【財務自由】得嗰一百幾十萬 學咩人講現金流呢?

博客 10:26 2020/08/25

分享:

知名財經暢銷書《富爸爸·窮爸爸》,都出版咗十幾年,應該好多人都睇過。就因為呢本書,令到「財務自由」一詞係嗰時流行起嚟。近年更多咗年輕人要講希望早啲財務自由。積臣就話,年輕人本唔多,就咪學人諗財務自由。

買入資產 減少負債

《富爸爸·窮爸爸》強調想做富爸爸,就要買入資產,而唔係擁有負債。「財務自由」,以前香港人會叫做「發達,唔使DO」,但𠵱家普遍會畀財務自由一個定義,即係自己可以係毋須因為基本生活開支而為錢工作,你有財務自由,你可以選擇過自己鍾意嘅生活模式,你鍾意環球世界又得,從事藝術創作,甚至話想繼續返工,但選擇自己鍾意嘅或更休閒嘅工作亦得。

買入資產產生現金流

要有財務自由,你買入嘅資產,係可以提供被動收入,產生一筆現金流,畀你日常生活開支用。問題嚟喇。究竟要幾多被動收入先夠?呢樣嘢因人而異,要睇你預計每年日常支出係幾多,而且你想過咩嘅生活質素。你要求係每一餐有魚有菜、每年去一次長途旅行,去公立醫院睇醫生,定係要求隔一餐有龍蝦、鮑魚,一年去二、三次長途旅行,睇醫生要去私家呢?呢兩種情況個人嘅對於財務自由下要求嘅生活質素已經好唔同,咁樣生活開支分別好大,但要做到後者,好明顯你被動收入要更多。

首先要有一筆本金

咁所謂要買入資產,究竟係咩呢?本書提出有好多種,較多人做法係買入股票同樓,靠股票嘅股息收入同出租物業嘅租金收入做被動收入。例如你買股收息,個組合有6厘,你投放50萬,每年收返3萬股息,除返每月只有2,500蚊,就算你係慳家一族,但2,500蚊喺香港都唔夠日常開支。加多一個「0」,即係500萬,同樣計算下咁你每月就有25,000萬使,兩件事已經好唔同了。

但另一個問題嚟喇,要買入足夠令你財務自由嘅資產,首先你要有一大筆本金,如果你無父母幹,邊度嚟500萬呢?特別係後生仔,啱啱出嚟做嘢,人工唔高,靠儲錢,真係幾時先儲到500萬。當你再叻,每月儲到2萬,一年儲24萬,都要儲21年先有500萬。

本少學咩人講現金流

積臣喺網絡論壇經常見人講要買股、債券、REITs等收息財務自由,但得嗰一百幾十萬,學咩人講現金流呢?你兼職做多一份隨時收入仲高過收息,而且買收息股咪以為唔使恒常檢討,萬一有隻股好似5號仔滙豐咁話唔派息,又或者減派息,咁你個組合股息收入就會減少,咁你都要重整個投收息組合。想收息過日晨?一樣都要投入心機。

所以對於年輕人嚟講,本少就咪學咩人講現金流,先諗如何滾大個資產先喇!

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

====

市場瞬息萬變,但機會處處。即上滙豐「FinFit」理財資訊平台,助你掌握先機,創造創富,財務自由就在不遠處。

【hket 網上書展訂閱優惠最後召集】禮品總值高達$4,726!把握機會,立即訂閱

8月4日起一連8個星期二晚上7:30, 八大財金名家包括:陶冬、陳坤耀、胡孟青、施永青、曾淵滄、林少陽、陸東、巴曙松,會於《香港經濟日報》坐陣!立即免費下載

撰文 : 積臣

欄名 : 積財有計

緊貼財經時事新聞分析,讚好hket Facebook 專版