【DSE放榜2020】給DSE應屆考生的信 繼續升學、投身社會 應該點揀?

博客 13:10 2020/07/23

分享:

【DSE放榜2020】給DSE應屆考生的信 繼續升學、投身社會 應該點揀?

DSE放榜,跟住落嚟,DSE應屆考生大概都係要諗揀咩科,讀乜嘢,定係唔讀書,直接出嚟做嘢。其實,正確啲講,係而家馬上繼續讀書,定係第時先至再考慮讀唔到。

DSE並非代表一切

學海無涯,無論從事邊一個行業都好,都總有形形式式的證書或者資格可以考取。就算而家冇,將來都會有。唔使信我,信張家輝。

所以呢,大家嘅著眼點應該係,而家讀書嘅 value-add 大啲,抑或係遲啲先好?

如果大家本身想做醫生、護士、工程師呢啲職業,咁就梗係要讀落去啦。

假如今年唔夠分考入去,就要諗下使唔使兜遠路,例如話副學士或者高級文憑之類。

但如果,大家想做嘅嘢,根本同學歷無關,例如純粹想做廚師或者工匠,咁呢個時勢,我覺得先做喜歡嘅工作,儲下錢先,其實都好合理。冇話一定要讀大學嘅。

升讀大學 vs 投身社會

大學係一個訓練思考方式同埋追求學問嘅地方,能夠令 mindset 變得更成熟、更深邃,當然很好。但係社會大學,即係出嚟做嘢,同樣地係木人巷,鍛鍊大家嘅心智。

尤其是,如果大家對於未來嘅打算,係有諗過放眼世界嘅話,咁就要認真諗下,係咪要隨波逐流,揀啲大路、「水泡」科目,抑或係揀一啲可以發揮到自己嘅潛能,同時喺香港以外嘅地方都用得著嘅科目。

香港暫時仲係亞洲區嘅金融中心,但係銀行同金融從業員,往往就係海外國家最唔需要嘅。你係會計師或者律師都仲好啲,但係一般前線或者後勤嘅員工,除非搵得多到夠你投資移民,否則,完全,係完全冇著數。

作為一個讀完一張又一張沙紙,一個又一個 Master 嘅人辦,我諗,我有資格講呢啲。

銀行、金融、地產、炒炒賣賣都可以為大家快速帶來收入。衰啲講,喺彌敦道開藥房賣口罩都搵得多過你。咁你唔去開舖?

年輕人目光要遠大

職涯規劃,係一個長遠而且需要深思熟慮嘅過程。

大家今時今日未必知道自己十年後從事乜嘢行業,但係肯定知道自己嘅喜好,肯定知道自已有乜嘢叻,有乜嘢一定搞唔掂。

又,當知道自己嘅長處同局限,透過排除同篩選,點都可以 shortlist 到幾個可行嘅方向。當然,請將目光放遠啲,唔係事必要諗「喺香港搵唔搵到食」。今日唔知聽日事,大家呢兩年仲未學精?

往後嘅思考,都係圍繞返你而家或者將來讀書,可以點樣幫到你成為一個更好嘅人,可以點樣令你與別不同。好似好虛咁,但係人人背景同天資都唔同,冇乜得一概而論。

財政許可應積極考慮外國升學

如果屋企有能力負擔嘅,積極考慮下去外國升學啦。最多抵諗啲,學餘時間做下兼職幫補下。我成世人都冇出過海外讀書 (exchange 都冇) ,算係一個遺憾嚟嘅。趁年少冇束縛,畀個選擇自己開闊條路好。

書,其實幾時都可以讀。唔夠分,最多遲啲讀。一扇窗關上,可能就有另一道門打開。夠分嘅,而家讀埋先,享受埋大學生活,無可無不可,但 2020 年唔係 2000 年,年輕人可以安逸享樂嘅日子,未必有上一輩咁多。

好抱歉,呢個係社會嘅錯。但如果要適者生存,喺不停變化嘅環境之中都可安身立命,就唯有盡可能諗遠啲、諗闊啲。

回望返五年前寫嘅「要是甘於庸碌,那就讀 BBA 吧」,更加感慨,原來要平庸地過活,都唔係咁容易。

【關於作者】

八十後,土生土長。中學志願做戰地記者,大學主修新聞與傳播,畢業後曾寫波經、跑體育新聞、通宵報新聞,方知衣不稱身。 轉工變轉行,轉咗入銀行,穿梭後勤、中場、前線,由九龍東殺返入中環。近年轉戰金融服務業,返工寫字,放工繼續寫字。相信文以載道,字以結緣。說話唔多,怕出口傷人。

【本文獲作者賴叔@職場心經授權轉載,原文題為:寫於 DSE 放榜日

撰文 : 賴叔

欄名 : 職場百科

緊貼財經時事新聞分析,讚好hket Facebook 專版