逢星期四購物滿$500享95折 Citi HKTVmall信用卡值得申請嗎?

博客 13:14 2020/04/28

分享:

逢星期四購物滿$500享95折 Citi HKTVmall信用卡值得申請嗎?

喺市場都傳咗好一段時間,Citi終於喺3月30號發咗新聞稿,話會同HKTVmall再度合作,推出HKTVmall信用卡,暫時開放畀「特選客戶」申請,仲聲稱會用API技術,等大家可以一站式搞掂所有手續,仲唔使文件就可以即時消費,暫定5月上綫。

【延伸閱讀】網購信用卡主打高回贈?小心呢啲中伏位

呢張卡有咩咁特別呢?今次會先簡單分析一下呢HKTVmall卡到底着唔着數。

5%折扣只是追緊一點龍頭

咁呢張卡有咩最大着數呢,暫時根據各大媒體報道,最主要就係星期四有5%折扣。

其實今時今日只要你係HKTVmall嘅VIP客戶,逢星期四都會有5%折扣。咁個關鍵位就係到底呢兩個優惠可唔可以重叠使用,變成10%折扣喇。(精準啲應該係1- 0.95 x 0.95 = 9.75%)。

暫時睇咗幾個Page,咁到底得唔得呢?答案係「唔」!「知」!「道」!睇返網站有限嘅T&C,一般條款及細則第4點:

優惠不可連同其他特別推廣、折扣或推廣優惠券一併使用,不可轉讓,亦不可兌換成現金或其他優惠。

但係同步「Citi HKTVmall信用卡支付平台簽賬」計劃5%折扣優惠之條款及細則第17點又咁樣寫:

合資格信用卡持卡人於星期四透過Citi HKTVmall 用卡支付平台作合資格簽賬滿HK$500,可獲享5%折扣。5%的折扣將於選擇使用Citi HKTVmall 信用卡支付平台後並輸入相關優惠碼,即時反映在HKTVmall的付款專頁上。優惠碼會經由HKTVmall流動應用程式推送通知或其他渠道通知信用卡持卡人。

咁到底得唔得呢?咁當然一日未出詳情,大家都係估估吓咁啦。

就算係10%仍不值一提

咁如果係得嘅,10%都唔錯吖,華田做咩要話佢「不值一提」,要踩得咁盡呢?

嗯……因為呢期HSBC:

1. 玩緊5%(HKTVmall VIP)+

2. 4%(Red Card Online Spending,Card feature嚟嘅,即係理論上永久) +

3. 5%(超市包括HKTVmall回贈,去到5月尾)

即係總數大概係14%,一拍落去,你就知10%其實好弱雞。

咁就算唔計呢期嗰5%超市回贈,咁用Red Card都額外有4%,HKTVmall卡先多得嗰1%就其實無咩咁吸引力。要論方便,Red Card唔止你HKTVmall有4%,係全部網上消費都送4%,一比較之下,你就知孰強孰弱啦。

【延伸閱讀】滙豐推新信用卡 暗藏呢幾個小細節?

優惠難用 不及對手吸引

Sorry好似踩得好盡咁,因為真係好難用。

其實𠵱家用「星期幾」嚟畀優惠嘅信用卡經已唔太多,我諗自從10年前大新張「我至愛商戶」卡出咗之後,成個Market都慢慢轉晒去Merchant driven,當中佼佼者當然係HSBC「最紅自主獎賞」,仲有渣打里數卡嘅食肆簽賬$4/1mile、Red Card online 4%等等。

5倍係咩玩法呢?喺Citi基本盤250分兌$1,5倍即係2%回贈。

要論競爭對手,網上消費的話當然Red Card完勝;論實體消費,不外乎食飯、超市、買電器,HSBC Visa Signature喺以上3個Category基本回贈係1.6%,仲未計5x最紅自主獎賞總數3.6%,點玩呢?田生主卡放「賞滋味」專攻食飯,田太附屬卡放「賞家居」專攻超市家電,而最重要唔使等星期一,而係星期一至日都碌得!

所以老實講,喺基本玩法之下呢張新卡真係一啲吸引力都無喇。

 

【文章來源:華田銀行;已獲授權轉載。原題:HKTVmall Card值得申請嗎?】

【關於作者】

兒時夢想做i-banker,結果做了bank worker,還要是retail那種。過去在各大小銀行不同部門流徙,叫人借錢、催人還錢、審批貸款、出股票app、出借錢app、出信用卡、廣告策劃、銷售管理、分行佈點、生物認證、電子排隊、機器學習、敏捷開發,到現在還未安定下來。不懂財經、不懂經濟,只想談一下「銀行」這回事。

撰文 : Wallace Tin

欄名 : 華田銀行

緊貼財經時事新聞分析,讚好hket Facebook 專版