【邊一個發明了返工】月入6萬係咩概念?月入1萬、月入2萬、月入3萬又點生活?(內附香港打工仔入息水平一覽,睇下自己係食物鏈第幾層)

博客 13:45 2020/10/09

分享:

今年經濟唔好,唔少人無工開。但討論人工有幾多係一個「日經」(代表恒久不悶)嘅話題,積臣留意到有網友討論緊「月入6萬係咩概念?」,友欄都專登講呢事件。今次積臣又講下啦。

事緣連登討論區有個帖文,有網友問月入6萬元係咩概念,引嚟唔少網民留言,有人話「代表你要交幾皮嘢稅」、「證明你有資格負債供樓」,亦有人話收入高,支出亦都高,其實唔多錢剩。更有網民分享自己個案,兩公婆,男方工作,女方不工作,月入6萬等如月入3萬。

幾多香港人係月入6萬?

帖文好多巴絲打留言,就咁睇香港真係咁多人月入6萬?即睇數據,根據統計處2020年第2季《綜合住戶統計調查按季統計報告》數據,積臣再重組一下分類(點解要咁分類,因為呢個分類之前係網上廣泛流傳,咁積臣照整等大家易理解啲),得出以下(不包括外籍家庭傭工)︰

    點擊圖片放大
    +2

根據以上分類,收入6萬或以上嘅,僅有294,800人(9%),而2萬以下佔了51.3%,即1,684,600人,呢批人嘅工資先係反映到大多數香港人人工。再睇返收入中位數,2020年第2季只係19,000元,同6萬真係相距甚遠。所以香港人收入分布係一個倒金字塔。原始數據,可以去click呢度,睇返報告第71頁。

積臣就手痕就講吓月入1萬、2萬、3萬係咩概念,當然未必完全準,旨在作一個比較。

月入1萬、2萬、3萬係咩概念?

月入1萬︰收入比最低工資多少少,但難以支持到過好生活,難聽啲講,積臣會形容只係啱啱生存到。呢批人扣除強積金供款,畀埋家用(或者交租),食飯返工搭車費用,真係無錢剩咁濟,平時想出街食好啲、買心頭好,都要諗過度過。但未過單人申請公屋每月最高入息限額12,800元嘅。

月入2萬︰收入啱啱過收入中位數19,000元,但只係啱啱好夠生活,要交稅(視乎有幾多免稅額),每個月一出糧即少1,000蚊做強積金供款。可以有閒錢買下投資產品,可以買些少心頭好、食好少少,去吓旅行、叫做享受吓生活。但講到買樓,又未到嗰個地步。有啲人形容呢批人係高不成,低不就。

月入3萬︰收入高咗,理應可以食好啲,玩好啲,可以隨意買自己心頭好,買PS5、食自助餐、去高級酒店食Tea等等,唔使下下就住就住。不過,交稅開始多,如果免稅額唔高,要交萬幾蚊稅,強積金供款去到上限1,500蚊。未過單人申請居屋最高入息限額33,000元,仲可以申請居屋。有呢個收入,又會心思思想買車代步,或搬出去自己住,租個細細地嘅房,有私人空間同埋住得舒服啲,但計條數供車兼租樓,每月其實又係無乜錢剩。呢個收入可以買樓,但每個月供樓開支令你吃不消,變成月光族。

月入3萬,仲未過單人居屋入息門檻。

先計可支配收入

去到月入4、5萬,其實都唔使積臣再講落去……收入高咗,自然會對生活品質要求提高,慾望更加多,到時唔止買車買樓,買埋奢侈品,開始建立個人嗜好,開支隨之上升,如果結咗婚、生埋仔女,家庭同子女開支更加大,仲有你要交幾皮嘢稅,保險保費又會多咗。到𠵱家呢刻,所有開支單靠份糧,你會希望公司唔好炒你,因為會令你現金流即斷,你就更依賴𠵱家份工。講到𠵱到,係咪好似電視肥皂劇,但戲如人生,人生如戲。

經濟學上,有個概念叫可支配收入(Disposable Income),所得收入總計 - 非消費支出,簡單講,即係收入扣除日常生活中的固定支出,例如:貸款、保險保費、稅項、罰款、房租、水電費等。咁唔知收入愈高嘅巴絲打,有冇發現收入雖然高,但可支配收入其實唔係想像中高。

最後,積臣都要呻一下︰「邊個發明了返工」!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版