【股神光環不再?】巴郡破天荒買入標普指數ETF 巴菲特都向指數投資認輸?

博客 18:23 2020/02/21

分享:

巴郡破天荒買入標普指數ETF 巴菲特都向指數投資認輸?

新型冠狀病毒肺炎(俗稱武漢肺炎)全球肆虐,令到環球投資市場難免受影響,雖然美股噚日表現回一回,但美股市場3大指數過去幾個月好似同地心吸力相反咁,不斷創新高。美股正值上市公司業績期,當中最具話題性嘅,梗係唔少得巴郡2019年第4季投資組合嘅持股變化。

巴菲特自信跑贏指數

「股神」巴菲特旗下企業巴郡(代號:BRK.A)嘅持股變化往往係投資者嘅焦點之一。據巴郡公開嘅文件,巴郡喺2019年第4季破天荒買入兩隻ETF,分別係領航標普500 ETF(代號:VOO)及SPDR標普500 ETF(代號:SPY),兩隻ETF都係追蹤標普500指數,持倉總市值係2,500萬美元(約1.9億港元),相比巴郡嘅其他持股,好似可口可樂(代號︰KO)持倉市值達220億美元(約1,700億港元),兩隻ETF持倉總額只係微不足道。

【延伸閱讀】指數基金比主動基金更受歡迎? 巴菲特用「10年賭局」證明

巴菲特由上世紀90年代起就不斷推崇指數投資,他曾表示通過定期投資指數基金,一個業餘投資者都可以戰勝大部分專業投資者。但巴郡嘅投資組合入面加入指數基金,就係第一次。嘩!肯定會有人質疑,股神係咪自打嘴巴?當然唔係,2007年巴菲特曾經被問到點解唔買ETF時,巴菲特就「霸氣」回應,佢自信可以跑贏標普500指數,而另一個原因係維持足夠現金喺市場作出部署。2008年,美國次按危機發生,連累美股急挫,巴菲特當時就大手掃貨,事實亦證明股神眼光係獨到,巴郡往後股價表現亦跑贏市場。

巴菲特光環不再?

由2009年開始美股就展開長達10年升浪,巴菲特之後未可以喺「別人恐懼,我貪婪」時繼續大手喺股票市場掃貨,二來唔少公司市值飆升,百物騰貴下,巴菲特近年亦曾多次抱怨難以搵到估值吸引嘅公司進行併購,就算巴郡坐擁逾1,200億美元(約9,300億港元)現金,都無用武之地。

巴郡對其他企業進行併購,從而提升巴郡價值,但近年來未見有矚目併購,手持過多現金而無部署亦令投資者/股東失望,因此巴郡股價表現未見特別出色,甚至跑輸標普500指數ETF(見下圖5年表現比較)。

巴郡A VS 兩隻標普500 ETF股價表現,可見巴郡跑輸標普500 ETF。

今次巴郡投資組合加入兩隻標普500 ETF,係咪向指數投資認輸呢,係連頂級投資大師都跑唔贏指數基金,定係如彭博研究分析師Eric Balchunas所指,巴郡將資金停泊喺ETF,係維持對市場嘅持有部位,同時減輕投資組合中現金比重過多嘅情況。

當然巴菲特近年都有出色嘅交易,例如買入蘋果公司(代號:AAPL),令佢進帳唔少,𠵱家蘋果公司仲係巴郡最重倉持股,接近3成。

【股神光環不再?】長情股東盡沽巴郡 力數巴菲特「3宗罪」

今次部署係咪由巴菲特親自操作呢?2019年巴郡買入Amazon時,市場以為巴菲特對科技股改觀了,但佢澄清係由旗下基金經理買入,今次係咪都一樣呢?又巴郡會唔會繼續增持標普500 ETF呢?呢啲就等巴郡業績後嘅股東會就知曉。

過往不少信奉巴菲特投資方法嘅投資者,都建議直接買入巴郡股份,但巴郡股價表現愈來愈明顯跑輸指數ETF,係咪一次當頭棒喝呢?

 

【作者簡介】90後製作公司打雜,熱愛打機,亦愛行山吸收靈氣,希望快啲儲夠錢享受人生。

 

撰文 : 積臣

欄名 : 積財有計

緊貼財經時事新聞分析,讚好hket Facebook 專版