環球股災𠵱家先問MPF點部署? 不如做「佛系」投資

博客 16:45 2020/03/13

分享:

受新冠肺炎疫情大流行影響,今星期環球股票市場繼續風聲鶴唳、哀鴻遍野,打開股票APP,各大指數見紅,美股今星期更兩度觸發熔斷機制,真係可以載入史冊了!無做開投資嘅人,應該會興幸自己無貨無事,不過你個強積金戶口,今次環球股災應該點都會有影響你嘅回報咯!

今次環球股災,連曾經「地上最強」美股標普500指數喺噚日(3月12日)都急挫9.51%,全球都好似想「要錢唔要貨」,鬼咩!今次新冠肺炎疫情究竟要肆虐幾耐?幾時研發到特效藥同疫苗?病毒喺夏天仲會唔會蔓延?呢啲通通無人有確切答案,但市場就擔心百業蕭條,經濟短期唔會恢復正常,面對咁多不確定性,股票市場都成為提款機,個個真係揸Cash保平安了。

但MPF本意係退休保障之用,除非符合法例上嘅特別條件,一般只可以等到65歲先攞得,無得套現揸Cash保平安。每次呢啲波動市,實會有人問點樣好,有咩解救。但通常問得嚟,投資市場已經出現恐慌了。

【經濟衰退如何部署】面對經濟衰退 如何保護自己嘅荷包?

你本身係咪慧眼先機?

以今次為例,假設你可以喺2月24日嗰日察覺到係今次環球股災先兆,而債市將會係避險之選,你係當日4點之前即時將MPF高風險基金轉晒做債券基金,你可以話避過咗今次股災,直到𠵱家,相信你個MPF組合仍然係賺錢,就算將資產轉晒去保守基金,都應該唔會蝕。但呢啲慧眼先機,都要本身有投資知識去作出部署。

根據晨星(亞洲)網站最新統計,頭10隻年初迄今回報最高都係債券基金。

係2月24日至到28日5個交易日美股標普500指數跌咗383點,或跌11.49%,恒指跌咗1,178點,或跌4.32%。如果由2月24日起計到噚日3月12日收市價,標普500指數跌咗813點,或跌24.39%,恒指跌咗2,999點,或跌10.98%。如果你係28日先問點算,都為時已晚,更何況𠵱家?如果你本身唔係即市部署嗰班人,積臣認為𠵱家唔轉好過轉,特別係後生仔。

做「佛系」好過

其實股災屢見不鮮,過往分別有2008年由美國次按危機引發、1997年亞洲金融風暴、1987年美股「黑色星期一」席捲全球等等。但其實睇返下面兩張圖,由1987年年初開始,就算經歷以上提到嘅股災,恒指依然係一個上升趨勢,標普500指數個走勢當然比恒指好睇,始終美股由2008年底起,就經歷了11年牛市。以MPF嚟講,今次股災都唔代表係世界末日,始終MPF原意係將來退休之用,唔等錢使嘅後生仔做「佛系」好過喇!

恒生指數由1987年開始的走勢。

標普500指數由1987年開始的走勢。

【更多關於指數投資】時間證明 一般投資者更應該投資指數?

「佛系」管理嘅回報當然未必比經常轉換嘅做法好,但積臣之前都分享過,我曾經喺2015年恒指熊市之時,將MPF轉嚟轉去,喺波動市況反而更易令資產損失,MPF亦唔似股票,可以當日買,當日賣,MPF基金轉換喺需要幾日時間的,一般嚟講受託人要2個工作天執行,做短炒係十分困難。

【那些年錯誤操作】那些年我MPF蝕20%

機會始終會嚟

「股神」巴菲特對於今次股災,都話佢活咗89年都係第一次見,但佢唔驚慌,一來佢見慣世面,二來巴郡截至去年底坐擁逾1,200億美元(約9,300億港元)嘅現金,佢隨時可以喺「別人恐懼時,佢貪婪」撈貨。所以,如果本身慧眼先機,MPF係做緊保守投資,例如泊係保守基金、保證基金等,積臣建議等位部署。積臣唔知各市場嘅指數個底喺邊,但疫情紓緩後,經濟恢復正常,投資市場將會反映利好消息,到時將MPF轉晒高風險基金、例如北美股票基金,亞洲股股票基金等,熊市轉牛市果一陣升幅係最「和味」,上面張恒指同標普500張圖已經解釋晒喇。

【延伸閱讀】美聯儲緊急減息都救唔到市

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

撰文 : 積臣

欄名 : 積財有計

緊貼財經時事新聞分析,讚好hket Facebook 專版