其他陀衰家持倉。一隻基金表現好唔好,係好睇佢持咩倉。積臣認為未來將會係科網股天下,所以將強積金資產放係較多科技股持倉嘅基金,舊經濟股要Out。唔想成日呻自己份強積金經常「見紅」,係有辦法,爭在你有冇主動管理自己份強積金。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版