人到中年拎500萬身家炒股 你準備好市場新生態未?

博客 15:36 2020/07/21

分享:

人到中年想拎500萬出嚟炒股 你準備好市場新生態未?

近一年香港局勢持續不穩,有報道指,計劃移民海外嘅港人大增。但一講到要去異地重新發展,點都離唔開要講你個口袋要有幾多銀兩,想短時間搵到一大筆錢,除咗賭,好多人就聯想到炒股。連網討論區一個「同事人到中年攞五百萬出黎炒美股」帖文引起積臣嘅注意。

【相關新聞】港區國安法正式生效港人趕移民台灣 移民顧問:「客人很急燥 電話Whatsapp已作出決定辦手續」

簡單講下,呢位中年人,手持500萬現金,但又認為退休錢唔夠,移民嘅錢又唔夠,想將積蓄攞嚟炒股博一博。開post嗰位巴打無詳細交代佢同事係咩背景,有幾多年投資經驗,不過,喺持續量化寬鬆嘅年代,股票市場生態同上一代已經唔同了!

量化寬鬆年代 追逐成長科網股

自2008年起,美國量化寬鬆政策,令到資產價格飆升。今年全球各國均受到新冠肺炎大流行影響,經濟大受重創,於是各國都放水救經濟,以立投資董事總經理林少陽立上周喺《經濟日報》一個節目到表示,今年全球放水規模係2008年時嘅10倍。而全球最大對冲基金橋水(Bridgewater)創辦人達里奧(Ray Dalio)曾表示,現金係垃圾,喺通貨膨脹時期仍能保值或增值係較好嘅資產。所以你唔做資產配置,就好似蝕水係自己咁。

【閱讀更多】恒指起動要靠科網股?以立投資林少陽話你知:港股第三季投資部署(短片)

【閱讀更多】橋水Ray Dalio:現金就是垃圾

你𠵱家手持500萬,睇落好多,但未來通脹蠶食你筆錢嘅速度會比以往更快。如果你退休時係無樓人士,500萬退休金要計埋租樓開支,更加會滴晒汗,因為你同我都知,過去12年,樓價同租金升得幾誇張。所以呢位中年人所擔心嘅唔係無道理。

升嘅點止樓市,股市都係一樣,過去科網股驚人升幅唔使積臣多講。而今年最深刻感受嘅係,當全球疫情仲未受控時、生活仲未正常化時,唔少股份竟然係不斷創新高,最明顯就係不受疫情影響嘅科網股,連未有盈利嘅公司都炒到貴一貴,例如美團點評 (03690) 。無他,因為市場資金太多,好易變成蜂擁去炒一個板塊,而且市場又預期疫情下企業會加快數碼轉型,會因此更利好科網公司嘅增長。

價值投資落後大市

中年人想炒股大賺一筆,唔係唔得,但如果留係20年前思維,就好大鑊。因為量化寬鬆時代,資金炒作增長股,而增長最快速,無疑係科網股,而價值投資股份就不斷落後。價值投資代表人物巴菲特無人唔識啩,佢嘅投資旗艦巴郡近年股價表現愈來愈落後大市,從下圖可見從2009年開始嘅累積回報都已經跑輸標普500指數,更遑論科網股代表納指100指數。

綠綫是納指100,紫綫是標普500指數,可見巴郡跑輸以上兩者。

再睇下價值股代表Vanguard Value ETF(美︰VTV),自2009年表現係跑輸增長股代表Vanguard Growth ETF(美︰VUG),而個差距喺近幾年更明顯。

 

Vanguard Value ETF跑贏Vanguard Growth ETF。

打算係疫情撈底價值投資股,博疫情後大翻身?首先無人預測到今次疫情幾時先完,你都估唔到香港爆發第三波疫情吧,而且單日確診個案比之前一輪更多。第二,當價值投資股份喺疫情後大翻身,科網股已經升到飛天了,追唔返㗎啦。

【閱讀更多】股神巴菲特身家大縮水 富豪榜排名跌至歷來最低

市場生態已不同

積臣見唔少中年人,仲喺度講緊2008年金融海嘯嗰批嘅股王,例如滙豐 (00005) 、中移動 (00941) 、中國人壽 (02628) 等,會講下騰訊 (00700) 已經算叻,佢哋以前炒呢批舊經濟股的確可以賺唔少,但如果近幾年先買呢啲舊經濟股,只會跑輸大市(見下圖)。

匯豐、中移動、中國人壽回報跑輸恒指。

社會已進入新紀元,而未來繼續係科技改變世界嘅時代,例如人工智能、大數據、5G相關、雲計算等等會繼續受捧,資金會更為集中炒作某些板塊,而且佢哋嘅業務亦唔會好似舊經濟股咁容易理解。

加上,由於低利率環境,借錢成本低,唔少投資者會利用槓桿炒股,但當一去槓桿化、投資者散水,市場會變得更為波動,正如2月底至3月時美股嗰種要錢唔要貨、一日數次熔斷嘅情況,嚇到唔少人鼻哥窿都無肉,呢種情況喺未來可能亦唔係新鮮事了!

最後,積臣想請問呢位中年人,準備好去接受股票市場生態已經改變嘅事實了嗎?如果呢500萬輸咗一半,又有無諗過退休同移民計劃又會點呢?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版