【金融騙局】矽谷世紀金融騙局!醫療科技公司Theranos估值曾達90億美元 靠的是造假與包裝

博客 19:00 2020/10/12

分享:

矽谷世紀金融騙局 Theranos估值曾達90億美元 靠的是造假與包裝

倫敦金、「微信女」等金融騙案,香港人應該都聽得多,但講到世紀金融騙案,好多人應該即刻聯想起龐氏騙局,但有一單積臣認為好比電影情節影嘅,更令人目定口呆嘅金融騙案,就係「惡血」事件

「惡血」一名來自於美國記者霍約翰‧凱瑞魯(John Carreyrou)所著一書《惡血:矽谷獨角獸的醫療騙局!深藏血液裡的祕密、謊言與金錢》,大踢爆一間美國初創獨角獸嘅騙案。而呢單騙案嘅肇事者伊莉莎白‧霍姆斯(Elizabeth Holmes),𠵱家正被美國法庭審訊中。

伊莉莎白霍姆斯,攝於2019年。

輟學創業成立血液測試公司

霍姆斯本身喺史丹福大學讀化工系,但佢輟學出嚟創業,以19歲之齡喺2003年成立醫療科技公司Theranos,聲稱從病人嘅手指頭抽取數滴血液,就可作出超過200項測試,可以快速協助病人搵出有冇病,而唔需要好似傳統咁用一大支針簡插入你手臂抽取血液,公司更講到成效與傳統驗血方法相若,但時間較短,收費亦低廉。

當時好多人都認為只有些少血液,根本無可能做到測試作用。但喺創業人士嘅角度,佢做到嘅話,足以改變醫療科技嘅發展,而且係大好商機。

估值曾高達90億美元的Theranos。

造假、公關包裝手段 吹出90億美元市值

而隨着時間,霍姆斯發現佢都做唔到想要嘅效果同產品。但初創公司最重要係要有投資者,唔可以斷現金流,於是佢作啲假數據嚟誤導公眾及投資者。

有咗數據,但都要有人肯「落搭」,霍姆斯有嘅強項係吹得,將公司產品形容到係可以改變世界嘅重大科技,又出席各大公眾場所及接受媒體訪問,講到自己好巴閉。

而且佢又識包裝,搵埋蘋果公司御用嘅廣告公司幫佢做個人品牌宣傳,令佢個人風格一度勁似喬布斯。

Theranos又不斷購買其他醫療機構嘅機器,好似山寨廠咁,拆開重組,再油個靚殼,就當係自主研發產品。

霍姆斯用呢幾招,的確氹到投資者信任,例如甲骨文創辦人埃利森、傳媒大亨梅鐸、美國前國務卿舒茲等。

Theranos聲稱從病人嘅手指頭抽取數滴血液,就可作出超過200項測試。

Theranos其中一血液湔試機miniLab。

肯定有人問,造假咁大件事,無人吹雞咩?內部員工實知㗎?

知都無用,Theranos更會用法律手段震懾員工,邊個夠膽爆料,就將佢告上法庭。

靠着造假、公關包裝,當時霍姆斯被譽為「女版喬布斯」,公司估值更一度高達90億美元。更有連鎖超市搵佢合作,希望將佢啲器材放喺店面,畀一般大眾都可以測試自己血液。

伊莉莎白的造型,一度與當時蘋果公司老闆,喬布斯相似。

騙案被揭穿 由「改變世界」嘅人變過街老鼠   

但醜婦終須見家翁,有民眾發現佢個血液測試係唔準,Theranos接獲大量投訴,而且醫學界亦都發現Theranos嘅血液測試機不尋常情況,加上有前員工冒着被告上法庭風險、Theranos嘅威脅,決意把事實公諸於世,一連串事件引起《惡血》作者約翰‧凱瑞魯嘅注意,深入調查,Theranos醜聞終於喺2015年公諸於世。

事件搞大咗後,引起監管當局注意,於是調查Theranos,最後將呢一個矽谷獨角獸騙案揭穿。

霍姆斯一度係「改變世界」嘅人,到最後變成人人喊打嘅過街老鼠。佢嘅訴訟仲進行緊,上月佢更以精神異常為自己辯護,希望逃過牢獄之災,而佢最終會唔會得到應得嘅報應呢?似乎真係要放長雙眼啦。

而Theranos?當然已經倒閉了喇!

幸好當時未喺連鎖超市放Theranos啲血液測試機,否則普羅大眾對若對自己的健康作出錯誤診斷,後果可大可小。呢單金融騙案,堪比小說情節,曲折迷離,而荷里活正將呢件事翻拍成電影,不日將在大銀幕見到。

【好書推介】血液檢測初創 怎打造700億騙局

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版