【虛擬銀行】虛擬銀行攻勢強勁 但核心問題未解答 點解市民一定要用?

博客 11:11 2020/09/15

分享:

【虛擬銀行】虛擬銀行攻勢強勁 但核心問題未解答 點解市民一定要用?

虛擬銀行都講咗好耐,到今年多間虛擬銀行就真係正式開業,畀市民申請開戶喇!不過可能撞正疫情嘅關係,虛擬銀行唔係太多人關注,又或者經濟唔好,市民關心幾時有工開仲好。既然有幾間虛擬銀行正式營業,積臣問一問,有幾多人係已經開咗戶口呢?或者打算開呢?

虛擬銀行推展普及金融

幫大家recall一下memory先,金管局總共發出8張虛擬銀行營運牌照,而現時正式營業嘅有5間,包括眾安銀行(ZA Bank)、天星銀行(Airstar)、匯立銀行(Welab Bank)、livi Bank,同埋MOX Bank,當中眾安銀行係第一間開業嘅虛擬銀行,可以早着先機。5間虛擬銀行嘅身世,積臣唔多講,大家想知就Google吓喇!

虛擬銀行開戶優惠,按︰【下一頁

香港作為國際金融中心,唔少國際金融機構都進駐香港,銀行分行喺香港可謂總有一間喺左近。香港要推行虛擬銀行,其中目的係要促進普及金融嘅目標,用返金管局嘅說法,係讓社會普羅大眾都可以得到基本銀行服務,以符合市民日常生活或營商資金往來嘅需要。所以,虛擬銀行不設最低戶口結餘要求及低戶口結餘收費,就係最大嘅賣點。另一目的,就係借推展虛擬銀行,推進香港金融科技嘅發展,例如各間傳統銀行就不斷改進自己嘅手機銀行APP、推出多項綫上服務,唔使要求客戶落分行搞。

傳統銀行見招拆招

大家仲記唔記得舊年年中,虛擬銀行仲未面世,傳統銀行已經陸續取消取低戶口結餘收費及最低戶口結餘要求,令好多市民驚喜萬分,之後各傳統銀行都降低或取消部分銀行服務收費,上星期滙豐銀行就出大招,直接取消26項基金服務收費。所以大家都見到,傳統銀行亦都無放慢腳步,見招拆招。

【相關滙豐新聞】滙豐11月起取消26項基本銀行服務收費 逾400萬名客戶料受惠

虛擬銀行如何搶客

傳統銀行有一班穩定客源,虛擬銀行要點做先搶到客?離唔開係燒錢推優惠,例如送對新客戶現金獎、提供高息港元定期存款、扣帳卡簽帳現金回贈等,MOX Bank更打埋「有型」牌,創始成員客戶送限量版金屬扣帳卡,等畀人揸上手感覺都型過人,係咪先!當然,MOX Bank都係為咗打響口碑喇!

我相信每個香港人都會多於一個銀行戶口,積臣咁會問,唔計優惠因素,究竟有咩吸引地方令你要開虛擬銀行,或者有咩功能令你一定要用佢哋、依賴佢哋呢?積臣就暫時未見到。

虛擬銀行打得贏傳統銀行?

一般而言,好多人嘅銀行戶口主要用途都係出糧,而大部分公司會要求打工仔要開個指定出糧戶口,而好多時係傳統銀行嘅戶口。人係有墮性嘅,既然用開呢間銀行,無咩特別原因,就唔會點大改變。

而且現時正式營業既虛擬銀行都唔係間間有可以提款嘅扣帳卡,對於仲依賴使用現金嘅市民來講,一定係唔方便,積臣當然唔排除虛擬銀行會不日推出無卡提款功能,直接用手機就撳到錢喇!不過,縰使已經有幾間傳統銀行推出無卡提款服務,例如渣打、恒生,但積臣都唔多見人用呢!

另外,呢幾間虛擬銀行只有銀行服務,傳統銀行嘅服務,例如外幣兌換、外幣定存、金融產品服務(如基金、證券、保險)等等,虛擬銀行仲未比得上傳統銀行。加上傳統銀行有嘅係分行真人對答嘅服務,總有人覺得咁樣先至安心。

當然,虛擬銀行都只係啱啱開始,畀啲時間喇!又或者,有謂虛擬銀行唔係直接同傳統銀行比拼,兩者係相輔相成。積臣都係回歸最初問題,有無原因要令我一定要開個虛擬銀行戶口先?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版