政府派錢一萬蚊 點解銀行咁揼本派錢搶客?

博客 18:32 2020/06/22

分享:

政府派錢一萬蚊 點解銀行咁揼本派錢搶客?

政府派錢1萬蚊嘅現金發放計劃,噚日終於可以正式登記,首日喺銀行分行都有唔少市民排隊交表,而截至噚日下午5點,已經有200萬市民經電子登記。近年,每逢政府同銀行合作嘅計劃,例如派錢、iBond、銀債等,銀行都會推出一大堆優惠搶客,又大抽獎、送現金獎,又推高息定期存款等。有冇諗過點解銀行要咁揼本呢?

【政府派錢一萬】今起登記 一文睇晒6間銀行登記方法

1. 行銷目的

第一,當然係為得到用戶個人資料喇!喺𠵱家大數據年代,銀行攞到用戶資料嘅數據當然係愈多愈好,因為可以令銀行做得目標受眾行銷(Target marketing),搵出一班潛在客戶,sell客戶自己銀行嘅產品。

【政府派錢一萬】銀行優惠逐間睇 有間大抽獎送12萬超吸引

2. 商業貸款

第二,就係同經濟理論有關。唔知大家記唔記得中學上經濟堂時,銀行係點利用客戶存款去產生更多利益呢?就係將錢借出去。假設法定要求銀行存款準備金率係25%,咁1萬蚊嚟計,銀行就可以借7,500蚊出去,利用呢7,500蚊產生收益,例如銀行就向借呢筆錢客戶收返3厘年息。

當然,銀行需要向存入1萬蚊資金嘅存戶提供利息,但喺𠵱家咁低息環境下,銀行要畀存戶嘅利息根本好少,因此銀行可以從中賺取息差了!

如果市民喺收到呢筆1萬蚊後,唔拎去用只存放喺銀行,咁銀行就最開心。假設一間銀行有50萬登記1萬蚊計劃用戶,咁銀行就有50億存款,咁就提供咗一筆彈藥畀呢間銀行了。

3. 誘使市民用網上服務

最後一個原因係,部分銀行會為網上登記市民,提供尊享獎賞,目的係誘使市民開始用網上銀行。

須知道香港雖然一直被稱為國際金融中心,但喺FinTech發展,經常被批評發展緩慢。喺銀行電子服務嘅用戶體驗(User experience)上,就經常被批評難用同複雜,亦因此而令到唔少人唔想用銀行電子服務。積臣就曾經寫過某間英資銀行嘅手機銀行APP,非常唔方便,仲為我添加麻煩。

要令人改變一個習慣,或多或少都需要一啲誘因,今次政府派錢1萬蚊,若經電子方式登記,就更快可以領取到1萬蚊現金,或者都可以成為當中嘅誘因,繼而令市民開始使用銀行電子服務。當然,銀行亦會從中得益,當市民習慣使用銀行電子服務後,銀行就可以減省實體分行資源同支出,將資源之集中發展FinTech了!

【政府派1萬】1萬元現金發放計劃 或成市民轉用網上銀行服務的誘因?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

======

身體要Keep Fit,財富管理就要「FinFit」!即上滙豐「FinFit」理財資訊平台,教你創造財富、精明理財、安全理財,資產與智慧全面增值。

撰文 : 積臣

欄名 : 積財有計

緊貼財經時事新聞分析,讚好hket Facebook 專版