【保就業計劃】百佳惠康回饋社會計劃 難除「左手交右手」之嫌

博客 10:42 2020/09/29

分享:

百佳惠康回饋社會計劃 難去除「左手交右手」之嫌

上星期,本港兩大連鎖超級市場,百佳同惠康就早前申請第2期「保就業」計劃,為將補貼回饋社會,分別推出「隆重」優惠計劃,希望與社會大眾同舟共濟。但常言道,「魔鬼在細節」嘛,社會大眾唔好咁快開心住。

政府早前公布的第2期保就業計劃。

合計約2億回饋計

首先,百佳方面,將會於10月起向弱勢社群派發總值逾4千萬嘅現金食物券,每人200蚊,預計受惠人數逾20萬。另外,百佳加碼推3,200萬元「誠心賞你」大抽獎,市民唔使到店內消費都可以參加。

閱讀更多百佳回饋計劃詳情,按此】及【按此】了解

惠康就推出總值超過1.2億元的「點點心意」回饋社會計劃,喺未來10個月向有需要社群派發100萬張現金券及100萬張餐券,同時捐獻500萬港元幫助弱勢社群,惠康並承諾未來6個月超過300款日常貨品不加價。

閱讀更多惠康回饋計劃詳情,按此】及【按此】了解

兩間超市回饋計劃合計都叫有2億元,但兩間超市嘅一舉一動,始終會引起市民評頭品足,甚至有評論以「超市霸權」形容佢哋,批評佢哋一直以各種手段阻擋想進入同行既競爭者。不過,就算佢哋有負面評價,門市依然人山人海。

「左手交右手」之嫌

百佳今次所謂嘅4千萬的現金食物券及「誠心賞你」大抽獎,兩者所送出嘅其實都係自家嘅超市現金券,送畀你雖然係免費,但就要你去返佢哋鋪頭消費買嘢,其實係有「左手交右手」之嫌。另外,百佳仲識得捉消費者心理,用得超市現金券消費,就有種心態唔太在意價錢,就好容易買超過現金券嘅貨品,咁超市就可以從中再獲利。

百佳將送出的總值4千萬的現金食物券。

至於惠康,嗰100萬張現金券及100萬張餐券係咪都係自家超市券,暫時未知。但佢所謂承諾未來6個月超過300款日常貨品不加價一樣惹嚟批評,政府首先開腔,勞福局局長羅致光指不加價難以衡量實質回饋數額,唔會計作回饋金額。惠康喺前日(27日)就即刻出聲明話鎖定價格不包括在政府回饋建議內,只屬1.2億元「點點心意」回饋社會計劃一部分,只為社區抗疫出一分力。

消委會亦指,惠康凍價透明度低,大部分凍價貨品為集團自家品牌,變相鼓勵消費者購買有關貨品。所以即係玩嚟玩去,都係益自己人。

不加價的貨品會貼上「日日有低價」的標籤。

超市物品貴   有更平嘅競爭者

超市嘢貴都唔係新鮮事,平時積臣都會閒逛超市,但感覺今年超市加價更厲害,舉個例,好受網民歡迎嘅某東南亞國家出品嘅撈麵,惠康無特價情況下賣介乎11元至14元,但去其他零售商鋪,都唔使11蚊,甚至乎低過10蚊都有。

超市貨品普遍較高。

其實𠵱家已經唔少零售品牌試圖搶奪兩大超市嘅零售份額,例如759阿信屋、優品360、價真棧、大生生活超市、日本城旗下嘅多來買等等,只要落啲心機格下價嘅話,係可以搵到嘢平過兩大超市多多聲。加上𠵱家經濟唔好,慳得一蚊多一蚊,你我都可以做一個精明消費者。

最後,唔知兩間超市有無一種感覺,申請保就業計劃又要承諾期內唔可以炒人,又要將補貼回饋社會,又要被政府施壓,又要受公眾批評,唔知佢哋有冇感覺「上錯車」呢?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版