【滙豐不派息】靠滙豐收息做退休金? 退休部署唔係賭博

博客 17:14 2020/04/03

分享:

【滙豐不派息】靠滙豐收息做退休金? 退休部署唔係賭博

今星期令唔少人聽者傷心,有貨者更可能要流淚嘅新聞,就係滙豐 (00005) 宣布停派原定第四次股息,同時2020年都唔會派息。「大笨象」滙豐地位舉足輕重唔使積臣多講,好多散戶,特別係老一輩都會買滙豐收息做「退休金」,今次滙豐嘅行動實打亂唔少人嘅退休部署。

好多香港人對滙豐都有特殊情意結,但滙豐自2008年金融海嘯後,股價表現喺眾多港股藍籌股中唔算突出,一路都上唔返海嘯前95蚊高位,其股王地位更被騰訊 (00700) 取代,但依然有唔少投資者青睞,股價每逢低位就會有人話「撈底喇」、「低吸呀」咁,無他,因貪其穩定派息政策。今次因新冠肺炎引發股災,滙豐股價一路跌,息率就不斷升,見住7、8、9厘,甚至逼近10厘嘅數字,好多散戶雙眼發光,抱住「遲啲實升,𠵱家買抵呀」嘅心態,點知今次一買就「中伏」。

【延伸閱讀】冷門高息ETF點樣揀?提防高息陷阱!

不能All in一隻股份

早年香港未有成熟退休制度,市民退休後想有一筆穩定收入做使費,買股收息的確係一個唔錯嘅方法,而滙豐曾經作為香港輝煌一代嘅標誌,又多人識,同時係耳濡目染下,買滙豐被視為「退休保障」之選。未喺金融海嘯墜馬前嘅滙豐,當時真係可以賺息又賺價,好多媒體都有報道「邊個邊個買滙豐,提早退休唔使撈」咁。不過,你如果喺嗰時嘅高位買滙豐,就可能賺息蝕價嘞。滙豐始終係私人企業,因經營環境改變而停止派息亦非無可能,所以投資者真金白銀拎錢買股收息做退休金就唔係講玩。

積臣當然唔反對買股收息做退休金,但All in一隻股就唔好嘞,投資應該要將「風險管理」呢四隻字記喺心中,其中一個方法要係平衡組合,將資金分散買幾隻股份,根據唔同股份嘅股息同你組合持有比例,計算出一個目標嘅退休組合收益率。喺咁樣情況下,就算其中一隻減派息,甚至好似今次滙豐停派息,都仲有其他股份頂住。進一步講,更穩陣方法,退休組合唔應該只有股份,因為易受股市波動影響,而係同時要有債券、定期存款、固定收益基金等產品去穩定組合回報。或者你有機會All in一隻股份而獲利豐厚,但亦都有機會好似滙豐咁。喂!退休部署唔係賭博呀。

【延伸閱讀】指數基金比主動基金更受歡迎? 巴菲特用「10年賭局」證明

本港退休保障問題要由政府解決

歸根究柢,積臣認為香港人視滙豐做為「退休金」,其實都係香港退休制度唔完善,香港生活成本係全球數一數二,退休後零收入,又要面對巨大生活開支,靠股票收息做「退休保障」無可厚非。強積金推出20年,但表現不如意、收費貴問題一直被人詬病,而老一輩因供款年期唔長,強積金供款都唔會夠退休開支,而生果金、長生津、綜援又唔足以支撐到退休生活,所以港人退休保障問題始終要政府做解鈴人。

【滙豐不派息】單靠收息股退休無保障?專家教你制定退休組合

經過今次滙豐一事,應該好多人諗起當年「青姐之淚」,不過喊完過後要振作,退休人士都要重新規劃一下自己退休金部署呀。

最後都要戴下頭盔,以上並不構成任何投資建議,僅提供作參考用途,本人並無持有任何滙豐股份。

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

============

免費下載 hket App,關注「全球疫情實時動態」:http://bit.ly/33C83cZ

立即訂閱專享無間斷美股分析: http://bit.ly/2ZN5x1l

撰文 : 積臣

欄名 : 積財有計

緊貼財經時事新聞分析,讚好hket Facebook 專版