疫情令員工在家工作 企業要適應新工作模式轉變

博客 18:20 2020/03/20

分享:

疫情令員工在家工作 企業要適應新工作模式轉變

新型冠狀病毒疫情全球大流行,全球各國幾乎停市、停工、停學。喺農暦新年之後,香港政府就帶頭公務員在家工作安排,唔少企業都有跟隨,學校亦改為網上授課,呢一波疫情令遙距工作、遙距教育嘅普及速度又加快咗。

企業要適應新工作模式

隨着科技進步,加上社交通訊軟件嘅協助,遙距工作喺𠵱家全球化嘅時代已經唔係咩新鮮事,但放係香港,遙距工作就唔係好流行,好多企業係硬件、工作流程方面都無考慮過配合遙距工作,今次疫情要突然將員工改做在家工作,就「揦手唔成勢」,例如係,企業係用內部email系統,公司重要文件或工作系統儲放喺公司server,員工喺屋企就用唔到,做唔到嘢。又眼見好多企業改用zoom開會,就搞出好多蝦碌嘢。同樣地,員工由喺一個慣咗嘅工作環境,變咗做無得面對面見到大家嘅環境,工作流程同溝通全部要適應,效率都比正常低。

難聽啲講句,好多嘢喺出事果陣先會改變。而今次正正考驗企業如何適應未來新職場嘅生態,即係在家工作、彈性工作、freelancer或slasher(斜槓族)的工作模式。經過今次疫情,大家對在家工作、彈性工作嘅接受程度當然會大咗,但企業更應放寬心態去睇,原來員工會咁需求,尋找一個雙贏方案,又或正面諗,咁樣嘅工作模式或可能對企業同員工都更有利。

【Home Office】遙距工作成新趨勢 企業如何保持營運效率?

不是所有人都適合在家工作

當然,在家工作、彈性工作呢啲模式唔係人人都適合,要求好高自律性同紀律性,唔係就好易變得懶散,走去行山就唔好喇!呢啲就要考驗企業嘅應變能力同工作分配流程。同時,在家工作、彈性工作又涉及到「上班」嘅定義,究竟要員工坐定定係office,定係員工喺屋企完成目標工作,都已經叫做盡責呢?

無論點,今次疫情可以讓企業嘗試數碼化工作模式,利用科技去協助員工完成工作,加快工作流程,同埋適應新嘅職場模式,成效好唔好,未必有人答實,但環境大勢咁樣落去,企業試下亦無妨,就當測試一下自己企業適應能力。

【Home Office】在家工作變行山 偷懶不如趁機增值自己

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。5

撰文 : 積臣

欄名 : 積財有計

緊貼財經時事新聞分析,讚好hket Facebook 專版