常言道職業無分貴賤 你有冇職業排行榜「心魔」?

博客 10:22 2020/09/08

分享:

常言道職業無分貴賤 你有冇職業排行榜「心魔」?

話咁快就係9月學生開學日子,今年受疫情影響,學生需要習慣新嘅課堂教學方法。而受經濟低迷影響,今年Fresh grad搵工比以往幾屆畢業生難。政務司司長張建宗上月呼籲今屆畢業生要「放低身段,追求理想」,更話「洗碗都係工作經驗」。由港府第二把交椅口中一講,當然引起社會譁然喇。

港女列出港男職業排行榜

司長一番話,令積臣諗起一張係網絡流傳咗好幾年嘅一幅圖,標題係「港女列出港男職業排行榜」,出處已不可考。排行榜依分數次序列出了各行各業,10分滿分,最低係0分。傳統喺香港人眼中嘅尊貴職業,例如醫生、律師、Banker、會計師當然榜上有名,但以為呢啲職業一定穩坐三甲?咁你就錯喇!

港女列出港男職業排行榜

三甲係企業管理(10分)、律師(9分),同埋機師/導演/演員(8分)。有高分職業,自然有低分職業喇!要體力勞動嘅店員、清潔、跟車、粗重嘢、冷氣水電、地盤均為0分。另外,IT、文員、地產、保險只有1分。

積臣就覺得個排行榜當然有部分摸不着頭腦嘅地方,例如醫生高人工,又要高技術專業技能,得6分!?又例如政治家收入唔算穩定,生活私隱無保障,點解會有7分咁高。

好似Elon Musk呢類CEO,根據排行榜係10分滿分。

常言道職業無分貴賤,但真係要整個職業排名榜,積臣相信每個人心中實有一個列表,只係喺咩場合講、咩人講先會啱大家聽,呢個表雖然叫做港女對港男嘅職業喜好,但將排行榜放喺男性眼中,積臣敢斷言都未必錯晒。

積臣又舉例,叫一個做緊Sales嘅走去做廚佢肯唔肯?中餐行政總廚起碼每月有3、4萬人工喎。積臣有另一個理解係,呢個排行榜唔單止用收入嚟排名,仲有係港女(或者港人喇)本身喜唔喜歡嗰個職業同埋嗰種職業啲人嘅性格有關。

工作有滿足感 先有衝勁同動力

喺𠵱家「周街都係大學生」嘅情況下,除咗自己讀嘅本科已經有一條明確嘅職業道路,否則你問Fresh grad佢哋想做咩,佢哋未必100%肯定答到你。積臣就覺得,第一份工出來做咩都唔緊要,最緊要係你要做得開心,積臣深信只你有你熱愛嗰份工作,你做出來嘅嘢先有滿足感,工作愈開心,更有衝勁同動力,先會更追求自我提升,令自己更進步、更上一層樓。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版